Baarakɛminan kura b’an bolo ka kalanw daminɛ!

¹ Eta Zini, katoliki muso dɔ tun ka kisɛ a ka diinan kɔnɔ. A tun b’a ka Eglisi kalansiraw lafasa ni kantigiya ye. A tagara vatikan yɛrɛ. O bɛɛ n’a ta, tuma min na Jehova Seere dɔ tagara bɔ a ye a ka soo, ka Bibulukalan kofɔ a ye, a sɔnna. Mun na? Sabu a tun b’a fɛ ka Bibulu ka fɔta lɔn, ani a ka Eglisi tun ma Bibulukalan kofɔ a ye. O wale b’an kalan mun lo la? Ko, an tɛ se k’a lɔn jɔn bena sɔn Bibulukalan sarabali la.—Waaj. 11:6.

² Yala i delila ka sigasiga k’a fɔ mɔgɔw ye ko i be i yɛrɛ dira ka Bibulu kalan ni mɔgɔ o mɔgɔ ye, min b’a fɛ wa? I sigida la, yala bɛɛ b’a lɔn ko an b’o baara sarabali kɛ wa? An be se ka la a la cogo juman na k’u b’a lɔn? An kɛtɔ ka baara kɛ ni minan kura dɔ ye! Ɲɛɛ wɔɔrɔ sɛbɛnin dɔ lo, min be mɔgɔ sama. A tɔgɔ ko Aimeriez-vous en savoir plus sur la Bible ? ( Yala a bena diya i ye ka dɔ fara i ka lɔnniya kan Bibulu koo la wa?) An ka tɛmɛ o sɛbɛnin barokun kelen kelen fɛ k’a koo lɔn.

³ “Mun na Bibulu ka ɲi ka kalan?” Sɛbɛnin be dalilu minw di, u be mɔgɔw ɲɛnatigɛ kosɔbɛ. A b’a ɲɛfɔ ko “Ala ka kanuya kalan” be sɔrɔ Bibulu kɔnɔ. A fana b’a yira cogo min na an be se ka magwɛrɛ Ala la, ka dɛmɛ ɲini a fɛ delili kɔnɔ, ani k’a ka nilifɛn sɔrɔ: ɲɛnamaya banbali (1 Tes. 2:13). O sɛbɛnin be kuma Bibulu ka “tiɲɛn kalansiraw ɲɛfɔlenw” caaman kan, i n’a fɔ: mun lo be kɛ saya kɔ, ani mun na gwɛlɛya ka ca ten dugukolo kan. “Ala ka sariyakolo minw be Bibulu kɔnɔ”, a b’u lakali. Ani a b’a yira k’o sariyakolow sira tagama b’an nafa farikolo ta fan fɛ. O be na ni hɛɛrɛ, ni jigiya ni jogo ɲuman wɛrɛw ye. Sɛbɛnin b’a yira ko Bibulu ka ɲi ka kalan koo wɛrɛ kama: a ka ciraya kumaw b’a yira siniɲasigi be min mara an ye.—Jira. 21:3, 4.

⁴ “Dɛmɛ, walisa ka Bibulu faamuya”: Sɛbɛnin b’a fɔ ko: “An bɛɛ mako be dɛmɛ la walisa ka Ala ka Kuma faamuya.” Ani, a be an ka Bibulu kalan kɛcogo lakali: “Tuma caaman na, a ka fisa ka Bibulu kalan daminɛ ni kalansira kunbabaw ye, ka kalan kɛ dɔɔni dɔɔni ka taga.” Sɛbɛnin b’a yira cogo nɔgɔman na ko “Bibulu lo be kuntigiya kɛ”. Ani a b’a yira ka gwɛ ko kitabunin Wajibiya lo bena kalanden dɛmɛ “ka Bibulu ka fɔta faamuya barokun caaman kan.” Kalankun nɔfɛta be ɲiningali dɔ bila min be mɔgɔ ɲɛnatigɛ.

⁵ “Yala a bena diya i ye ka wagati ta ka Bibulu kalan lɔgɔkun o lɔgɔkun wa?” Sɛbɛnin b’a ɲɛfɔ ko labɛn be se ka kɛ walisa kalanden ka Bibulu kalan a diyanye wagati la, an’a diyanye yɔrɔ la. A fana be se ka kɛ a yɛrɛ ka soo, wala telefɔni yɛrɛ fɛ fana. Jɔn be se k’a daa don baro la? Sɛbɛnin ko: “I ka denbaya mɔgɔw bɛɛ. A diyara i ye k’i teri minw weele, u fana be se k’u daa don a la. Wala n’i b’a fɛ, baro be se ka kɛ n’i kelen lo ye.” Kalan kelen be mɛn wagati hakɛ juman? A b’a ɲɛfɔ ko: “Mɔgɔ caaman be lɛri kelen labila Bibulukalan kama lɔgɔkun o lɔgɔkun. N’i be se ka lɛri kelen ni kɔ labila lɔgɔkun o lɔgɔkun, wala wagati damanin dɔrɔn, Seerew bena u yɛrɛw labila ka na i dɛmɛ.” O lo kɔrɔtalen be! An b’a fɛ ka koow makɛɲɛ ni kalanden kelen kelen bɛɛ ka cogoya ye.

⁶ “O b’i weele ka lɔnniya sɔrɔ”: Kupɔn (coupon) dɔ be yen sɛbɛnin kan. Sɛbɛnin sɔrɔbaga be se k’a dafa walisa ka kitabunin Wajibiya deli, wala k’a ɲini mɔgɔ ka na bɔ a ye ka Bibulukalan sarabali kɛcogo yira a la. Kitabunin Wajibiya ɲɛɛ sawura yirala sɛbɛnin kan. Yala i y’a faamuya sisan fɛɛn min kama sɛbɛnin nin bena mɔgɔ kɔnɔgwɛw lasu u ka sɔn an ka dɛmɛ la wa? Sisan, an be se ka baara fisaman kɛ n’o baarakɛminan kura ye cogo di?

⁷ I be se k’o sɛbɛnin kofɔ jɔn ye? Sɛbɛnin nin be se ka don mɔgɔw bolo, wala ka to mɔgɔw ye, minw t’u ka soo. An be se k’a jɛnsɛn soo ni soo, siradaw la, ani feerekɛyɔrɔw la. A kofɔ mɔgɔw ye, u mana sɔn an ka gafew la, wala ka ban u la. An be periyodikiw wala gafe wɛrɛ minw di mɔgɔw ma, a don u kɔnɔ. I kɛtɔ ka lɛtɛrɛ sɛbɛ mɔgɔ ye, a don a kɔnɔ. I be kuma mɔgɔ minw fɛ telefɔni na, a ɲini k’a ci u fɛ. A ɲɔgɔnnaw ta i bolo tuma bɛɛ n’i be taga i ɲɛnakow la, n’i be tagama na, ani n’i be seereya kɛra n’i ma lawili a kama. Mɔgɔ o mɔgɔ mana bɔ i ye, a di a tigi ma. A di i somɔgɔw ma, i mɔgɔɲɔgɔnw, i baarakɛɲɔgɔnw, i lakɔli filankuruw, ani i lɔnbaga wɛrɛw ma. I mana mɔgɔ o mɔgɔ kunbɛn, i jija k’o sɛbɛnin di a ma! O kɔ do?

⁸ N’a tigi y’a jaabi joona: Dɔw bena a jaabi joona, k’a fɔ k’u be Bibulukalan fɛ. O kama, i mana bɔ waajuli baara kama, la a la ko kitabunin Wajibiya fila b’i kun: kalanden ta, ani i yɛrɛ ta. N’a tigi labilanen be, kalan daminɛ kun kelen. Kitabunin dayɛlɛ a ɲɛɛ filanan na, ani “I bɛ se ka baara kɛ ni nin gafenin ye cogo di?” kalan. O kɔ, sin ka taga kalansen fɔlɔ la, ani kalan ɲɛyira. Yala o kɛcogo man nɔgɔ wa?

⁹ N’i lamɛnbaga b’a fɛ ka miiri fɔlɔ: Sanni wagati caaman ka tɛmɛ, i jija ka taga bɔ a tigi ye kokura. I tagatɔ, a filɛ ni kitabunin Wajibiya b’i kun. A kɔnɔnakow yira a la ɲɛɛ 2nan na. A to a ka kalansen dɔ sugandi, min diyara a ye kosɔbɛ. Kitabunin dayɛlɛ o kalansen yɔrɔ la, ani kalan daminɛ.

¹⁰ I mana periyodikiw to mɔgɔw bolo: N’i tun ye sɛbɛnin nin fara periyodikiw kan k’u di mɔgɔ dɔ ma, i be se ka taga bɔ a ye ani k’a fɔ ko: “O loon na ne tɛmɛna i fɛ, a diyara ne ye ka periyodiki La Tour de Garde dɔ to i fɛ. N’a sɔrɔ i y’a kɔrɔsi k’o zurunali tɔgɔ dafalen ko La Tour de Garde annonce le Royaume de Jéhovah (La Tour de Garde be Jehova ka Masaya kofɔ.) O Masaya ye fɛɛn min ye, ani a be se ka min ɲɛ ile n’i denbaya ye, ne b’a fɛ k’o ɲɛfɔ bi.” O kɔ, kitabunin Wajibiya dayɛlɛ kalansen 6nan na. Kalan daminɛ ni dakun fɔlɔ ye, ani to ka baro kɛ ani k’i janto a tigi ka wagati la. O kɔ, labɛn kɛ walisa ka segi ka na kalansen tɔ kɛ loon wɛrɛ.

¹¹ Kana a to sɛbɛnin be dɛsɛ i fɛ: Balima minw sigilen be gafekow kun na, ani waajulibaara kɔrɔsibaga ka kan k’u janto ko sɛbɛnin Aimeriez-vous en savoir plus sur la Bible ? caaman labilanen be kafo kɔnɔ tuma bɛɛ. A dɔw don i jufa kɔnɔ, i ka mobili kɔnɔ. Taga ni dɔw ye i ka baarakɛyɔrɔ la, lakɔliso. Dɔ wɛrɛw bila i ka soo donda la, yɔrɔ bɛɛ i bolo kɔrɔ. Tiɲɛn lo, dɔw don i ka waajulikɛ sakɔsi kɔnɔ walisa k’u di mɔgɔw ma, i ye minw kunbɛn ani aw ye baro kɛ Bibulu koo la.

¹² Jehova k’an ka jijali kɛli duga: Kerecɛn kelen kelen bɛɛ ka laɲinita sɔbɛ ye ka mɔgɔ wɛrɛ kalan tiɲɛn koo la (Mat. 28:19, 20). Yala i be Bibulukalan dɔ kɛra ka ban wa? N’o lo, yala i be se ka wagati wɛrɛ sɔrɔ lɔgɔkun kɔnɔ walisa ka Bibulukalan wɛrɛ kɛ wa? N’o tɛ, siga t’a la, a bena diya i ye ka dɔ kɛ. Jehova deli a k’i ka jijali kɛli duga walisa i ka mɔgɔ sɔrɔ min b’a fɛ ka kalan kɛ. O kɔ, baara kɛ ka kɛɲɛ n’i ka deliliw ye.—1 Yuh. 5:14, 15.

¹³ Baarakɛminan kura b’an bolo ka kalanw daminɛ! A ɲini k’a kɔnɔnakow lɔn. A jɛnsɛn yɔrɔ bɛɛ. I seko bɛɛ kɛ ‘ka koo ɲuman kɛ, kɛwale ɲuman kɛli ka kɛ i ka nafolo ye.’ Ani, i ye min kalan Ala ka Kuma koo la, ‘i tɛgɛ dayɛlɛ ka mɔgɔ wɛrɛ dɛmɛ’ o kan.—1 Tim. 6:18, ABBF, 1999.

[Picture on page 7]

SABABU MINW FƐ SƐBƐNIN BE SE KA JƐNSƐN

◼ Loon o loon ka barow kɛtɔ

◼ Mɔgɔ dɔ mana sɔn an ka gafe dɔ la

◼ N’an fɔnna mɔgɔ kɔ a ka soo

◼ Viziti kuraw kɛtɔ

◼ I mana mɔgɔ dɔ kunbɛn sirada la waajuli kɛtɔ

◼ N’an be waajuli kɛra feerekɛyɔrɔw la

◼ Seereya kɛtɔ, n’an ma wili a kama

◼ Lɛtɛrɛw sɛbɛtɔ

◼ Foroba mobiliw kɔnɔ

◼ Mɔgɔ dɔ mana bɔ an ye

◼ An kɛtɔ ka baro kɛ n’an somɔgɔw ye, an mɔgɔɲɔgɔnw, an ka baarakɛɲɔgɔnw, lakɔli filankuruw, ani an lɔnbaga wɛrɛw