“Lamɛnni kɛ ka dɔ fara [i ka] lɔnniya kan”

¹ Ntalenw ka kitabu be hakilitigiya kofɔ i ko mɔgɔ min be welekan lase ko: “A’ ye aw tulo majɔ k’a masɔrɔ ne be kobaw fɔ, ne be ne da yɛlɛ ka aw kalan ko tilennenw na. Laadili ni ko ɲɛnabɔ cogo ɲuman ye ne ta ye. . . . A’ ye ne lamɛn. Minw be ne ka siraw tagama, olu ye dubadenw ye. K’a masɔrɔ mɔgɔ min be ne sɔrɔ, o tigi be ɲɛnamaya sɔrɔ, Matigi na sɔn o ma.” (Ntal. 8:6, 14, 32, 35). Kalan min be an makɔnɔna tile saba ka lajɛnba la, “Ala ka Kuma karamɔgɔw”, nin kumaw b’o lakali koɲuman.

² U ye jate minɛ kɛ duniɲa bɛɛ balimaw ka denbaya makow kan. Ani lajɛnba ka kalan labɛnna walisa k’o makow wasa. Hakilimaya kalan ni ladili nɔgɔman minw bena di, n’an y’u sira tagama, u bena an dɛmɛ ka hɛɛrɛ sɔrɔ. Jɛnɲɔgɔnya ɲuman minw be yen an ni Jehova cɛ, u bena an dɛmɛ k’u mara, ani ka to ɲɛnamaya banbali sira kan. Siga si t’a la, joo ɲuman b’an fɛ ka “lamɛnni kɛ ka dɔ fara [an ka] lɔnniya kan.” —Ntal. 1:5.

³ Sanni kalan ka daminɛ: Walisa ka nafa dafalen sɔrɔ kalan na, fɔɔ an ka kɛ an sigiyɔrɔ la, ani k’an hakili labɛn koɲuman sanni kalan ka daminɛ. O la, waajibi lo an k’an yɛrɛ labɛn koɲuman. A fisaman ye ka koo bɛɛ daminɛ joona. Lajɛn loon ɲɛ, kɔn ka taga i la suu fɛ. Kɔn ka kunu walisa i ka somɔgɔw bɛɛ ka wagati sɔrɔ ka labɛn ani ka fɛɛn dɔ sɔrɔ ka dumu. Kɔn ka se lajɛnba yɔrɔ la walisa ka sigiyɔrɔ sɔrɔ ani ka baara wɛrɛw kɛ sanni lajɛn ka daminɛ. Loon o loon, kalan bena daminɛ 9 h 30.

⁴ Komi o lajɛn kuun fɔlɔ ye ka Jehova tando “jama cɛma”, loon o loon ka lajɛn daminɛcogo ka kan ka nɔɔrɔ la an ka Ala kan (Zab. 26:12). O kama, u be an bɛɛ jija an ka sigiyɔrɔ ta sanni u ka datigɛli dɔnkili kofɔ. O kɛcogo bɛnnen be ni Bibulu ka ladili nin ye: “Koow bɛɛ ka kɛ cogo bɛnnen na ani cogo tilennen na.” (1 Kɔr. 14:40, NW). O kɔrɔ ko di an kelen kelen bɛɛ fɛ? Tuma min na dɔnkili fɔlɔw be lara, an mana kalan kuntigi sigilen ye tintin kan, an ka teliya k’an ka sigiyɔrɔ ta. O bena an dɛmɛ ka datigɛli dɔnkili la ni dusukun bɛɛ ye walisa ka tandoli lase Jehova ma. —Zab. 149:1.

⁵ Kalan kɛwagati la: Esdrasi “tun y’a dusukun bɛɛ don Matigi ka sariya kitabu kalanni la k’a siraw tagama.” (Esd. 7:10). Jehova be kalan di an ma. An be se k’an dusukun labɛn cogo di walisa k’o kalan sɔrɔ? Tuma min na i be kalankunw lajɛra sɛbɛ kan, i k’i yɛrɛ ɲininga: “Jehova b’a fɛ ka mun lo fɔ ne ye? Ne ni n ka denbaya bena baara kɛ ni o ladiliw ye ka tɔnɔ sɔrɔ o la cogo juman na?” (Esayi 30:21; Efes. 5:17). Lajɛnba kɛtɔ, to k’o ɲiningaliw bila i yɛrɛ ye. I b’a fɛ ka baara kɛ ni hakilinata minw ye, i k’olu sɛbɛ. Wagati ta ka baro kɛ u kan kalan bannen kɔ loon o loon. O bena i dɛmɛ k’o hakilinataw mara i hakili la ani k’u sira tagama.

⁶ A man nɔgɔ k’i hakili sigi yɔrɔ kelen lɛri caaman ka tugu ɲɔgɔnw kɔ. Mun lo be se k’an dɛmɛ k’an hakili bali a kana bɔ kalan kɔ? Ɲɛdenw ka filɛri barika be se k’an dɛmɛ. Tuma caaman na, an be an ɲɛɛw lɔ fɛɛn min kan, an hakili be sigi o lo kan (Mat. 6:22). O kama, ni koo dɔ wala mankan dɔ be kɛra an gɛrɛ fɛ, an k’an yɛrɛ bali k’an kuun yɛlɛma ka filɛri kɛ yen. I ɲɛɛw jɔlen to kalan kɛbaga kan. N’u be vɛrise dɔ kalanna, i ka tugu o kalan na i ka Bibulu kɔnɔ, ani i k’i ka Bibulu dayɛlɛnen to tuma min na lakalita be kɛra.

⁷ Kerecɛn kanuya bena an bali ka mɔgɔ wɛrɛw kɔnɔgwan kalan wagati la (1 Kɔr. 13:5). O wagati ye “makunni tuma” ye walisa ka lamɛnni kɛ (Waaj. 3:7). O kama, an k’an yɛrɛ bali ka baro kɛ ani ka munumunu gwansanw. An ka dɔ bɔ an ka ɲɛgɛn taga la, an kɛtɔ ka kɔn k’an yɛrɛ labɛn. Ni kɛnɛyako tɛ, an kana domuni kɛ sanni a wagati ma se fɔlɔ. Minw be na ni telefɔni cellulaire wala fototalan ye, u kana mɔgɔ wɛrɛw hakili bɔ kalan na n’o fɛɛnw ye. Bangebagaw ka kan ka labɛn kɛ walisa u ka somɔgɔw bɛɛ, hali kamalenw ni sunguruw, ka sigi ɲɔgɔn fɛ yɔrɔ kelen na. O cogo la, u ɲɛɛ bena kɛ u ka deenw kan. —Ntal. 29:15.

⁸ Kabini saan caaman, diinan mɔgɔkɔrɔ dɔ be taga lajɛnbaw la. Salon, a ye nin kɔrɔsi: “Ne fɛ, nin lajɛnba kɛra kabako ye koo wɛrɛ kama. Mɔgɔ caamanba tun be hakilinataw sɛbɛra, hali denmisɛnw yɛrɛ. A filɛri tun ka di. Kalan kɛbagaw tun mana vɛrisew kalanta kofɔ, mɔgɔw tun be u ka Bibuluw dayɛlɛ.” K’i tulo malɔ ka lamɛnni kɛ o cogo la, o ka kan ni tandoli ye tiɲɛn na. O tɛ an ni kafoden tɔɔw dɔrɔn nafa, nka, ka tɛmɛ fɛɛn bɛɛ kan, a be nɔɔrɔ la an karamɔgɔba Jehova Ala kan. —Esayi 30:20.