An be se ka waajulibaara lajɛnw kuun dafa cogo di?
1. Waajulibaara lajɛnw kuun ye mun lo ye?
1 Loon dɔ la, Yezu ye lajɛn dɔ kɛ n’a ka kalanden 70 ye ka sɔrɔ k’u ci waajuli la (Luka 10:1-11). Walisa k’u jija, a y’u hakili jigi ko u tɛna kɛ u kelen na, ani ko “forotigi” Jehova bena u ɲɛminɛ. A fana ye cikan dɔw di u ma walisa k’u degi waajuli kɛcogo la ani a y’u tilan “fila fila.” Bi, an be lajɛn minw kɛ ka sɔrɔ ka waajuli daminɛ, olu fana kuun ye k’an jija, k’an degi waajuli kɛcogo la ani k’an dɛmɛ ka koow kɛ cogo bɛnnin na.
2. Waajulibaara lajɛn ka kan ka mɛɛn miniti joli?
2 Waajulibaara lajɛn be mɛɛn miniti 10 ani miniti 15 cɛ. O wagati kɔnɔ, u be mɔgɔw tilan tilan, ka waajuli kɛyɔrɔ di u ma ani ka delili kɛ. Yɛlɛmani donna o koo la sisan. K’a ta awirilikalo ma, waajulibaara lajɛn bena to ka mɛɛn miniti 5 ani miniti 7 cɛ. N’a be tugu kafo ka lajɛn dɔ kɔ, a yɛrɛ ka kan ka surunya ka tɛmɛ o kan sabu mɔgɔw ye Bibulu ka jijali kuma dɔw mɛn ka ban. Ni waajulibaara lajɛnw be kɛ ka surunya, o b’a to bɛɛ ka wagati caaman sɔrɔ ka waajuli kɛ. Ka fara o kan, ni piyɔniyew wala weleweledalaw tun ye waajuli daminɛ ka kɔn lajɛn ɲɛ, u bena a lalɔ dɔɔni dɔrɔn le.
3. Waajulibaara lajɛnw be se ka labɛn cogo di walisa u ka weleweledalaw nafa bɛrɛbɛrɛ?
3 Waajulibaara lajɛnw ka kan ka labɛn cogo dɔ la walisa ka weleweledalaw nafa bɛrɛbɛrɛ. Kafo caaman kɔnɔ, a ka fisa jɛnkuluw ka lajɛn dan na dan na sanni ka lajɛn yɔrɔ kelen na. O la, n’a sɔrɔ a tɛna gwɛlɛya balimaw fɛ ka taga waajulibaara lajɛn na ani ka se kiin kɔnɔ. Ka fara o kan, jɛnkulu kɔrɔsibaga bena se k’a ka jɛnkulu mɔgɔw tilan tilan joona joona ani k’a mako don u la kosɔbɛ. Diinan mɔgɔkɔrɔw be se k’u janto kafo ka koow cogoya la ani k’a latigɛ min ka fisa kafo ma. Yanni delili surun dɔ be kɛ ka lajɛn kuncɛ, bɛɛ ka ɲi k’a lɔn a bena baara kɛ ni mɔgɔ min ye ani yɔrɔ min na.
4. Mun na an man kan k’a jati ko waajulibaara lajɛnw nafa ka dɔgɔ ni kafo ka lajɛn tɔɔw ye?
4 U nafa man dɔgɔ ni kafo ka lajɛn tɔɔw ye: Minw be bɔ ka taga waajuli kɛ, waajulibaara lajɛnw latigɛra olu lo kosɔn. O kama, kafo kuru bɛɛ man teli ka na o lajɛnw na. Nka, o kɔrɔ tɛ k’o lajɛnw tɛ jati wala k’u nafa ka dɔgɔ ni kafo ka lajɛn tɔɔw ye. Waajulibaara lajɛnw ye Jehova ka labɛn dɔ ye i n’a fɔ an ka lajɛn tɔɔw bɛɛ. O labɛn sababu fɛ, an be ɲɔgɔn jija kanuya ni kɛwale ɲumanw la (Eburuw 10:24, 25). O kama, o lajɛn ɲɛminɛbaga ka kan k’a yɛrɛ labɛn ka ɲɛ walisa baro min bena kɛ, o ka bonya la Jehova kan ani ka weleweledalaw nafa. Minw be bɔ waajuli kama, u ka kan k’u jija ka kɛ o lajɛn na n’u be se.
An man kan k’a miiri ko waajulibaara lajɛnw tɛ jati wala k’u nafa ka dɔgɔ ni kafo ka lajɛn tɔɔw ye
5. a) Waajulibaara kɔrɔsibaga ka kan ka mun lo kɛ walisa ka waajulibaara lajɛnw labɛn? b) Balimamuso ka kan ka waajulibaara lajɛn ɲɛminɛ cogo di?
5 O lajɛn labɛn cogo: Mɔgɔ tɛ se k’a yɛrɛ labɛn koɲuman ka kalan di lajɛn na ni cii ma kɔn ka di a tigi ma. O kelen lo ni waajulibaara lajɛnw ye. Tuma dɔw la, an be ɲɔgɔn lajɛn an ka waajuli jɛnkuluw kɔnɔ dan na dan na. O la, jɛnkulu kɔrɔsibagaw wala u kankɔrɔsigiw lo be waajulibaara lajɛn ɲɛminɛ. Nka ni kafo kuru bɛɛ bena lajɛn waajuli kama do? O la, waajulibaara kɔrɔsibaga be kɔn ka mɔgɔ dɔ sugandi walisa ka lajɛn ɲɛminɛ. Waajulibaara kɔrɔsibaga dɔw be porogramu kɛ k’a yira mɔgɔ minw bena waajulibaara lajɛnw ɲɛminɛ. U b’o porogramu di ɲɛminɛbagaw bɛɛ ma ani u be kelen bila kunnafoni tablo kan. O porogramu kɛtɔ, waajuli baara kɔrɔsibaga ka kan ka hakili sɔrɔ. A ka ɲi k’a to a hakili la ko walisa o lajɛnw ka mɔgɔw nafa, fɔɔ u ɲɛminɛbagaw ka se mɔgɔw kalancogo la ani labɛnw kɛcogo la. A be se ka kɛ ko diinan mɔgɔkɔrɔ, kɔrɔsigi ciden wala balimacɛ setigi min batisera, u si tɛ yen walisa ka lajɛn ɲɛminɛ loon dɔw la. O la, waajulibaara kɔrɔsibaga ka kan ka cii di balimamuso setigi dɔ ma a ka lajɛn ɲɛminɛ.—Barokun nin lajɛ: “Ni balimamuso dɔ lo ka ɲi k’o lajɛn ɲɛminɛ.”
6. Cii dira ɲɛminɛbaga min ma, mun na a kɔrɔtanin lo a k’a yɛrɛ labɛn ka ɲɛ?
6 Ni cii dira an ma ko an ka kalan wala koo dɔ kɛ lakɔli la wala waajuliko lajɛn na, an b’an sɔbɛ don a la ani an b’an yɛrɛ labɛn ka ɲɛ. Minw b’a to tuma min na u be tagara lajɛn na, u be sɔrɔ k’a filɛ u bena min fɔ, u man ca. O kelen lo fana ni cii dira an ma ko an ka waajulibaara lajɛn ɲɛminɛ. Dɔ bena bɔ o lajɛn wagati la sisan. O kama, a kɔrɔtanin lo kosɔbɛ a ɲɛminɛbagaw k’u yɛrɛ labɛn koɲuman walisa o lajɛn ka balimaw nafa ani ka ban lɛri la. Ka labɛn ɲuman kɛ, o fana kɔrɔ ko ka kɔn ka kɛ ni waajuli kɛyɔrɔ karti ye.
7. Ɲɛminɛbaga be se ka baro kɛ koo jumanw ɲɔgɔn kan?—Koorilen lajɛ ɲɛɛ 6nan kan.
7 Baro be se ka kɛ mun lo kan? Koow cogoya tɛ kelen ye yɔrɔ bɛɛ. O kama, jɔncɛ kantigiman ma pilan dɔ di waajulibaara lajɛn kelen kelen bɛɛ kama. Ladili dɔw be sɔrɔ koorilen nin kɔnɔ: “Waajulibaara lajɛn na, aw be se ka baro kɛ koo nunu dɔ kan.” Tuma caaman na, o lajɛn ka ɲi ka kɛ baro kɛcogo la. Tuma kelen kelen, aw be se ka ɲɛyirali dɔ kɛ min labɛnna ka ɲɛ. Aw be se fana ka baro kɛ jw.org ka videwo dɔ kan min ɲɛsinna waajuliko ma. Waajulibaara lajɛn labɛntɔ, a ɲɛminɛbaga ka kan k’a filɛ hakilinata minw bena weleweledalaw jija ani k’u dɛmɛ waajuli la o loon na.
Waajulibaara lajɛn labɛntɔ, a ɲɛminɛbaga ka kan k’a filɛ hakilinata minw bena weleweledalaw jija ani k’u dɛmɛ waajuli la o loon na
8. Samedi ani dimansi loonw na, nafa b’a la kosɔbɛ ka baro kɛ mun ni mun lo kan waajulibaara lajɛnw na?
8 Ɲɛyirali fɛ, an fanba ka teli ka zurunaliw lo yira mɔgɔw la samedilonw na. Minw be waajuli kɛ o loonw na, u caaman tɛ bɔ waajuli kama lɔgɔkun kɔnɔ. O lo kosɔn, u tun ye zurunaliw yiracogo min degi gwa kɔnɔ batoli tuma na, a man nɔgɔ u dɔw fɛ k’u hakili to o la. O kama, yiracogo modɛli minw be An ka Masaya Cidenyabaara ɲɛɛ laban kan, nafa b’a la ɲɛminɛbaga ka segi u la kelen kan. Kɛcogo wɛrɛ ye ka baro kɛ k’a yira cogo min na an be se ka zurunaliw yiracogo basigi kiin kɔnɔ kibaro wala koo wɛrɛ kan. Ɲɛminɛbaga be se fana ka baro kɛ k’a yira cogo min an be se ka viziti kura jusigi n’an lamɛnbaga sɔnna zurunaliw la. An be zurunali minw yirala mɔgɔw la, ni dɔw delila u yiracogo la, ɲɛminɛbaga be se k’a ɲini u fɛ u k’u ka miiriyaw fɔ dɔɔni wala u ka wale diiman dɔw lakali. Dimansilonw na, ɲɛminɛbaga be se k’o ɲɔgɔn kɛ ni gafe wɛrɛw ye an be minw yirala mɔgɔw la o kalo la. An be se ka kalankɛ gafe nunu yira mɔgɔw la wagati bɛɛ: Kibaro diiman, Mɛnni kɛ Ala fɛ ani Bibulu ka kalan. O kama, ɲɛminɛbaga be se ka baro kɛ dɔɔni o gafew la kelen yiracogo kan.
9. Kanpaɲi tuma na wikɛni na, ɲɛminɛbaga be se ka baro kɛ mun lo kan?
9 Ni kafo be kanpaɲi dɔ la wikɛni na, ɲɛminɛbaga be se k’a yira cogo min na an be se ka welelisɛbɛw wala sɛbɛnin fara zurunaliw kan k’u di mɔgɔw ma. A be se fana k’a yira an be se ka min kɛ ni mɔgɔ dɔ y’a mako don. Kɛcogo wɛrɛ ye ka wale dɔw lakali k’a yira ko nafa b’o kanpaɲi na.
10, 11. Mun na a kɔrɔtanin lo weleweledalaw k’u yɛrɛ labɛn walisa waajulibaara lajɛn ka bɛɛ nafa?
10 Weleweledalaw ka kan ka min kɛ: Olu fana ka kan k’u ninyɔrɔ kɛ walisa o lajɛn ka bɛɛ nafa. U ka ɲi ka kɔn k’u yɛrɛ labɛn. U be se k’o kɛ gwa kɔnɔ batoli tuma na. O la, u bena se ka miiriya dɔw tilan ni tɔɔw ye. K’i yɛrɛ labɛn koɲuman, o fana kɔrɔ ko ka kɛ ni zurunaliw ni gafew ye i kun yanni i ka taga waajulibaara lajɛn na. O la, lajɛn banni kɔ, bɛɛ bena sin ka taga waajuli daminɛ.
11 A kɔrɔtanin lo fana an k’a ɲini ka se waajulibaara lajɛn na miniti damanin sanni o lajɛn ka daminɛ. Tiɲɛn lo ko an be banba ka kɛ lɛri la kafo ka lajɛnw bɛɛ la. Nka, n’an be na kɔfɛ waajulibaara lajɛn na, o be se ka koow ɲagami. Cogo di do? Balimacɛ min be lajɛn ɲɛminɛ, ale b’a janto koo dɔw la ka sɔrɔ ka mɔgɔw tilan tilan. Ni weleweledalaw man ca, a be se k’a latigɛ k’u ci kiin dɔ kɔnɔ min tɔɔ man bon kojugu. Ni weleweledala dɔw be sen na ani waajulikɛyɔrɔ ka jan, ɲɛminɛbaga be se k’olu bila ni balima wɛrɛw ye bolifɛnw be minw fɛ. Ni farati caaman b’o kiin kɔnɔ, a be se k’a ɲini balimacɛ dɔw fɛ u ka waajuli kɛ ni balimamuso dɔw ye wala u ka waajuli kɛ u gɛrɛfɛ. Farikolo dɛsɛ be weleweledala minw kan do? Ɲɛminɛbaga be se k’a ɲini olu fɛ u ka waajuli kɛ yɔrɔ min na panti wala dingɛnw tɛ sira kan ani ɛsikaliye caaman tɛ yen bondaw la. A be se ka weleweledala kuraw bila ni balima kolɔnbagaw ye. Nka ni dɔw nana kɔfɛ, labɛn min tun kɛra ka ban, fɔɔ o ka yɛlɛma walisa ka kɔfɛmɔgɔw niin don a la. Ayiwa, koo bɛrɛ dɔ be se k’an bila kɔfɛ. Nka, n’an delinanko lo ka na kɔfɛ, an ka ɲi k’an yɛrɛ sɛgɛsɛgɛ: Yala an b’a miiri ko nafa bɛrɛ tɛ waajulibaara lajɛnw na wa? Yala an ma kɔn k’an yɛrɛ labɛn wa?
12. N’i be deli k’i tɔgɔla labɛnw kɛ waajuli kama, i be se ka mun lo kɛ?
12 Minw be na waajuli baara lajɛn na, olu be se k’u tɔgɔla labɛnw kɛ ka kɔn lajɛn ɲɛ wala u be se k’a to ɲɛminɛbaga k’u bila ni mɔgɔ dɔ ye. N’i be deli k’i tɔgɔla labɛnw kɛ, i be se k’i “ka kanuya bonya” i kɛtɔ ka baara kɛ ni weleweledala wɛrɛw ye fana. Kana dan i teriw dama ma tuma o tuma (2 Kor. 6:11-13, Bible senuma). Tuma kelen kelen, i k’a ɲini ka waajuli kɛ ni weleweledala kura dɔ ye walisa k’a dɛmɛ a k’a ka kalan kɛcogo fisaya (1 Kor. 10:24; 1 Tim. 4:13, 15). I ka lamɛnni kɛ koɲuman n’u be cikan dɔ dira i ma, i n’a fɔ i ka ɲi ka waajuli daminɛ yɔrɔ min na. U mana lajɛn kuncɛ ka ban, i kana a ɲini ka koow labɛncogo yɛlɛma. I ka teliya ka waajuli kɛyɔrɔ sira minɛ.
13. Ni bɛɛ be waajulibaara lajɛnw ta sɔbɛ la, u bena an nafa cogo di?
13 Yezu y’a ka kalanden 70 minw tilan tilan walisa u ka taga waajuli kɛ, u “segira ni nisɔndiya ye” (Luka 10:17). Yezu ye lajɛn min kɛ n’u ye sanni u ka waajuli daminɛ, siga t’a la, o lajɛn y’u dɛmɛ u sera ka waajuli kɛ bɛrɛbɛrɛ. Waajulibaara lajɛnw be se k’an dɛmɛ o cogo kelen na bi. Minw be na o lajɛnw na, n’u bɛɛ b’u ta sɔbɛ la, o lajɛnw bena an jija, k’an degi waajuli kɛcogo la ani k’an dɛmɛ ka koow kɛ cogo bɛnnin na. O la, an bena se ka seereya kɛ “siyaw bɛɛ” ye.—Mat. 24:14, Bible senuma.