“Ala ka Kuma waaju ka dafa”
1 A mana diya i ye sɔbɛ la ka fɛɛn ɲuman dɔ sɔrɔ, yala i t’i ka waleɲumanlɔn yira i ka miiriyaw n’i ka walew fɛ wa? Tiɲɛn na i b’o lo kɛ! Ala ye ɲumanya ni kanuya minw yira hadamadenw na, a filɛ ciden Pol y’o laminɛ cogo min na. A kabara ko: “Barika Ala ye a ka nili fɛnba kosɔn min ɲɔgɔn tɛ!” O “nilifɛn” ye mun lo ye? “Ala ye nɛɛmaba min [bɛɛ] kɛ” an ye, o lo. A yiracogo cɛɲumanba kɛra a dencɛ dili ye, k’a kɛ kunmabɔ saraka ye an ka jurumuw kama.—2 Kɔr. 9:14, 15; Yuh. 3:16.
2 Yala Pol ka foliw tun ye kumaw dɔrɔn ye wa? Fewu! A y’a ka waleɲumanlɔn yira cogoya caaman na. A tun b’a janto kosɔbɛ a ka kerecɛn tagamaɲɔgɔnw na. Ani, a tun b’a fɛ k’a seko kɛ walisa k’u dɛmɛ ka nafa sɔrɔ Ala ka kanuya la. Pol y’a fɔ u koo la ko: “An tun be aw kanu kosɔbɛ, o de kosɔn an labɛnnen tun don ka Ala ka Kibaru Duman di aw ma, hali an niinw yɛrɛ, katuguni aw koo diyara an ye kosɔbɛ.” (1 Tes. 2:8). Minw tun kɛra ka ban kafo kɔnɔ mɔgɔw ye, Pol y’olu dɛmɛ k’u ka kisili magwɛn. Ka fara o kan, a timinandiyara ka kibaro duman waajuli kɛ, a kɛtɔ ka kilomɛtiri waa caaman tagama dugukolo kan, ani kɔgɔji kan. A tun be mɔgɔw ɲinina, minw “labɛnnin bɛ ka sɔn ɲɛnamaya banbali ma.” (Kew. 13:48, SBI, 1994). Jehova ye min bɛɛ kɛ a ye, komi Pol tun b’o waleɲuman lɔn kosɔbɛ, o y’a lasu ka “Ala ka kuma fɔ k’a foori.”—Kolos. 1:25.
3 Jehova ye min bɛɛ kɛ an ye, yala o waleɲumanlɔn t’an lasu k’a ɲini ka mɔgɔw dɛmɛ an ka kafo kɔnɔ, minw mako be dɛmɛ la wa (Gal. 6:10)? Ani, yala an t’a fɛ ka Masaya kibaro duman waaju n’an seko bɛɛ ye an ka kiinw bɛɛ kɔnɔ wa? —Mat. 24:14.
4 Waleɲumanlɔn yira wagati dɔ: Saan o saan, Kirista ka saya Hakilijigi seli be cogoyaba di an ma k’a yira ko Jehova ni Yesu ye min kɛ an ye, an b’o waleɲuman lɔn. Lajɛn wɛrɛ dɔrɔn tɛ, ani hakilijigiko gwansan tɛ. Yesu y’a fɔ ko: “A’ ye nin kɛ walisa ka aw hakili to ne la.” (Luka 22:19). Kirista ka saya Hakilijigi seli be sira di an ma ka miiri Yesu ye mɔgɔ sugu min ye. Wagati lo k’a lɔn ko bi, a ɲɛnaman lo, ani a be baara la. Nɔɔrɔ ni masaya dira a ma, a ka kantigiya n’a ka saraka kosɔn. O seli be cogoya di an ma fana k’a yira ko an be kolo Kirista ka kuntigiya jukɔrɔ, ale min be kerecɛnya kafo ka koow n’a ka baaraw kɛcogo ɲɛminɛna (Kolos. 1:17-20). Ala ka mɔgɔw bɛɛ ka kan k’u ka bonya yira, u kɛtɔ ka kɛ Kirista ka saya Hakilijigi seli la. Ɲinan, o seli bena kɛ lamisalon marisikalo tile 28nan, tileben kɔ.
5 Salon, jijali sɔbɛ kɛra ka kɔn Hakilijigi seli ɲɛ. O sababu fɛ, kafoden cayaliba 2 163 602 nana o seli la Eta Zini ka tɔnbolo mara la (n’i be sigida ka jatidenw fɛ, a filɛ saan 2002 zanwiyekalo tile fɔlɔ ka La Tour de Garde kɔnɔ, a ɲɛɛw 19-22nan.) Ɲinan ka kafodenw bena kɛ mɔgɔ joli? O fanba bena bɔ n’an “bɛ baara kɛ ka sɛgɛn ani ka bondori kɛ,” walisa ka mɔgɔ caamanba dɛmɛ u ka na seli la.—1 Tim. 4:10.
6 Ka fara an ka tagali kan Matigi ka surafana la, n’a sɔrɔ an bena se ka dɔ fara an ka waajuli baara kan. Siga si t’a la, balima waa caaman bena kɛ piyɔniye kɔrɔsigi ye kalo kelen wala kalo caaman na. Saan looru tɛmɛnenw kelen kelen kɔnɔ, mɔgɔ 212 142 kɛra piyɔniyew kɔrɔsigiw ye Hakilijigi seli wagati la k’a ta marisikalo la ka taga bila mɛkalo la. (N’i be sigida ka jatidenw fɛ, a filɛ saan 2001 An ka Masaya Cidenyabaara kɔnɔ, zuwekalo, utikalo ni Sɛputanburukalo taw.) Yala i be se ka labɛn kɛ walisa ka nɛɛma sɔrɔ ka kɛ piyɔniyew kɔrɔsigi ye ɲinan wa? A bena kɛ fɛɛrɛ cɛɲumanba ye i fɛ k’a yira k’i be Ala ka kanuya waleɲuman lɔn, komi a ye Kirista di saraka la. I be se ka la a la ko Jehova bena i duga, komi seereya ninw b’a yira cogo min na.
7 Balimamuso dɔ tun be baloɲini baara la wagati bɛɛ. A kɛnen kɔ kɔrɔsigi piyɔniye ye marisikalo tɛmɛnen na, a ye nin sɛbɛ ko: “Saan 2001 feburukalo An ka Masaya Cidenyabaara y’an kelen kelen jija an ka kɛ piyɔniye kɔrɔsigi ye Hakilijigi seli wagati la n’an ka koow cogoya be sira di an ma k’a kɛ. Komi sibiri looru be marisikalo kɔnɔ, o bɛnna kosɔbɛ ni ne ka wagatijatilen ye. O kama, ne y’a latigɛ k’o baaraɲini sɛbɛ dafa.” Kalo daminɛ na, a ye ŋaniya ta ka Bibulukalan daminɛ ni mɔgɔ dɔ ye. Yala a sera k’o kɛ wa? Ɔnhɔn, tuma min na a tun be lɛri 52nan dafara waajuli kɛtɔ o kalo kɔnɔ! A ka kuncɛli kumaw ye jumanw ye? A ko: “Duga cɛɲumanba b’a la n’an be dɔ fara an ka jijali kɛli kan.”
8 Tɔnɔ juman b’a la ni denbaya mɔgɔw jɛnna ka kɛ piyɔniyew ye? Denbaya dɔ y’o kɛ awirilikalo tɛmɛnen na. U mɔgɔ naani fɛ, u tɛna ɲinɛ o kalo kɔ abada. Bamusoman y’a fɔ ko: “Loon o loon tun be sababu di an ma ka nisɔndiya, sabu an tun jɛnnen be cidenyabaara la! Surafana tun kɛra an fɛ nisɔndiya wagati ye, sabu an tun be baro kɛ tilera waajuli baara kan.” Dencɛman y’a fɔ ko: “A diyara ne ye ka waajulibaara kɛ ni papa ye lɔgɔkun kɔnɔ, wagati min kɔnɔ a tun ka ɲi ka baloɲini baara kɛ.” Facɛman y’a fara a kan ko: “Ne min ye gwatigi ye, a ye ne wasa k’a lɔn ko an tun jɛnnen be baara min na, dɔ wɛrɛ si ma kɔrɔta ka tɛmɛ o kan an ka wagati nin na.” Yala i ka denbaya be se ka jɛn ka piyɔniye baara kɛ wa? Mun na aw tɛ baro kɛ o kan gwa kɔnɔ walisa k’a filɛ ni gwa mɔgɔw bɛɛ be se ka kɛ piyɔniyew kɔrɔsigiw ye hakilijigi seli wagati la?
9 Yala marisikalo be se ka kɛ an fɛ dan na kalo ye wa? Saan 2000 daminɛ na, An ka Masaya Cidenyabaara ye ɲiningali nin bila ko: “Yala awirilikalo be se ka kɛ an fɛ dan na kalo ye wa?” A jaabili tun ko di? Kunkɔrɔta kura caaman tun sɔrɔla. Togo jamana na, kalo dɔ kɔnɔ, piyɔniyew kɔrɔsigiw cayaliba kɛra 2 410 ye. U tun ye 196 ye Sɛnɛgali. Ka fara o kan, lɛriw, zurunaliw ani viziti kuraw cayaliba kuraw sɔrɔla. O dan na kalo la, baara gwanniman kɛra Alako ta fan fɛ. O nana ni dusu diya min ye aw ka kafo kɔnɔ, yala i hakili b’o la wa? Yala an be se k’o baara ɲɔgɔn kɛ ɲinan, wala ka dɔ kɛ ka tɛmɛ o yɛrɛ kan wa? Ni bɛɛ jɛnna ka jijaliw kɛ, saan 2002 marisikalo be se ka kɛ kalo ye, min ɲɔgɔn ma deli ka ye. Mun na marisikalo?
10 Kuun fila kama. Fɔlɔ, Hakilijigi seli bena kɛ marisikalo laban faan na. O be wagati caaman to an bolo kalo kɔnɔ ka mɔgɔ caamanba weele ka na o seli la. Filanan, ɲinan, lɔgɔkun laban looru be yen marisikalo kɔnɔ. O bena koow nɔgɔya balimaw ye, minw b’a fɛ ka kɛ piyɔniyew kɔrɔsigiw ye, olu minw tagara baara la wala lakɔli la. Mun na i tɛ i sigi sisan ani ka wagatijatilen nɔgɔman kɛ? Kalandiriye dɔ dira o kama sɛbɛ nin lankana kɔnɔ. Piyɔniyew kɔrɔsigi baara ka nɔgɔ ka tɛmɛ i ka jatili kan. Ɲɛyirali fɛ, n’i ye labɛn kɛ walisa ka lɛri 8 kɛ waajuli la lɔgɔkun looru kelen kelen laban na, i makoya bena kɛ lɛri 10 wɛrɛw dɔrɔn na walisa k’i ka laɲinita dafa: o min ye lɛri 50 ye. I be se ka labɛn wɛrɛ kɛ kalo kɔnɔ walisa k’o lɛri 10 wɛrɛw sɔrɔ.
11 Diinan mɔgɔkɔrɔw be se ka mun lo kɛ walisa ka kafo mɔgɔw bɛɛ dɛmɛ ka “Ala ka Kuma waaju ka dafa?” Kalan kɛtɔ kafo kɔnɔ, ani baro kɛtɔ ni balimaw, o baara dusu diya don u kɔnɔ. Kitabukalan ɲɛminɛbagaw n’u kɔrɔsigiw be se k’a bɔ u yɛrɛw la ka baro kɛ o koo kan ni jɛkuluden kelen kelen ye, ani k’u dɛmɛ. I be taga a sɔrɔ a tigi mako be jagwɛlɛya kuma diiman wala ladili nɔgɔman dɔw la dɔrɔn (Ntal. 25:11). Caaman bena a kɔrɔsi ko n’u sɔnna ka yɛlɛmani fitinin don u ka wagatijatilen kɔnɔ, u be se ka nɛɛma sɔrɔ ka piyɔniye kɔrɔsigi baara kɛ. Kafo dɔw kɔnɔ, diinan mɔgɔkɔrɔw ni kɔrɔsigi cidenw caamanba, n’o bɛɛ yɛrɛ tɛ, n’u musow be ɲɛyirali ɲuman di, u kɛtɔ ka kɛ piyɔniyew kɔrɔsigiw ye Hakilijigi seli wagati la. O ye weleweledala caaman lasu k’u sennɔ ta. Kɛnɛyako wala koo wɛrɛ dɔw kosɔn, weleweledala dɔw tɛ se ka kɛ piyɔniyew ye. Nka an be se ka dusu don u la u ka jɛn ni kafo ye k’u ka waleɲumanlɔn yira, u kɛtɔ k’u seko kɛ waajuli baara la.
12 Koow bena ɲɛ ni diinan mɔgɔkɔrɔw y’u janto ka koow labɛn koɲuman. Lɔgɔkun kuru bɛɛ kɔnɔ, waajulibaara lajɛnw ka kan ka labɛn cogo nɔgɔman na. N’a be se ka kɛ, waajulibaara kɔrɔsibaga ka kan ka kɔn ka cii di balima setigi dɔw ma walisa u k’o lajɛnw bɛɛ ɲɛminɛ. O lajɛnw man kan ka tɛmɛ miniti 10 wala 15 kan: ka jɛkuluw labɛn, ka waajuli kɛyɔrɔ yira u la, ani ka delili kɛ, o bɛɛ kuun be o wagati la. O kama, waajibi lo labɛn ɲuman ka kɛ. (A filɛ An ka Masaya Cidenyabaara kɔnɔ, saan 2001, sɛputanburukalo ta.) Labɛn min kɛra baara kama kalo kɔnɔ, a’ y’o ɲɛfɔ ka gwɛ kafo ye, ani a’ y’o kunnafoni bila walakaba kan.
13 Waajuli kɛyɔrɔ ka kan ka labila, min bena labɔri kɛ. Waajuli kɛyɔrɔw kalifara balimacɛ min ma, ale ni waajulibaara kɔrɔsibaga ka kan ka baro kɛ walisa waajuli ka kɛ kiinw kɔnɔ, baara ma deli ka kɛ minw kɔnɔ. Mɔgɔ minw tun tɛ yen u ka soo, an ka kan ka jijaliba kɛ k’u sɔrɔ, ani ka waajuli kɛ siradaw la, magazɛn ni magazɛn, ani wula fɛ. Koow cogoya mana bɛn, an be se ka weleweledala dɔw dɛmɛ ka seereya di telefɔni fɛ.
14 U dɛmɛ ka baara kɛ kokura: Yala weleweledala dɔw be ye aw ka kafo kiinw kɔnɔ, minw y’a dabila ka kibaro duman waaju wa? O ɲɔgɔnna mɔgɔw ye kafo mɔgɔw ye hali bi, ani u mako be an ka dɛmɛ la (Zab. 119:176). Duniɲa kɔrɔman nin laban ka surun, ani an be kuraman dafɛ. O dalilu ɲumanw kama, an ka kan ka jijaliba kɛ walisa ka mɔgɔw sumalenw dɛmɛ (Rom. 13:11, 12). Kameruni jamana na, saan looru tɛmɛnen na, mɔgɔ 350 sɔnna dɛmɛ la saan o saan, ani u kɛra mɔgɔ kisɛmanw ye kokura. An be se ka mun lo kɛ walisa k’u caamanba wɛrɛw dɛmɛ ka kanuya ni jigidali sɔrɔ kokura, i n’a fɔ a daminɛ na? —Heb. 3:12-14.
15 Diinan mɔgɔkɔrɔw jɛkulu bena baro kɛ cogo min na u be se ka mɔgɔw dɛmɛ, minw sumana saan tɛmɛnenw kɔnɔ (Mat. 18:12-14). Sekeretɛri ka kan ka weleweledalaw ka kafolisɛbɛw sɛgɛsɛgɛ walisa ka sumalenw bɛɛ tɔgɔw ta. Diinan mɔgɔkɔrɔw ka kan ka jijaliba kɛ sagakulu marali baara la walisa ka dɛmɛ kɛ. Diinan mɔgɔkɔrɔ dɔ be se k’a ɲini ka taga bɔ weleweledala dɔ ye katugu a b’a lɔn koɲuman, wala jɛnɲɔgɔnya be yen u fila cɛ. N’o tɛ, dɛmɛ be se ka ɲini weleweledala wɛrɛw fɛ. Mɔgɔ minw ye kalan kɛ n’o sumalen ye, n’a sɔrɔ a bena diya u ye ka taga a jija, komi a mako be dɛmɛ la sisan. An ka jigiya ye ko mɔgɔ sumalen caaman bena wili k’a daminɛ ka Ala ka kuma waaju kokura . N’u ka koow dafara, wagati fisaman wɛrɛ tɛ ye k’o kɛ ni Hakilijigi seli wagati tɛ! N’i be kunnafoni wɛrɛw fɛ, barokun “Aw ka ɲiningaliw jaabiliw” filɛ An ka Masaya Cidenyabaara kɔnɔ, saan 2000, novanburukalo ta.
16 Yala dɔw ka koow dafara ka waajuli kɛ wa? Jehova b’a k’a mɔgɔw dugara ka taga, a kɛtɔ ka “siyaw bɛɛ ka nafolow” fara u kan (Agi. 2:7). Saan o saan, mɔgɔ waa caaman b’u ka koow dafa walisa ka kɛ weleweledalaw ye, minw ma batise fɔlɔ. U ye jɔn ye? Jehova Seerew ka deenw lo, nka Bibulu kalandenw fana lo. An be se k’a lɔn cogo juman na k’u ka koow dafara ka kɛ kibaro duman waajulikɛlaw ye?
17 Jehova Seerew ka deenw: Denmisɛn caaman b’u bangebaga bila sira soo ni soo kabini saan caaman. O bɛɛ n’a ta, u ma jati ban i ko weleweledalaw, minw ma batise fɔlɔ. Marisikalo ye wagati ɲuman ye u fɛ k’a daminɛ. Cogo juman na i be se k’a lɔn k’i ka deen ka koow dafara? Gafe Organisés pour bien remplir notre ministère, ɲɛɛ 100nan ko o be ye “ni deen jogo ka ɲi, n’a ŋaniya b’a la, ani see b’a ye k’a tɔgɔla lanaya kofɔ mɔgɔ ye, a kɛtɔ ka kibaro duman jɛnsɛn.” N’i b’a jati k’i deen ka koow dafara, a fɔ diinan mɔgɔkɔrɔ dɔ ye, min be waajuliko ɲɛnabɔbagaw jɛkulu kɔnɔ.
18 Bibulu kalanden minw ka koow dafara: Bibulu kalanden mana lɔnniya dɔ sɔrɔ, ani n’a be na lajɛnw na kabini wagati dɔ, a be se k’a laɲini ka kɛ Masaya waajulikɛla ye. N’i b’o ɲɔgɔn kalanden ka kalan kɛra, i ka miiri ɲiningali ninw na: Yala a be ɲɛtaga sɔrɔla ka kɛɲɛ n’a sanda n’a ka hakilidiya ye wa? Yala a y’a daminɛ k’a ka lanaya kofɔ mɔgɔw ye n’a ma wili a kama wa? Yala a be “jogo kura” donna a yɛrɛ la wa? (Kolos. 3:10). Yala a ka koow dafara ka kɛ weleweledala ye min ma batise fɔlɔ, i n’a fɔ a lakalila gafe Notre ministère ɲɛɛw 98-100nan kɔnɔ wa? N’o lo, i ka kan k’a fɔ kafo ka waajuliko ɲɛnabɔbagaw jɛkulu ye. O la, labɛn bena kɛ walisa diinan mɔgɔkɔrɔ fila ka ile ani kalanden kunbɛn. N’a ka koow dafara, o diinan mɔgɔkɔrɔw bena a fɔ a ye ko a be se k’a daminɛ k’a sendon cidenyabaara la bɛɛ ɲɛ na.
19 Awirili ni mɛkalo do? O kalo fila fana bena kɛ dan na kalow ye waajuli baaraba kama. Minw bena kɛ piyɔniyew kɔrɔsigiw ye marisikalo la, n’a sɔrɔ u caaman bena kɛ a ye awirili ani (wala) mɛkalo fana kɔnɔ. Awirili ni mɛkalo kɔnɔ, an bena zurunaliw La Tour de Garde ani Réveillez-vous ! lo kofɔ fɔlɔ mɔgɔw ye. O zurunaliw kalan be nɔɔ nafaman to u kalanbagaw kan dɛ! U sababu fɛ, an be farankan kabakoman sɔrɔla duniɲa bɛɛ kɔnɔ. Awirili ni mɛkalo kɔnɔ, jijaliba be na kɛ walisa k’o zurunaliw kofɔ mɔgɔ caamanba ye. I yɛrɛ labɛn sisan walisa k’i sendon o baara la a ɲɛɛ ma.
20 Komi waajulibaara bena caya, yala aw mako b’a la ka dɔ fara kafo ka zurunaliw hakɛ kan wa? Saan kuru bɛɛ kɔnɔ, an be La Tour de Garde ni Réveillez-vous ! kofɔ mɔgɔw ye sibiri loon, o min ye zurunaliw loon ye. Nka, komi mɔgɔ caaman bena kɛ piyɔniyew kɔrɔsigiw ye, ani an bɛɛ bena zurunaliw kofɔ kalo fila kɔnɔ, n’a sɔrɔ i mako b’a la ka dɔ fara i ka zurunaliw komandi hakɛ kan. N’o lo, hakɛ to k’a fɔ joona joona balimacɛ ye, min sigilen be zurunaliw baara kun na kafo kɔnɔ.
21 Mɔgɔ caaman y’u ka waleɲumanlɔn yira barokun nin koo la An ka Masaya Cidenyabaara kɔnɔ: “I bena mun lo fɔ periyodikiw yiratɔ.” Zurunaliw yiracogo minw kofɔra, yala i be tɔnɔ sɔrɔ u la, i kɛtɔ k’u ladege wa? Mun na i t’i ka gwakalan wagati dɔ ta k’o kuma yiracogow ladege lɔgɔkun o lɔgɔkun?
22 An k’an seko bɛɛ kɛ Hakilijigi seli wagati la: I n’a fɔ ciden Pol, an k’a yira Jehova la ko an b’a ka “nili fɛnba” waleɲuman lɔn kosɔbɛ. An k’o yira, an kɛtɔ k’an sendon ka dafa hakilimaya koow la, minw labɛnna hakilijigi seli wagati kama. O kɔrɔ ko: (1) ka taga Matigi ka surafana seli la, o min kɔrɔtalen be ka tɛmɛ koow bɛɛ kan saan kɔnɔ. A bena kɛ saan 2002, marisikalo tile 28nan, lamisalon. (2) Ka mɔgɔ sumalenw dɛmɛ u k’u ka “kanuya fɔlɔ” sɔrɔ kokura ( Jira. 2:4; Rom. 12:11). (3) K’an ka denmisɛnw ani Bibulu kalandenw dɛmɛ ka kɛ weleweledalaw ye minw ma batise fɔlɔ, n’o ka koow dafara. Ani (4) k’an sendon waajuli baara la n’an seko bɛɛ ye, n’a sɔrɔ an kɛtɔ ka kɛ piyɔniye kɔrɔsigi ye marisikalo la, ani o kɔfɛ. — 2 Tim. 4:5.
23 An be Jehova deli sɔbɛ la janko an bɛɛ k’an sendon ka dafa Masaya kibaro duman waajuli baara la Hakilijigi seli wagati la. O cogo la, Jehova be koo minw bɛɛ kɛ an ye, an bena an ka waleɲumanlɔn dunya yira u bɛɛ koo la.
[Box on page 6]
Ne tɔgɔla waajulibaara labɛnsira saan 2002 marisikalo kɔnɔ
Karilon Ntɛnɛlon Talatalon Arabalon Lamisalon Jumalon Sibirilon Zurunaliw loon Zurunaliw loon Zurunaliw loon Zurunaliw loon HAKILIJIGI SELI
Tileben kɔ
Zurunaliw loon
1 2
3 4 5 6 7 8 9
10111213141516
17181920212223
24252627282930
31
Yala i be se ka labɛn kɛ lɛri 50 kama walisa ka kɛ piyɔniye kɔrɔsigi ye marisikalo la wa?