Videwo, minw be seereya di mɔgɔ ma: U nɔɔ
1 “An ka dencɛ tun be kasɛti videwo filɛ sanni a ka se ka tagama fɔ ka na se bi ma. A b’a filɛ, k’a sekɔ k’a filɛ siɲɛ caaman. A ka ɲi koɲuman ka baarakɛminanw sɔrɔ minw b’an ka denmisɛnw jija ka Jehova kanu dɛ! O kerecɛn bangebaga tun be kasɛti juman lo lakalila? Min tɔgɔ ko Noé: Il marchait avec le vrai Dieu. Muso dɔ, min tɛ Seere ye, a ka deen y’o kasɛti nin filɛ mɔgɔ wɛrɛ ka soo. A ye dolari 90 kɛ bolomafara ye ka ci tɔnbolo ka biro la. Ani, a ye ɲiningali kɛ ni videwo wɛrɛ t’an fɛ, min ɲɛsinna denmisɛnw ma. Jehova Seerew ka ɔriganisasiyɔn be kasɛti videwo minw bɔ, u be nɔɔ barikaman to denmisɛnw fara mɔgɔkɔrɔbaw kan.
2 Denbaya kɔnɔ: Seere dɔw ka denbaya ye videwo La fermeté des Témoins de Jéhovah face à la persécution nazie filɛ. O kɔ, bamusoman y’a lakali ko: “Tile kuru bɛɛ kɔnɔ, ne tora ka miiri ko cogo juman na Jehova be se di mɔgɔ gwansanw ma ka koo kabakomanw muɲu! Ne kɛtɔ ka miiri o kan, o ye ne hakili jigi ko ne ka kunkow tɛ bɛrɛ ye. An kɛtɔ k’o videwo filɛ n’an deenw ye, o y’u dɛmɛ ka faamuya k’u mako b’a la k’u bolo la Jehova kan. An kɛtɔ ka baro kɛ a kan kɔfɛ, o y’an ka denmusow dɛmɛ u ka cogoya fisaman sɔrɔ ka se ka sabati n’u ye degunw ni kɔrɔbɔli kunbɛn.”
3 Lakɔli la: Seere kamalen dɔ ye videwo Fermeté yira a ka kalanso la i ko lakalita dɔ. Fɔlɔ, karamɔgɔ tun b’a fɔ ko Seerew koo man di ale ye. Videwo filɛnen kɔ, a y’a fɔ ko: “Ne tun be Jehova Seerew filɛ cogo min na, nin ye ne ka fɛtaw yɛlɛma pewu pewu u kan. Ne be lahidu ta ko n’u nana bɔ ne ye soo, ne bena u lamɛn ani ne bena a daminɛ ka Bibulu kalan n’u ye!” Mun lo y’a ka fɛtaw yɛlɛma an koo la? A ko o ye an ka “kanuya lakika ni an ka kantigiya” ye.
4 Cidenyabaara la: Balima-muso dɔ ye muso dɔ kunbɛn min sigasigara ka gafew ta hali n’a ye ɲiningaliw bila an koo la, ani an lannakow koo la. Balimamuso segira ka na ni videwo Les Témoins de Jéhovah : Un nom, une organisation ye. A y’a yira o muso n’a cɛɛ la. U fila bɛɛ kabakoyara kosɔbɛ, ani u sɔnna ka Bibulu kalan. Komi seereya ɲuman dira u ma, u y’a daminɛ k’u ka ɲɛnamaya kɛcogo kɛɲɛ ni Ala sago ye.
5 Yala i be baara fisaman kɛ n’an ka videwow ye wa?