Waajulibaara lajɛnw
1. Mun na an b’an janto ka bɔ waajuli baara kama cogo labɛnnen na?
1 Yesu ye ɲɛyirali di an ma: a ye Masaya waajuli baara koo ɲɛnabɔ bɛrɛbɛrɛ ani cogo labɛnnen na. O cogo kelen na bi, Masaya waajuli baara min be kɛra duniɲa kuru bɛɛ kɔnɔ, o kalifara minw ma, olu b’a fɛ k’a koo ɲɛnabɔ i ko Yesu y’a kɛ cogo min na. Ka kɛɲɛ n’o cii dilen ye u ma, duniɲa kuru bɛɛ kɔnɔ kafow be waajulibaara lajɛnw kɛ walisa ka Masaya weleweledalaw labɛn jɛnkulu ni jɛnkulu waajuli baara kama.—Mat. 24:45-47; 25:21; Luka 10:1-7.
2. Waajulibaara lajɛnw kuun ye mun lo ye?
2 Labɛn ɲuman: Waajulibaara lajɛnw latigɛra walisa minw labɛnna ka bɔ waajuli kama, k’olu jija, ka ladili nafamanw di u ma ani k’u ɲɛminɛ. Baro be se ka kɛ tilera kalan kan dɔɔni n’a gwɛnen lo ko a ɲɛsinna waajuli baara koo ma. Tuma dɔw la, u be mɔgɔ hakili jigi An ka Masaya Cidenyabaara, gafe Comment raisonner wala gafe École du ministère ka hakilinata dɔw la walisa ka bɛɛ dɛmɛ waajuli baara kama o loon na. Gafe min ka kan ka yira mɔgɔw la, u fana be se k’ale yiracogo kɛ ka surunya. Sanni delili ka kɛ ka lajɛn kuncɛ, bɛɛ ka kan k’a lɔn a bena waajuli kɛ ni mɔgɔ min ye ani yɔrɔ min na. O lajɛn tɛ tɛmɛ miniti 15 kan. A banni kɔ dɔrɔn, bɛɛ ka kan ka waajulikɛyɔrɔ sira ta.
3. Jɔn lo be waajulibaara lajɛnw labɛnko ɲɛnabɔ?
3 O lajɛnw be labɛn cogo di? Waajuli-baara lajɛnw labɛnko ye waajulibaara kɔrɔsibaga lo ka kunkanbaara ye. Lɔgɔkun laban na, jɛnkulu kɔrɔsibagaw wala u ka kankɔrɔsigiw lo ka kan k’u ka jɛnkuludenw ɲɛminɛ waajuli baara la. Kɔrɔsibaga dɔw wala kɔrɔsigi ciden dɔw be se ka jɛnkuluw bila sira waajuli la lɔgɔkun kɔnɔ. Jɛnkulu kɔrɔsibagaw be u kaan bɔ waajulibaara kɔrɔsibaga ma walisa baara kɛtɔ soo ni soo wikɛni na, waajulikɛyɔrɔ kana dɛsɛ u ka jɛnkuluw fɛ. Minw be jɛnkuluw ɲɛminɛ waajuli la lɔgɔkun kɔnɔ, waajulibaara kɔrɔsibaga lo be olu ka koo labɛn.
4-6. (a) Waajulibaara lajɛnw kuun ye mun ye ka ɲɛsin kafo ka kiinw ma? (b) Kafo be se ka jatiminɛ kɛ mun lo kan walisa ka waajulibaara lajɛnw sigi sen kan?
4 O lajɛnw ka kan ka kɛ min ani tuma juman? Sanni ka kafodenw bɛɛ lajɛn yɔrɔ kelen na, tuma caaman na, a ka fisa k’o lajɛnw kɛ yɔrɔ bɛnnenw na kafo ka kiinw kɔnɔ i n’a fɔ mɔgɔ dɔw ka soo. O la, waajuli be se ka kɛ bɛrɛbɛrɛ kafo ka kiinw kɔnɔ. O lajɛnw be se ka kɛ Masaya Boonw kɔnɔ fana. Dimansilon, ni foroba kalan ani La Tour de garde kalan banna, wagati dɔɔni o kɔ, kafo caaman be waajulibaara lajɛn dɔ kɛ Masaya Boon kɔnɔ. N’o lo, a’ ye aw seko kɛ walisa waajulikɛyɔrɔ kana janya kojugu. O kama, kafo be se ka to k’a filɛ ni lajɛn kɛyɔrɔw bɛnnen lo hali bele walisa waajuli ka kɛ ka dafa kiinw bɛɛ kɔnɔ bɛrɛbɛrɛ.
5 Wagati juman ka fisa k’o lajɛnw kɛ, ani u ka kan ka kɛ siɲɛ joli lɔgɔkun kɔnɔ? O be bɔ kafo ka kiinw cogoya lo la. Ɲiningali nunu be se k’u dɛmɛ k’a latigɛ waajulibaara lajɛnw be se ka kɛ cogo fisaman na yɔrɔ min na ani wagati min na.
6 Kafo ka kan k’a janto kiin jumanw na ka tɛmɛ tɔɔw kan? A ka fisa ka taga waajuli kɛ soo ni soo tuma juman? Yala kafo ka kan ka wagati dɔ latigɛ waajuli kama soo ni soo wala viziti kuraw kama suu fɛ wa? Masaya weleweledalaw bɛɛ ka ŋaniya ye ka waajuli kɛ ka dafa u ka kiinw bɛɛ kɔnɔ walisa an fana ka se k’a fɔ i ko ciden Pol y’a fɔ cogo min na ko: “Kiin wɛrɛ tɛ ne fɛ waajuli ma kɛ min na.”—Rom. 15:23, NW.
7. Cii dira mɔgɔ min ma ka jɛnkulu ɲɛminɛ waajuli baara la, a ka baara ye mun lo ye?
7 Waajulibaara lajɛnw ɲɛminɛ cogo: Waajulibaara lajɛn ye Ala ka Mara labɛn dɔ ye. Cii dira mɔgɔ min ma k’o lajɛn ɲɛminɛ, a tigi ka kan k’a yɛrɛ labɛn koɲuman walisa k’a yira ko a be o labɛn bonya kosɔbɛ. O lajɛnw ka kan ka daminɛ lɛri la, ka kɛ ka surunya, miniti 10 ni 15 cɛ, ani ka ladili nafamanw di mɔgɔw ma. Lajɛn ɲɛminɛbaga ka kan ka kɛ ni waajulikɛyɔrɔ karti ye sanni lajɛn ka daminɛ. Waajulibaara lajɛn banni kɔ, waajibi tɛ ka kɔfɛmɔgɔw kɔnɔ. Nka, nafa b’a la ka cira dɔ to yen min be se k’u dɛmɛ ka jɛnkulu yɔrɔ lɔn. Lajɛn banni kɔ dɔrɔn, bɛɛ ka kan ka waajulikɛyɔrɔ sira ta. O lajɛn mana kɛ ka ɲɛ ani ka kunnafoni nafamanw di mɔgɔw ma, siga t’a la, bɛɛ bena ladili bɛnnen sɔrɔ k’a ka cidenya baara dafa o loon na.—Ntal. 11:14.
8. Faan jumanw fɛ minw be na waajulibaara lajɛnw na, u be se k’u bolo di lajɛn ɲɛminɛ-bagaw ma?
8 Ka taga waajulibaara lajɛnw na: A kɔrɔtalen lo kosɔbɛ an ka bolo di ɲɔgɔn ma ka koow kɛ (Heb. 13:17). Ni mɔgɔ dɔ mako be baarakɛɲɔgɔn na, jɛnkulu ɲɛminɛbaga bena a tigi dɛmɛ o la n’a be se ka kɛ. A ka ɲi weleweledala kolɔnbagaw ka kɛ o lajɛnw na walisa ka dɛmɛ lase weleweledala kuraw ma ani minw tɛ se waajuli la koɲuman. Minw be sɔn u k’olu jɛn ni mɔgɔ wɛrɛ ye ka waajuli kɛ tuma dɔw la, olu be se ka baara ɲuman caaman kɛ (Ntal. 27:17; Rom. 15:1, 2). Bɛɛ ka kan k’a jija kosɔbɛ ka kɛ lɛri la. N’an be bonya la o Alako labɛn kan ani n’an b’an janto an balimaw na, o bena an lasun ka yɛlɛmani bɛnnenw kɛ walisa ka kɛ lɛri la.—2 Kɔr. 6:3, 4; Fil. 2:4.
9. Cogo nafaman jumanw na piyɔniyew be se ka dɛmɛ don waajulibaara lajɛnw na?
9 Piyɔniyew ka dɛmɛ: Ni piyɔniyew be na waajulibaara lajɛn na, o be bɛɛ nafa ani ka bɛɛ jija. Tiɲɛn lo, piyɔniyew be ni kunkanbaara caaman ye. Ka fara bibulukalanw ni viziti kuraw kan, u ka kan ka denbayako ani baloɲini baarako ɲɛnabɔ loon o loon. O kama, u man kan k’a miiri ko waajibi lo u fɛ ka kɛ kafo ka waajulibaara lajɛnw bɛɛ la sanko n’o lajɛnw be kɛ loon o loon. Nka, n’a sɔrɔ u kɔni be se ka dɛmɛ don waajulibaara lajɛn dɔw la lɔgɔkun o lɔgɔkun. Faan dɔ fɛ, waajulibaara lajɛnw be sababu di kafodenw ma ka fɔrɔmasɔn sɔrɔ. Lɔnniya min be piyɔniyew fɛ Bibulu ni waajuli koo la, o be se ka tɔɔw dɛmɛ kosɔbɛ. Komi u be waajuli la tuma bɛɛ, o y’a to u be koo caaman lɔn waajuli koo la. O be se ka mɔgɔ wɛrɛw nafa. Ani komi u be waajuli kɛ ni kisɛya ye ani u ka teli ka kɛ waajulibaara lajɛnw na, o lo y’a to u ye ɲɛyirali ye tɔɔw fɛ. U be dɛmɛ min don o lajɛnw na, o ka di an ye kosɔbɛ.
10. Mun na a bɛnnen lo Masaya welewele-dalaw bɛɛ k’u jija sɔbɛ la ka dɛmɛ don o labɛnw na?
10 I ko Yesu n’a ka kalandenw tun b’a kɛ cogo min na, an ka Masaya waajuli baara fanba be kɛ soo ni soo waajuli sen fɛ. Waajulibaara lajɛnw kuun ye ka ɲɔgɔn jija ani ka waajuli kɛ bɛrɛbɛrɛ. Kibaro duman weleweledalaw bɛɛ ka kan k’u seko bɛɛ kɛ ka dɛmɛ don o Alako labɛnw na (Kɛw. 5:42; 20:20). An kelen-kelen bɛɛ k’an sɔbɛ don waajulibaara lajɛnw na. O la, an lanen b’a la ko Jehova bena an ka baara duga kosɔbɛ ani ko an bena an Kuntigi Yesu Krista dusu diya k’an to Ala ka Masaya kibaro duman waajuli la.—Mat. 25:34-40; 28:19, 20.