An ka nafa bɛrɛbɛrɛ sɔrɔ waajulibaara lajɛnw na

¹ Waajulibaara lajɛn ɲumanw be mɔgɔw jija haali! Ani, u be ladili nafamanw di an ma sanni an ka taga cidenya baara kɛ. U be cogoya di an ma an ka jɛn ni jɛnkulu ye ka seereya kɛ. O la, an be se ka baara kɛ ɲɔgɔn fɛ ni dɔw ye walisa ka ɲɔgɔn dɛmɛ ani ka ɲɔgɔn degi baara kɛcogo la (Ntal. 27:17; Waaj. 4:9, 10). An be se ka mun lo kɛ walisa ka nafa bɛrɛbɛrɛ sɔrɔ o lajɛnw na?

² O lajɛn ɲɛminɛbaga: Kunnafoni tigitigi si ma sɛbɛ ka bila o lajɛnw kama. O kama, i ka ɲi k’i yɛrɛ labɛn koɲuman n’ile lo bena o lajɛn ɲɛminɛ. I kana a ɲini ka sin ka tilera kalan lajɛ ni jɛnkulu ye tuma o tuma hali ni aw be se ka baro kɛ a kɔnɔnakow kan n’u ɲɛsinna cidenya baara ma. I ka miiri k’a filɛ i be se ka dɛmɛ nafaman min lase weleweledalaw ma o loon na. Ɲɛyirali fɛ, aw be se ka baro kɛ gafe yiracogo dɔ kan, wala k’o yiracogo ladegi yɛrɛ. I be se k’a latigɛ ka miiriya dɔ lajɛ ni jɛnkulu ye gafew Comment raisonner wala École du ministère kɔnɔ. A fana be se ka kɛ waajuliko lajɛn tɛmɛnen dɔ ka miiriya ye. Wagati wɛrɛw la, i be ka kiinw kɔnɔ sɔsɔliko dɔ ɲɛnabɔcogo yira. I fana be se ka baro kɛ ka makodon mɔgɔw dɛmɛcogo yira ani ka bibulukalanw daminɛcogo yira, ni mɔgɔ caaman kɔni b’a fɛ ka taga viziti kuraw kɛ. I mana a latigɛ ka baro kɛ koo o koo kan, i k’o kɛ ka mɔgɔw jija ni dusudiya ye.

³ A’ ye lajɛn daminɛ lɛri la hali ni aw y’a lɔn ko dɔw bena na kɔfɛ. I kɛtɔ ka mɔgɔw tilan-tilan, i ka hakili sɔrɔ. Minw mako be yɔrɔ dɔ la ka taga waajuli kɛ, i k’o yira u la. Lajɛn man kan ka mɛɛn ka tɛmɛ miniti 10 wala 15 kan. A ka kan ka surunya tugun n’a be tugu kafo ka lajɛn dɔ kɔ. Sanni i ka lajɛn kuncɛ, bɛɛ ka kan k’a ka baarakɛɲɔgɔn lɔn ani ka waajuli kɛyɔrɔ lɔn. Lajɛn ka kan ka laban ni delili ye.

⁴ Aw be se ka dɛmɛ kɛ: An b’a yira ko an be Jehova bonya ani ko an b’an janto tɔɔw la an kɛtɔ ka na lɛri la i n’a fɔ an b’a kɛ kafo ka lajɛnw na cogo min na. A’ ye aw daa don baro la. I be se k’a to lajɛn ɲɛminɛbaga k’i bila i ka baara kɛ ni mɔgɔ dɔ ye. I fana be se k’i tɔgɔla labɛn kɛ ka kɔn lajɛn ɲɛ. Ni a ka fisa i ma k’i tɔgɔla labɛn kɛ, i k’i jija k’i “ka kanuya bonya” i kɛtɔ ka baara kɛ ni weleweledala wɛrɛw ye fana: kana a dan i teriw dama ma tuma o tuma (2 Kɔr. 6:11-13). U mana lajɛn kuncɛ ka ban, i kana a ɲini ka koow labɛncogo yɛlɛma. Ani, i teliya ka waajuli sira ta.

⁵ Waajulibaara lajɛn kuun ye kelen ye ni kafo ka lajɛnw ta ye. U bɛɛ labɛnna walisa an “ka an janto ɲɔgɔn na walisa ka ɲɔgɔn jija kanuya ni kɛwale ɲumanw kɛli la.” (Heb. 10:24, 25). N’an b’an jija ka nafa sɔrɔ o lajɛnw na, an bena dɛmɛ sɔrɔ k’an ka cidenya baara dafa: o do ye baara ɲuman ye dɛ!

[Study Questions]

1. Waajulibaara lajɛnw be se k’an dɛmɛ cogo di?

2. Lajɛn ɲɛminɛbaga be se ka koo jumanw lajɛ?

3. Lajɛn ka kan ka mɛɛn ka se wagati juman ma? Ani, mun lo ka kan ka kɛ o wagati la?

4. Mun lo bena bɛɛ dɛmɛ ka nafa bɛrɛbɛrɛ sɔrɔ waajulibaara lajɛnw na?

5. Waajulibaara lajɛnw kuun ye mun ye?