“Ne be to kelen kan! Ne be to kelen kan! Ne be to kelen kan!”
1 Nin kumaw bɔra kerecɛn kantigiman dɔ daa la. Ale kisira tuma min na naziw ye mɔgɔ caaman halaki. A ka kumaw be Seere caaman ka miiriya yira: u dɔw sara, u dɔw be sii la. U tun sabatira u ka lanaya kan, naziw ka farinya bɛɛ n’a ta (Efes. 6:11, 13). U ka tariki ɲuman be jagwɛlɛya ni see sɔrɔli yira. O tariki lakalila kasɛti videwo dɔ kɔnɔ, min be dusukun lamaga. A kuun ko: Jehova Seerew ka sabatili naziw ka kɔrɔbɔli ɲɛ (La fermeté des Témoins de Jéhovah face à la persécution nazie.) An be kɔngeregasiyɔn mɔgɔw bɛɛ jija u k’a filɛ ani k’u ka miiriya n’u ka fɛtaw fɔ ɲɔgɔnw ye.
2 Ɲiningali ninw ka aw dɛmɛ: (1) Kuun juman na Jehova Seerew lɔra kelen kan naziw ɲɛ? (2a) Jɔn ni jɔn lo bilala ɲɔgɔn na fɔli dɔ kosɔn, ani mun kama? (2b) O koo ye nɔɔ juman to Seerew ka gwaw kan? (3) Seere hakɛ juman lo bilala kaso la? O yɔrɔ la, u tun be lɔn ka bɔ mɔgɔ tɔɔw la cogo di, ani Gɛstapo tun be u minɛ cogo di? (4) An balimaw tun t’a fɛ k’u ka hɔnrɔnya sara ni mun lo ye? (5a) Cogo juman na ani tuma juman na Jehova Seerew y’u kan bɔ ka Hitilɛri (Hitler) ka fanga farinyakow kɔrɔbɔ? (5b) O kama, Hitilɛri ye mun lo kɛ? (6) Bɛn min be Jehova Seerew ni ɲɔgɔnw cɛ, cogo juman na o ye olu ni mɔgɔ wɛrɛw kisi farikolo ni Alako ta fan fɛ? (7) Masaya dɔnkili juman lo sɛbɛra kaso dɔ kɔnɔ? (8) Cɛɛw, musow ni denmisɛn kantigiman jumanw lo ka ɲɛyiraliw be i lasu ka kantigiya mara Jehova ye, koow mana kɛ cogo o cogo? (A’ ye saan 1999 ka sanyɛlɛma gafe fana filɛ, a ɲɛɛ 144-7.) (9) Ile min ye Jehova Seere dɔ ye, nin videwo filɛnen kɔ, n’o ko i kana kɛ duniɲa ta ye, i be mun lo miiri o koo la?
3 Jehova Seerew ɲɛyirali ɲuman lakalila videwo fermeté kɔnɔ. O be se ka denmisɛnw dɛmɛ, hali minw tɛ Seerew ye, ka gwɛlɛya dɔw kunbɛn i n’a fɔ: mɔgɔ minw tɛ sɔn mɔgɔ wɛrɛw miiricogo ma, mɔgɔɲɔgɔn degun, ani dusukun kɔrɔbɔli. N’i ye cɛmancɛ walima sanfɛ lakɔli kalanden dɔ ye, yala ile sababu la, i ka karamɔgɔw be se ka baara kɛ ni kunnafoni ninw ye lakɔliso la wa? N’a sɔrɔ i be se ka videwo nin dɔ di u ma. I be se k’a kofɔ i ko tariki dɔ, min lɔnnen tɛ kosɔbɛ, walima documentaire min be kalan di tagamacogo kan.
4 Videwo fermeté ye baarakɛminan ɲuman ye. A b’a yira cogo min na Ala ka kalan be barika di an ma hakilimaya ta fan fɛ walisa k’an koo diya Ala ye n’an be nɔɔrɔ ka to tilennenya la (1 Kɔr. 16:13). Mɔgɔ minw be u mako don tiɲɛnko la, a yira u bɛɛ la.