Aw Ka Ɲiningaliw Jaabiliw

◼ Kunnafoni juman ka kan ka di waajulibaara lajɛnw kɔnɔ?

Waajulibaara lajɛn kuun ye k’an dɛmɛ an k’an hakili sigi baara kɛta kan, o min ye waajuli ye. O kama, o lajɛn ɲɛminɛbaga ka kan k’a yɛrɛ labɛn koɲuman walisa ka kunnafoniw di, minw gwɛnen be, u ka nɔgɔ, ani u be mɔgɔ jagwɛlɛya. Ni tile kalan (texte du jour) ɲɛsinna waajuli baara ma, a be se ka kalan, ani ka baro surun kɛ a kan. Cogo o cogo, o lajɛn kuun ka kan ka sin waajuli ma fɔlɔ. Minw bɛɛ bɔra waajuli baara kama, a ka kan k’u bɛɛ dɛmɛ ka labɛn kosɔbɛ walisa ka waajuli baara dafa o loon.—2 Tim. 4:5.

Baro be se ka kɛ An ka Masaya Cidenyabaara ka hakilinata nafaman dɔw kan walisa ka mɔgɔ bɛɛ ɲɛsin gafe yirata n’a yiracogo ma. Periyodikiw yira loon, ɲɛyirali be se ka kɛ ka basigi barokun nin kan: “I bena mun lo fɔ periyodikiw yiratɔ.” Gafe wɛrɛw kanpaɲi kɛtɔ, an be se ka gafe Comment raisonner ka ladon kuma kelen wala fila kɛɲɛnen yira ka gwɛ. Baro be se ka kɛ waajuli faan dɔ kan, i n’a fɔ: baara kɛcogo ni Bibulu ye sodaw la, baro tigɛbagaw laminɛ cogo, Bibulukalan kofɔcogo, wala makodon ladon cogo.

Waajuli baara lajɛnw man kan ka tɛmɛ miniti 10 wala 15 kan: ka jɛkuluw labɛn, ka waajuli kɛyɔrɔ yira u la, ani ka delili kɛ, o bɛɛ kuun be o wagati la. Jɛkulu jɛnsɛntɔ, bɛɛ ka kan k’a baarakɛɲɔgɔn ni baarakɛyɔrɔ lɔn, ani u ka kan ka taga joona joona. Walisa o lajɛn ka surunya, a kɔrɔtalen be bɛɛ ka na yen lɛri la. Waajulibaara lajɛn ka kan ka surunya n’a tugura kɔngeregasiyɔn ka lajɛn dɔ kɔ, i n’a fɔ La Tour de Garde kalan. Waajibi tɛ ka baro kɛ tile kalan kan, sabu Bibulu kalan ɲuman dɔ kɛra ka ban.

Waajulibaara lajɛn kelen kelen bɛɛ kama, a’ ye kɔn ka ci di balimacɛ batiselen dɔ ma a k’o lajɛn ɲɛminɛ. Ni balimacɛ si labilanen tɛ loon dɔ, diinan mɔgɔkɔrɔw ka kan ka balimamuso batiselen dɔ sigi o kama n’u mako be mɔgɔ dɔ la. K’a sigilen to, o balimamuso be se ka baro dɔ dabɔ tile kalan kan, wala hakilinata dɔw kan, minw ɲɛsinna waajuli baara ma. A ka ɲɛfɔliw ka kan ka surunya. A ka kan k’a kuun dabiri.

Waajulibaara lajɛnw ye labɛn ɲumanba ye minw b’an jagwɛlɛya ani k’an labɛn waajuli kama. Ɲɛminɛbaga mana a yɛrɛ labɛn koɲuman, bɛɛ be nafa fisaman sɔrɔ o la.