U kanbɛnnen, Ala ka kalan sababu fɛ

—Balimaya lakika yirali

Loon dɔ, sirikɔnsikiripsiyɔn kɔrɔsibaga dɔ tagara muso dɔ ka Bibulukalan kɛ. O muso tun tɛ na fɔlɔ kɔngeregasiyɔn ka lajɛnw na. A ye muso weele a ka kasɛti videwo nin filɛ: U kanbɛnnen, Ala ka kalan sababu fɛ (Unis grâce à l’enseignement divin). O lɔgɔkun kelen bɛɛ, muso tagara lajɛn na, ani a ko a diyara ale ye ka na yen. Mun na o kasɛti ye nɔɔ to a kan joona ten? A ye an ka balimaya nafamanba ye. O y’a kabakoya, sabu duniɲa nin falen be farinyakow ni kɔniya la.—Yuh. 13:35.

Aw ye o kasɛti filɛ walisa k’a ye ani ka bɔ a kalama ko hɛɛrɛ ni kanuya be yen Jehova Seerew ni ɲɔgɔn cɛ dugukolo bɛɛ kan. O kɔ, a’ ye miiri ɲiningali ninw kan:

(1) Mun na “Ala ka kalan” tun ye kalankun kɛɲɛnen ye saan 1993-1994 ka lajɛnbaw kama?—Mise 4:2.

(2) Bibulu ka tiɲɛn kalan ye mun lo kɛ denbaya dɔw la? Ani ile ta kan?

(3) Mun na a kɔrɔtalen be Jehova ka an kalan?—Zab. 143:10.

(4) Ka lajɛnbaw labɛn jamana caaman kama, gwɛlɛya sifa jumanw be se ka sɔrɔ o la?

(5) Ile tagara lajɛnba minw na, cogo juman na i y’a ye ko Zaburuw 133:1 ani Matiyu 5:3 dafara?

(6) Ala ka kalan be nɔɔ barikaman min to mɔgɔ kan, o yirala cogo di kɛnɛ kan?—Jira. 7:9.

(7) Mɔgɔ caamanba ka batɛmu min ɲɔgɔn ma deli ka kɛ kerecɛn lakikaw fɛ, o ye juman ye?

(8) Mise, Piɛre ani Yesu ka kuma jumanw be dafara Jehova Seerew cɛ?

(9) Mun lo b’a yira aw la ko hadamaden denbaya hɛɛrɛman kanbɛnnen tɛ siko gwansan ye?

(10) I bena kasɛti nin yira jɔn lo la? Ani mun na?

kasɛti nin filɛli kɔ, balimamuso dɔ y’a kɔnɔnakow kuncɛ koɲuman ten: “Kasɛti nin bena ne dɛmɛ ka miiri kosɔbɛ kerecɛn balima caamanba la, minw b’u jijara nin wagati nin na ka baara kɛ Jehova ye kantigiya la dugukolo bɛɛ kan... An ka balimaya kelenya nafa ka bon dɛ!”—Efes. 4:3.