An ka to ka Jehova ka koo cɛɲumanbaw lakali
1 Mɔgɔ si tɛ se ka suma n’an ka Alaba, Jehova ye! Dawuda y’a sɛbɛ ko: “Jehova, ne ka Ala, ile ye koo caaman kɛ. Ɔwɔ, i ka kabakow n’i ka miiriyaw, i ye minnu kɛ an ye. Mɔgɔ si tɛ se ka suma n’i ye.” (Zab. 40:5, NW). Jehova ka koo cɛɲumanba dɔw ye duniɲa danni ye, Masiya ka Masaya, kanuya kantigiman wale minw kɛra a ka jama kama, ani waajuli baara min be kɛra duniɲa bɛɛ kɔnɔ (Zab. 17:7, 8; 139:14; Dan. 2:44; Mat. 24:14). Komi an be Jehova kanu, ani an b’a ka walew bɛɛ waleɲuman lɔn, o b’an lasun an k’a kofɔ mɔgɔ wɛrɛw ye (Zab. 145:5-7). Marisi, awirili ani mɛkalo la, cogoya bena di an ma an k’o kɛ a ɲɛɛ ma.
2 I ko piyɔniye kɔrɔsigi: Yala i be se ka labɛn kɛ walisa i ka se ka lɛri 50 kɛ waajuli baaraba la o kalo kelen wala kalo dɔw kɔnɔ wa? I mana yɛlɛmani o yɛlɛmani kɛ i ka labɛnsira la o kama, o ka kan (Efes. 5:16). Balima caaman y’a kɔrɔsi ko piyɔniye kɔrɔsigi baara y’u dɛmɛ u k’u ka waajuli kɛcogo fisaya. Sodaw la, u degunnen tɛ, ani u be cogoya caaman sɔrɔ ka baara kɛ ni Bibulu ye. Komi u be wagati caaman kɛ waajuli la, a ka nɔgɔ u fɛ u ka makodon mɔgɔw dɛmɛ. Bibulukalan tun tɛ minw fɛ fɔlɔ la, u dɔw sera ka dɔ daminɛ tuma min na u ye piyɔniye kɔrɔsigi baara kɛ. Komi piyɔniye kɔrɔsigi baara b’a to an k’an yɛrɛw di walisa ka mɔgɔ wɛrɛw dɛmɛ, o ye ɲagali baara ye.—Kew. 20:35.
3 I kana teliya k’a fɔ ko ile ka koow cogoya t’a to i ka kɛ piyɔniye kɔrɔsigi ye. Salon, diinan mɔgɔkɔrɔ dɔ ye piyɔniye kɔrɔsigi baara kɛ, k’a masɔrɔ denmisɛn fila b’a bolo ani a be baloɲini baara la tuma bɛɛ. O balimacɛ y’a kɛ cogo di, sabu a bolo degunnen be? Komi a be baara la lɔgɔkun kɔnɔ, a ye labɛn kɛ walisa ka waajuli kɛ ka mɛɛn lɔgɔkun laban na: a tun b’a daminɛ samedi sɔgɔma 7h00 ka seereya di mɔgɔw ma sirada la. Kafoden caaman minw ka cogoya tun be ten fana, olu fana y’u sen don piyɔniye kɔrɔsigi baara la. U ye ɲɔgɔnw dɛmɛ ani u ye ɲɔgɔnw jagwɛlɛya. Kafo wɛrɛ kɔnɔ, saan 99 balimamuso dɔ y’a latigɛ ka piyɔniye baara kɛ mɛkalo la sabu a denmuso y’a ɲini a fɛ a ka jɛn n’ale ye o baara la. Kafoden wɛrɛw y’o balimamuso kɔrɔ dɛmɛ a ka taga daa ni daa la, ani a ka taga bibulukalanw kɛ: u y’a ka namara wotoro ɲɔndi a fɛ. A fana ye seereya di telefɔni fɛ, siradaw la, ani lɛtɛrɛw fɛ. A lanen b’a la k’o baara ma kɛ ale yɛrɛ fanga barika la, fɔɔ Jehova ka dɛmɛ sababu fɛ.—Esayi 40:29-31.
4 A ɲini ka labɛnsira dɔ sɛbɛ, min be bɛn koɲuman i ka koow cogoya ma. Labɛnsira modɛli minw dira sɛbɛ nin kɔnɔ, u be se k’i dɛmɛ. Yala i be baloɲini baara la tuma bɛɛ, wala i be taga lakɔliso wa? Labɛnsira min ɲɔgɔn basiginen be lɔgɔkun labanw kan, o lo be se ka bɛn i ma kosɔbɛ. Ni kɛnɛya bɛrɛ t’i la, ani fanga t’i la ka waajuli kɛ ka mɛɛn, a be se ka fisa i ma i ka labɛn kɛ walisa i ka se ka dɔɔni kɛ loon o loon. A fɔ mɔgɔ wɛrɛw ye k’i b’a fɛ ka kɛ piyɔniye kɔrɔsigi ye. N’a sɔrɔ olu fana bena a laɲini k’u sen don a la fana.
5 Denmisɛnw be se k’u sen don a la cogo min na: Jehova dusu ka di ni denmisɛnw b’a ka koo cɛɲumanbaw lakali (Zab. 71:17; Mat. 21:16). N’i ye kamalen wala sunguru ye, ani i batisera, n’a sɔrɔ i be se ka kɛ piyɔniye kɔrɔsigi ye kalo dɔ kɔnɔ kɔnze wagati la. N’i tɛ se ka kɛ piyɔniye kɔrɔsigi ye, yala i be se ka laɲinita tigitigi dɔw latigɛ i yɛrɛ ye walisa ka dɔ fara i ka waajuli baara kan ani k’a cogoya fisaya o kalow kɔnɔ wa? N’i b’i bangebagaw bila sira waajuli la, nka i ma kɛ fɔlɔ weleweledala ye min ma batise fɔlɔ, sisan lo ye wagati ɲuman ye i fɛ i k’a ɲini k’i ka koow dafa. I man kan k’a miiri ko waajibi lo i ka kɛ weleweledala ŋana ye n’i be ɲiningaliw jaabi Bibulu kɔnɔ, wala ko i ka kan ka lɔnniya sɔrɔ caaman i ko balikuw, minw batisera. Yala i be Bibulu ka kalan jɔnjɔnw faamu wa? Yala i sɔnna Bibulu ka sariyaw la tagamacogo ta fan fɛ wa? Yala i b’a fɛ mɔgɔw k’i lɔn i ko Jehova Seere dɔ wa? N’o lo, i ka kuma n’i bangebagaw ye o kan. U be se ka labɛn kɛ ka magwɛrɛ diinan mɔgɔkɔrɔw la n’i ye walisa k’a filɛ n’i ka koow dafara o fan fɛ.—A filɛ gafe Notre ministère kɔnɔ, a ɲɛɛw 98-100nan.
6 An ka mɔgɔ wɛrɛw dɛmɛ u ka waajuli kɛ: Bibulu kalandenw minw ye ɲɛtaga sɔrɔ u ka kalan na, n’a sɔrɔ u be se k’u ka koow dafa walisa ka kɛ weleweledalaw ye ani ka jɛn n’an ye kalo nataw ka baaraba la. Ni kalanden dɔ b’i fɛ, min be ɲɛtaga sɔrɔla a ka kalan na, dɛmɛ ɲini i ka kitabukalan kɔrɔsibaga fɛ, wala waajulibaara kɔrɔsibaga fɛ. U la kelen be se k’i bila sira ka taga o kalan kɛ walisa ka kalanden ka ɲɛtaga sɛgɛsɛgɛ k’a filɛ. Ni kalanden ka koow dafara ani a b’a fɛ ka kɛ weleweledala ye, diinan mɔgɔkɔrɔw ɲɛbila be se ka labɛn kɛ walisa diinan mɔgɔkɔrɔ fila ka ile ani kalanden kunbɛn. (A filɛ saan 1988, novanburukalo tile 15nan ka La Tour de Garde kɔnɔ, a ɲɛɛ 17nan.) Ni sira dira kalanden ma, a daminɛ kelen k’a dege waajuli kɛcogo la.
7 Kitabukalan kɔrɔsibagaw ka kan k’u janto jɛkuludenw na, sanko minw kɛra sumalenw wala basigibaliw ye waajuli la. U weele u ka na baara kɛ n’i ye waajuli la. N’u sumana kabini wagati jan, a ka fisa diinan mɔgɔkɔrɔ fila ka kuma n’u ye fɔlɔ walisa k’a filɛ n’u ka koow dafara. (A filɛ “Aw ka ɲiningaliw jaabiliw” kɔnɔ, saan 2000, novanburukalo ka An ka Masaya Cidenyabaara kɔnɔ.) Kafo bena kisɛya min kɛ baaraba la o kalow kɔnɔ, n’a sɔrɔ o bena u lasun u k’u sen don tugun waajuli baara la tuma o tuma.
8 I labɛn sisan baaraba kama: Diinan mɔgɔkɔrɔw, a’ y’a daminɛ sisan ka dusudiya don kafodenw na piyɔniye kɔrɔsigi baara kama. Aw ka lakalita ɲumanw fɛ ani aw ka ɲɛyirali ɲuman fɛ, aw be se ka caaman kɛ (1 Piɛre 5:3). Kafo kɔnɔ, piyɔniyew kɔrɔsigiw cayaliba tɛmɛnen tun ye juman ye? Yala dɔ be se ka fara o kan ɲinan wa? Kitabukalan kɔrɔsibagaw n’u kɔrɔsigiw ka kan ka cogoyaw ɲini ka jɛkuludenw bɛɛ jagwɛlɛya u ka dɔ fara u ka baara kan. Waajulibaara kɔrɔsibagaw ka kan ka lajɛn wɛrɛw labɛn waajuli kama. Labɛn minw kɛra o kama, a’ ye kɔn k’u kofɔ kafo ye. A’ ye aw janto ko cii dira weleweledala setigiw ma u ka koow ɲɛminɛ, ani ko waajuliko lajɛnw bena daminɛ ani u bena ban lɛri la. (A filɛ “Aw ka ɲiningaliw jaabiliw” kɔnɔ, saan 2001, sɛputanburukalo ka An ka Masaya Cidenyabaara kɔnɔ.) Waajulibaara kɔrɔsibaga ka kan ka labɛn kɛ fana walisa kiinw ni zurunaliw ni gafe caaman ka labila waajuli kama.
9 Salon, kafo dɔ ka diinan mɔgɔkɔrɔw kɔnna k’a daminɛ joona ka mɔgɔw jagwɛlɛya ni dusudiya ye u k’u sen don piyɔniye kɔrɔsigi baara la. Olu caaman yɛrɛ ye sɛbɛ dafa k’u sen don a la. U ye lajɛn wɛrɛw labɛn waajuli kama: kelen bilara waajuli kama siradaw la, sɔgɔma 5h30. Minw be bɔ lakɔli la, dɔ bilara olu kama tile fɛ, 3h00. Minw be bɔ baara la, sabanan bilara olu kama wula fɛ, 6h00. Ka fara o kan, lajɛn saba labɛnna waajuli kama samedi loon. Kafoden 66 y’a laminɛ k’u sen don piyɔniye kɔrɔsigi baara la awirili kalo la!
10 Gwakalan nata la, mun na i tɛ wagati dɔ labila walisa ka laɲinita nɔgɔman dɔw latigɛ kalo nataw kama? Ni bɛɛ sɔnna ka bolo di ɲɔgɔnw ma, ani ni labɛn ɲuman kɛra, n’a sɔrɔ denbaya mɔgɔ dɔw wala bɛɛ bena se ka kɛ piyɔniye kɔrɔsigiw ye. N’o tɛ se ka kɛ, laɲinita dɔw latigɛ walisa i ka se ka dɔ fara i ka waajuli baara hakɛ kan: i be se ka to waajuli la ka mɛɛn ka tɛmɛ fɔlɔ kan, wala i be se ka dɔ fara i ka waajuli kɛlonw kan. Aw ka denbaya kɔnɔ, a’ ye delili kɛ o koo la. I ka la a la ko Jehova bena aw ka jijaliw kɛli duga.—1 Yuh. 3:22.
11 Ala ka koo cɛɲumanba min ka boon n’a tɔɔw bɛɛ ye: Jehova ka kanuya yirali belebeleba kɛra a Dencɛ dilen ye kunmabɔsara la an kama (1 Yuh. 4:9, 10). Kunmabɔ saraka sababu la, sira dagalen sɔrɔla walisa ka hadamadenw kunmabɔ jurumu ni saya bolo (Rom. 3:23, 24). Yesu ka joli min bɔnna, o ye lahidu kura daga. Ani, sira dira hadamaden dafabaliw ma u ka kɛ Ala ka deenw ye walisa u ka jigiya sɔrɔ ka taga kuntigiya kɛ sankolo Masaya kɔnɔ (Jer. 31:31-34; Marka 14:24). Min kɔrɔtalen be ka tɛmɛ o kan, Yesu ka kanminɛli dafalen ye Jehova tɔgɔ saniya (Dut. 32:4; Ntal. 27:11). Dimansi min be bɛn awirilikalo tile 4nan ma tileben kɔ, Kirista saya Hakilijigi seli bena kɛ duniɲa kuru bɛɛ kɔnɔ.
12 Matigi ka surafana seli be Jehova ka koo cɛɲumanbaw tando. Jehova ye min kɛ a kɛtɔ ka kunmabɔsara di, kalan be dɔ fara o waleɲumanlɔn kan. Makodon mɔgɔ minw bena kɛ yen, u bena se ka Ala ka koo cɛɲumanba wɛrɛw lajɛ. U bena se ka Jehova ka jama ye a be kelenya ni kanuya kisɛman yirala i ko Jehova y’u kalan a la cogo min na (Efes. 4:16, 22-24; Yaku. 3:17, 18). Mɔgɔ mana na o koba la, a be se ka nɔɔ sɔbɛ to a tigi ka miiriyaw kan. O kama, an b’a fɛ mɔgɔ caamanba ka kɛ yen.—2 Kɔr. 5:14, 15.
13 An ka mɔgɔ wɛrɛw weele u ka na: An bena mɔgɔ minw weele ka na seli la, an k’a daminɛ k’an yɛrɛw labɛn kelen k’u tɔgɔw sɛbɛ. An ka kan k’an somɔgɔ dannabaliw, an sigiɲɔgɔnw, baarakɛɲɔgɔnw wala lakɔli filankuruw, Bibulu kalanden kɔrɔw ani kalanden kuraw, ani viziti kuraw tɔgɔw ta. Kitabukalan kɔrɔsibagaw ka kan ka weleweledala sumalenw tɔgɔw ta ka fara u ka sɛbɛ kan fana.
14 An ka baara kɛ ni Hakilijigi seli welelisɛbɛw ye. An ka seli lɛri n’a kɛyɔrɔ sɛbɛ mansi fɛ, wala an k’a sɛbɛ ka ɲɛ an bolo fɛ. Wala, welekan min be yen saan 2004, marisikalo tile 15nan ka La Tour de Garde kɔ kan, wala marisikalo tile 22nan ka Réveillez-vous ! kɔ kan, i be se ka baara kɛ n’o fana ye. Awirilikalo tile 4nan surunyatɔ, an ye minw tɔgɔw ta, an k’u hakili jigi: an yɛrɛw ka taga bɔ u ye, wala an ka telefɔni ci u fɛ.
15 Hakilijigi seli la: Hakilijigi seli loon suu fɛ, an k’a ɲini ka kɔn ka na joona. An ka mɔgɔ kuraw ladon, an kɛtɔ k’u bisimila ni dusudiya ye (Rom. 12:13). I ye mɔgɔ minw weele ka na, u koo be i yɛrɛ lo bolo. A yira u la k’u nali diyara i ye kosɔbɛ. I k’u yira kafoden wɛrɛw la. N’a sɔrɔ i be se k’u dɛmɛ ka sigiyɔrɔ sɔrɔ i gɛrɛ fɛ. Ni Bibulu wala dɔnkili gafe tɛ u dɔ fɛ, labɛn kɛ walisa a ka se ka filɛri kɛ n’ile ye wala mɔgɔ wɛrɛ ye. Seli bannen kɔ, i yɛrɛ labila walisa k’u ka ɲiningaliw jaabi. Ni dɔw siɲɛ fɔlɔ lo nana, u ɲininga n’u b’a fɛ ka dɔ fara u ka lɔnniya kan Ala ka Kuma n’a sagonata koo la. I ka Bibulukalan kofɔ u ye.
16 Minw nana seli la, an ka to k’u dɛmɛ: Minw nana Hakilijigi seli la, n’a sɔrɔ u mako bena kɛ dɛmɛ wɛrɛ la lɔgɔkun nataw la. U dɔw tun delila ka na lajɛnw na fɔlɔ, nka sisan, u be na siɲɛ kelen kelen dɔrɔn. Diinan mɔgɔkɔrɔw ka kan ka kɔrɔsili kɛ ko an ma ɲinɛ o ɲɔgɔnna mɔgɔw kɔ. U be se k’a ɲini k’a lɔn mun na u tɛ ɲɛtaga sɔrɔla tugun Alakow la. Ani, u be se k’u dɛmɛ u k’a faamu ko kɔrɔtɔ b’a la (1 Piɛre 4:7). A’ ye bɛɛ dɛmɛ u k’a faamu ko nafa b’a la u ka kolo Bibulu ka ladili ye ka lajɛn kɛ ni Ala ka jama ye tuma o tuma.—Heb. 10:24, 25.
17 Jehova ka koow cɛ ka ɲi kojugu, fɔɔ an yɛrɛ tɛ se k’u faamu ka dafa hali n’an be ɲɛnamaya la fɔɔ abada (Job 42:2, 3; Waaj. 3:11). O kama, a tandoli sababuw tɛ se ka fɔn an fɛ abada. Ɲinan ka Hakilijigi seli wagati la, an be se k’a yira ko an be Jehova ka koo cɛɲumanbaw waleɲuman lɔn n’an b’an jija kosɔbɛ ka dɔ fara an ka waajuli baara kan.
[Study Questions]
1. Jehova ka koo cɛɲumanba minw ka di i ye, u dɔw ye jumanw ye?
2. Piyɔniye kɔrɔsigi baara be an yɛrɛw nafa cogo di?
3. Dɔw sera ka piyɔniye kɔrɔsigi baara kɛ cogo di hali n’u ka koow cogoya tun ka gwɛlɛ?
4. N’an be labɛn kɛra piyɔniye kɔrɔsigi baara kama, an ka kan k’an janto koo jumanw la?
5. Denmisɛnw be se ka laɲinita jumanw latigɛ marisi, awirili ani mɛkalo kama?
6. Cogo juman na an be se ka Bibulu kalandenw dɛmɛ u ka kɛ kibaro duman weleweledalaw ye?
7. Weleweledala basigibaliw ni sumalenw be se ka dɛmɛ sɔrɔ cogo di?
8, 9. Diinan mɔgɔkɔrɔw be se ka mun kɛ walisa ka dusudiya don mɔgɔw la baaraba kama?
10. Cogo juman na denbayaw be se k’u labɛn ka dɔ fara u ka waajuli baara kan?
11. (a) Kirista ka saraka ye koo cɛɲumanba juman dafa? (b) Aw ka kafo bena Hakilijigi seli kɛ lɛri juman na ani yɔrɔ juman na?
12. Makodon mɔgɔw mana na Matigi ka surafana seli la, u be se ka nafa juman sɔrɔ a la?
13, 14. An ka kan ka jɔn lo weele ka na Hakilijigi seli la, ani cogo juman na?
15. An be se ka jatigiya sira tagama Hakilijigi seli suu fɛ cogo di?
16. Minw nana Hakilijigi seli la, an be se ka mun lo kɛ walisa k’u dɛmɛ u ka ɲɛtaga sɔrɔ Alakow la?
17. Mun na an ka kan ka to ka Jehova ka koo cɛɲumanbaw lakali?
[Chart on page 5]
Yala i be se ka kɛ piyɔniye kɔrɔsigi ye wa I kɛtɔ ka tɛmɛ labɛnsira ninw kelen fɛ
Marisi Ntɛ* Ta* Ar* La Ju Sa Di Lɛri mumɛ
Loon o loon 1 1 1 1 1 5 2 51
Tile fila fila 5 0 5 0 0 0 0 50
Samedi ni dimansi 0 0 0 0 0 8 5 52
Samedi, dimansi ani
tile fila wɛrɛw 0 0 2 0 2 6 2 50
Awirili Ntɛ Ta Ar La* Ju* Sa Di Lɛri mumɛ
Loon o loon 1 1 1 1 1 5 2 50
Tile fila fila 0 0 0 5 5 0 0 50
Samedi ni dimansi 0 0 0 0 0 8 5 52
Samedi, dimansi ani
tile fila wɛrɛw 0 0 2 0 2 6 2 50
Mɛ Ntɛ Ta Ar La Ju Sa* Di* Lɛri mumɛ
Loon o loon 1 1 1 1 1 4 2 51
Tile fila fila 5 0 0 0 0 5 0 50
Samedi ni dimansi 0 0 0 0 0 7 3 50
Samedi, dimansi ani
tile fila wɛrɛw 0 0 2 0 2 5 2 51
* looru kalo kɔnɔ