An ka lamɛnni kɛ ka lɔnniya sɔrɔ

1. Tile saba lajɛnba tuma na, mun na an ka kan k’an jija sɔbɛ la ka lamɛnni kɛ ani ka lɔnniya sɔrɔ?

¹ Yanni dɔɔni, saan 2013 ka tile saba lajɛnba bena daminɛ. Baaraba kɛra walisa ka kalanw labɛn. O kalanw ɲɛsinna balimaw makoyakow ma duniɲa kuru bɛɛ kɔnɔ. Yala i ye labɛn kɛ walisa i kana fɔn kalan si la tile saba bɛɛ kɔnɔ wa? Lajɛnbaw la, koo caaman be se k’a to i hakili siginin tɛ koɲuman. O kama, an ka kan k’an tulo malɔ sɔbɛ la ka kalanw lamɛn. Komi lajɛnba be mɛɛn ka tɛmɛ kafo ka lajɛnw kan, an ka kan k’a sɔminɛ k’an hakili sigi kosɔbɛ. Ka fara o kan, voyazi ni koo wɛrɛw be se ka na ni sɛgɛn ye. Mun lo bena an dɛmɛ an ka to ɲɛɛ na walisa ka lamɛnni kɛ ani ka lɔnniya sɔrɔ?—Dut. 31:12.

2. An be se k’an dusukun cogoya labɛn lajɛnba kalan kama cogo di?

² Ka kɔn lajɛnba loon ɲɛ: Lajɛnba porogramu ani kalanw bɛɛ barokunw be sɔrɔ an ka site web jw.org kan. U y’a yira yen fana vɛrise jɔnjɔn kelen wala fila minw ɲɛsinna kalan kelen kelen bɛɛ ma. N’i be se ka ɛntɛrɛnɛti sɔrɔ, kɔn k’o kunnafoniw lajɛ. O la, o bena i dɛmɛ i k’i dusukun cogoya labɛn kalan kama (Esd. 7:10). Gwa kɔnɔ batoli tuma na, i ka wagati ta ka lajɛnba nata kalan nege don i ka denbaya mɔgɔw la.

3. Mun lo bena an dɛmɛ an k’an tulo malɔ ka lamɛnni kɛ?

³ Kalan tuma na: N’a be se ka kɛ, i ka taga ɲɛgɛn na sanni lajɛnba ka daminɛ. I k’i ka telefɔni selilɛri faga. O la, i tɛna a ɲini ka sms ci mɔgɔw ma ani mɔgɔ wɛrɛ tɛna i weele wala ka sms ci i ma k’i hakili ɲagami kalan tuma na. N’i ka kan k’i ka telefɔni mɛnɛnin to, i k’a labɛn cogo dɔ la walisa a kana mɔgɔw hakili ɲagami ni dɔ ye i weele. N’i be baara kɛ ni ɛntɛrɛnɛti fɛɛn dɔ ye lajɛnba la, i n’a fɔ tablɛti, i k’a labɛn cogo dɔ la walisa a kana mɔgɔw hakili ɲagami. Kana to ka dumuni kɛ ani ka minni kɛ kalan tuma na (Waaj. 3:1). I ɲɛɛ jɔlen to kalankɛla kan. N’u be vɛrise dɔ kalanna, tugu o kalan kɔ i ka Bibulu kɔnɔ. Hakilinata jɔnjɔnw sɛbɛ ka surunya.

4. Bangebagaw be se k’u deenw dɛmɛ cogo di u ka lamɛnni kɛ ka lɔnniya sɔrɔ?

⁴ An b’a fɛ an deenw fana ka lamɛnni kɛ ka lɔnniya sɔrɔ. Ntalenw 29:15 b’a fɔ ko “denmisɛn bilalen a yɛrɛma, o bɛ a ba maloya.” O kama, a ka ɲi denbaya mɔgɔw ka sigi ɲɔgɔn fɛ. O la, bangebagaw be se k’u janto ko u deenw tɛ baro kɛra, u tɛ sms cira mɔgɔ ma, u tɛ yaala yaala, nka u ɲɛmalɔnin lo ka kalan lamɛn. N’a sɔrɔ deenw ka dɔgɔ kojugu ani u tɛ se ka kalan bɛɛ faamu. O bɛɛ n’a ta, bangebagaw be se k’u dɛmɛ u ka to ɲɛɛ na ani ka je.

5. Mun na nafa b’a la an ka segi lajɛnba ka kalanw kan? An be se k’o kɛ cogo di do?

⁵ Loon o loon kalan bannin kɔ: Kana to kɛnɛma ka mɛɛn. Taga la joona walisa ka lafiɲɛ ka ɲɛ. I ye kalan min mɛn lajɛnba la, n’i be segi o kan, i hakili bena to a la wagatijan kɔnɔ. O kama, loon o loon sufɛ, a ka ɲi e n’i ka denbaya mɔgɔw ka miniti damanin ta ka baro kɛ kalan koo la. N’i be taga ɛrɛsitoran na n’i teriw ye, i tun ye min sɛbɛ lajɛnba la, i ka taga n’o ye i bolo. Miiriya minw diyara i ye kosɔbɛ, i ka baro kɛ u la kelen wala fila kan n’i teriw ye. Lajɛnba bannin kɔ, n’i kɔsegira soo, e n’i somɔgɔw be se ka baro kɛ gwa kɔnɔ batoli tuma na k’a filɛ cogo min na aw be se ka kalan sira tagama. Aw ye gafe kura minw sɔrɔ lajɛnba la, aw be se fana ka wagati ta k’u yɔrɔ dɔw lajɛ lɔgɔkun o lɔgɔkun.

6. Ka kɛ tile saba lajɛnba la, o dɔrɔn be bɔri kɛ wa? A ɲɛfɔ.

⁶ Fɛti dumuni tɛ se k’i mako ɲɛ n’i ma a dumu ani n’a ma suman i kɔnɔ. O kelen lo ni Alako dumuni ye, an bena min sɔrɔ tile saba lajɛnba la. An k’a ɲini ka nafa bɛrɛbɛrɛ sɔrɔ o la. Cogo di do? An ka tile saba bɛɛ kɛ lajɛnba la, an k’an tulo malɔ ka kalanw bɛɛ lamɛn ani an k’u sira tagama.