Ladiliw, waajulibaara kama

A mara

Baara be kɛ ni lankana nin ye cogo di?

Kuma yiracogo ninw caaman bɔra An ka Masaya Cidenyabaara sɛbɛ tɛmɛnen dɔw kɔnɔ. Waajuli kɛtɔ, baara kɛ k’a filɛ n’i diyanye ta dɔw ye. Ani, tɔnɔ min sɔrɔla o la, o lajɛ. Lankana nin mara, ani a lajɛ tuma min na i b’i labɛnna waajuli baara kama.

I be se ka mɔgɔ mako don Ala ka Kuma koo la n’i ka kuma latigɛra ka gwɛ. Ɲiningali gwɛnen dɔ lawili, ani o kɔ, Bibulu ka jaabili surun dɔ kalan. I be se ka baara kɛ k’a filɛ ni ladili ninw ye:

“N’i be miiri siniɲasigi koo la, jigiya b’i la wala i be sigasiga? [A tigi ka jaabili lamɛn.] Bibulu tun kɔnna ka bi tile jatigɛkow kofɔ. A fana ye u kuncɛ cogo yira.”—2 Tim. 3:1, 2, 5; Ntal. 2:21, 22.

“Mɔgɔ caaman be hami bi kɛnɛya koo la. Yala i y’a lɔn ko Ala ye lahidu ta ka kɛnɛya koow ɲɛnabɔ pewu pewu wa?”—Esayi 33:24; Jira. 21:3, 4.

“Yala i y’a lɔn ko Bibulu kɔnna k’a fɔ ko gofɛrɛnɛman kelenpe lo bena laban ka dugukolo kuru bɛɛ mara wa?”—Dan. 2:44; Mat. 6:9, 10.

“E ka miiri la, koow tun bena kɛ cogo di ni Yesu Kirista lo tun be dugukolo marala?”—Zab. 72:7, 8.

“Mɔgɔ caaman be tɔɔrɔ la cɛya, musoya, diinan ni siya wolomani koow kosɔn. E ka miiri la, Ala be mun miiri o tilenbaliya koo la?”—Kew. 10:34, 35.

“An y’a lɔn ko Yesu Kirista ye kabako caaman kɛ a ka tile la. N’i tun be se k’a ɲini a fɛ a ka dɔ wɛrɛ kɛ, a tun bena kɛ juman lo ye?”—Zab. 72:12-14, 16.

“Mɔgɔ caaman sɛgɛra ka gwɛlɛya kuma mɛn. U b’a fɛ ka koow ɲɛnabɔcogo kuma mɛn. Nka an be se k’an ka kunkow ɲɛnabɔcogo bɛrɛbɛrɛ sɔrɔ ka bɔ min?”—2 Tim. 3:16, 17.

“I kɛtɔ k’a fɔ ko ‘An Fa min be sankolo la’, i be delili kɛra Masaya min kama, yala i be se k’o faranfasi ka lɔn wa?”—Jira. 11:15.

Baro ladon kumaw

Jukɔrɔla ɲiningaliw tara ka bɔ gafe Comment raisonner ka barokun dɔw kɔnɔ. U jaabiliw be sɔrɔ gafe ɲɛɛ minw na, o yirala:

Yala mɔgɔ ɲumanw bɛɛ be taga sankolo la wa? (61)

Yala mɔgɔ ka kan ka taga sankolo la walisa ka hɛɛrɛ bɛrɛbɛrɛ sɔrɔ wa? (62)

Yala kuun bɛrɛbɛrɛ b’a la ka la Ala la wa? (106)

Yala Ala b’i janto an koo la tiɲɛn na wa? (107)

Yala Ala ye mɔgɔ yɛrɛ yɛrɛ ye wa? (108)

Mun na a kɔrɔtalen be ka Ala tɔgɔgwɛ lɔn ani ka baara kɛ n’o tɔgɔ ye? (200)

Yala Yesu Kirista ye Ala ye wa? (205)

Furuɲɔgɔnmaw be se ka mun lo kɛ walisa ka hɛɛrɛ fisaman sɔrɔ furu kɔnɔ? (229)

Mun na juguya ka ca ten dugukolo kan? (237)

Jɔn lo be duniɲa nin marala: Ala, wala Sitanɛ? (250)

Mun na an be kɔrɔ ani an be sa? (253)

Suuw be cogoya juman na? (255)

Yala Ala be sɔn diinanw bɛɛ la wa? (310)

Tiɲɛn diinan be se ka faranfasi ka lɔn cogo di? (316)

Ala ka Masaya bena mun lo dafa? (336)

Yala Sitanɛ fanga ka bon bi duniɲa kun na wa? (368)

Mun na Ala b’a to tɔɔrɔ ka kɛ? (375)

Hadamadenw ka ɲɛnamaya kuun ye mun ye? (434)

Ladiliw, walisa ka kitabunin Wajibiya kofɔ mɔgɔw ye

“Siga si t’a la, i sɔnna ko mɔgɔ caaman lara Ala la. Minw bɛɛ lara a la, u sɔnna ko Ala be fɛɛn dɔ ɲini an fɛ. Nka Ala be min ɲini an fɛ, mɔgɔw bɛɛ ma sɔn o lo la.” O kɔ, kitabunin Wajibiya yira. A dayɛlɛ kalansen fɔlɔ la, ani baro kɛ o kan.

“Bi, gwɛlɛya ka ca denbaya kɔnɔ. Yala i delila k’i yɛrɛ ɲininga denbaya hɛɛrɛman gundo ye min ye wa?” A tigi ka jaabili kɔ, a ɲɛfɔ ko Bibulu kɔnɔ, Ala be denbaya hɛɛrɛman gundo yira. Esayi 48:17 kalan. O kɔ, kitabunin Wajibiya dayɛlɛ kalansen 8nan na. Bibulusen minw sɛbɛra, olu dɔw yira, minw be ladili bɛrɛbɛrɛw di gwamɔgɔ kelen kelen kama. Ɲiningali minw be sɔrɔ kalansen daminɛ na, olu kalan. A tigi ɲininga n’a b’a fɛ k’u jaabiliw kalan.

“Kitabunin nin kɔnɔ, kalan be sɔrɔ, min faamuyali ka nɔgɔ. O kalan basigira Bibulu ka kalansira kunbabaw kan. A ɲɛɛ kelen kelen bɛɛ kan, i bena ɲiningali dɔw ka jaabili sɔrɔ. O ɲiningaliw be mɔgɔw kɔnɔfin kabini wagati jan. I n’a fɔ: Ala sagonata ye mun ye ka ɲɛsin dugukolo ma?” A dayɛlɛ kalansen 5nan na. Ɲiningali minw be sɔrɔ kalansen daminɛ na, olu kalan. A tigi ɲininga juman lo ka di a ye kosɔbɛ. Dakun(w) kalan, min(w) ɲɛsinna o ɲiningali ma, ani Bibulusen kɛɲɛnen dɔw kalan. A ɲɛfɔ ko o cogo kelen na, jaabiliw be se ka sɔrɔ ɲiningali tɔɔw la, ani u be mɔgɔ wasa. A fɔ ko i b’a fɛ ka segi ka na baro kɛ ɲiningali wɛrɛ kan.

“E ka miiriya la, farinyako minw bɛɛ be kɛra foroba lakɔlisow la, u sababu ye mun ye? Yala bangebagaw lo dɛsɛra k’u deenw kolo wa? Wala koo wɛrɛ nɔɔ lo, i n’a fɔ Sitanɛ?” A ka jaabili lamɛn. N’a tigi ko Sitanɛ nɔɔ lo, Jirali 12:9, 12 kalan. Sitanɛ lɔyɔrɔ yira ka gwɛ duniɲa ka gwɛlɛya cayali la. O kɔ, kitabunin Wajibiya dayɛlɛ kalansen 4nan na. Ani, a tigi ɲininga n’a delila k’a yɛrɛ ɲininga Sitanɛ bɔra min? Dakun fɔlɔ ni filanan kalan ani baro kɛ u kan. N’a tigi ko farinya be yen lakɔlisow la sabu “bangebagaw lo dɛsɛra k’u deenw kolo”, 2 Timote 3:1-3 kalan. Ani, jogo dɔw yira minw be na n’o gwɛlɛya ye. O kɔ, kitabunin Wajibiya dayɛlɛ kalansen 8nan na. Dakun 5nan kalan, ani baro lataga ɲɛ.

“E ka miiri la, yala a bɛnnen be an k’an jigi la Danbaga kan ko a bena lɔnniya di an ma, an mako be min na walisa ka denbaya ka ɲɛnamaya ɲɛ wa?” A tigi ka jaabili kɔ, kitabunin Wajibiya ladon. A dayɛlɛ kalansen 8nan na. A ɲɛfɔ ko Bibulu ka sariyakolow be sɔrɔ a kɔnɔ, minw ɲɛsinna gwamɔgɔ kelen kelen bɛɛ ma. A ɲininga n’a b’a fɛ i k’a yira cogo min na mɔgɔ be se ka baara kɛ n’o kitabunin ni Bibulu ye walisa ka tɔnɔ fisaman sɔrɔ.

“An be gwɛlɛya minw bɛɛ kunbɛnna bi tile kɔnɔ, e ka miiri la, yala delili be se k’an dɛmɛ tiɲɛn na wa? [A ka jaabili lamɛn.] Mɔgɔ caaman b’a fɔ ko delili b’u dɛmɛ ka fanga sɔrɔ. [Filipekaw 4:6, 7 kalan.] O bɛɛ n’a ta, dɔ be se ka miiri ko ale ka deliliw tɛ jaabili sɔrɔ. [Kitabunin Wajibiya dayɛlɛ kalansen 7nan na.] Kitabunin b’a ɲɛfɔ cogo min na delili be se ka dɛmɛ fisaman lase an ma.”

“An be baro kɛra n’an mɔgɔɲɔgɔnw ye mun na diinanw ka ca ten duniɲa kɔnɔ, ani u be dan na dan na. O bɛɛ n’a ta, Bibulu ye kelenpe lo ye. E ka miiri la, mun na diinanko ferekera ten? [A ka jaabili lamɛn. Kitabunin Wajibiya dayɛlɛ kalansen 13nan na, ani ɲiningaliw kalan a daminɛ na.] I kɛtɔ ka kalansen nin kalan, i bena jaabiliw sɔrɔ minw bena i wasa.”

I mana periyodikiw La Tour de Garde ani Réveillez-vous ! di mɔgɔ dɔ ma, a tigi ɲininga n’a b’a fɛ i ka dakun surun dɔ kalan a ye. N’a sɔnna, kitabunin Wajibiya dayɛlɛ kalansen 5nan na. Ɲiningaliw yira, minw be sɔrɔ daminɛ na. A fɔ a tigi ye ko a ka ɲiningali fɔlɔ ka jaabili lamɛn i kɛtɔ ka dakun fɔlɔ kalan. Dakun kalan kɔ, o ɲiningali bila, ani a ka jaabili lamɛn. Kitabunin kofɔ a ye. N’a sɔnna k’a ta, labɛn kɛ walisa ka segi ka na bɔ a ye ani k’a ka jaabili lamɛn ɲiningali fila nɔfɛ taw kan.

Ladiliw, walisa ka gafe Dɔnniya kofɔ mɔgɔw ye

Bibulu minɛ i bolo, ani a daminɛ nin cogo la: “Bi, an be Bibulu ka miiriya dɔ tilan ni mɔgɔ bɛɛ ye i ka sirada la. A ko . . . ” Yuhana 17:3 kalan, ani o kɔ, a ɲininga ko: “N’i y’a kɔrɔsi, lahidu juman lo tara an ye n’an ye lɔnniya tigitigi sɔrɔ? [A tigi ka jaabili lamɛn.] Mɔgɔ be se k’o lɔnniya sifa sɔrɔ ka bɔ min?” A ka jaabili kɔ, gafe Dɔnniya yira, ani a fɔ ko: “Gafe nin b’a yira lɔnniya min be na ni ɲɛnamaya banbali ye. A b’o lɔnniya yira, a kɛtɔ ka mɔgɔw ka ɲiningali caaman jaabi Bibulu koo la.” Gafe ka kalansenw lajɛyɔrɔ yira a la. Ani, a ɲininga n’a delila k’o ɲiningali dɔw bila a yɛrɛ ye.

“Yala i delila k’i yɛrɛ ɲininga ni Ala b’i janto tiɲɛn na tilenbaliya ni tɔɔrɔ koow la, minw be kɛra k’an lamini, wala minw delila k’an yɛrɛw sɔrɔ wa? [A tigi ka jaabili lamɛn.] Bibulu b’an hakili sigi ko Ala b’an kanu, ani ko a bena an dɛmɛ tɔɔrɔ wagati la.” Zaburuw 72:12-17 yɔrɔ dɔw kalan. Gafe Dɔnniya dayɛlɛ kalansen 8nan na. A yira ko a be mɔgɔ miliyɔn caaman ka ɲiningali nin jaabi k’u jigi tugu: mun na Ala b’a to tɔɔrɔ ka kɛ? Bibulusen minw dira dakunw 3nan na ka taga se 5nan ma, baro kɛ u kan n’a be se ka kɛ, wala segi ka baro kɛ u kan viziti kura kɛtɔ.

“An caaman ka mɔgɔ kanulen dɔ sara. Yala i delila k’i yɛrɛ ɲininga n’an bena u ye tugu wa? [A tigi ka jaabili lamɛn.] Yesu y’a kɛ k’a yira ko an ka mɔgɔ kanulenw be se ka lakunu ka bɔ saya la. [ Yuhana 11:11, 25, 44 kalan.] Hali n’o koo kɛra kabini saan kɛmɛ caaman, a b’a yira ko Ala ye lahidu ta k’o ɲɔgɔn lo kɛ an ye.” Gafe Dɔnniya dayɛlɛ ka jaa yira ɲɛɛ 85nan na. Ɲɛfɔli min kɛra jaa san fɛ, o kalan. O kɔ, ɲɛɛ 86nan ka jaa yira, ani a lakali. Viziti kura juu sigi, i kɛtɔ k’a fɔ ko: “Yala i b’a fɛ k’a lɔn mun na hadamadenw be kɔrɔ ani u be sa wa?” segi ka na baro kɛ sapitiri 6nan kan.

“Yala i delila ka miiri mun na a negeba be hadamadenw na ka sii jan sɔrɔ wa?” A ka jaabili kɔ, gafe Dɔnniya dayɛlɛ sapitiri 6nan na, ani dakun 3nan kalan. Bibulusen minw kofɔra, tɛmɛ u fɛ k’a tigi hakili jagabɔ. Ɲiningali fila minw be dakun laban na, tɛmɛ u fɛ k’a tigi ɲininga n’a b’a fɛ k’u jaabili lɔn. N’a sɔnna, i ka baro kɛ dakun nɔfɛta dɔw kan.

“An be mɔgɔw ɲininga n’u lara nin na . . . ” Jenɛse 1:1 kalan. O kɔ, a ɲininga ko: “Yala i sɔnna o kumaw la wa.” N’a sɔnna, a fɔ ko: “Ne fana lara a la. Nka, ile ka miiriya la, ni Ala ye fɛɛn bɛɛ dan, yala juguya ye ale fana nɔɔ ye wa?” I mana a tigi ka jaabili lɔn, i ka Waajulikɛla 7:29 kalan. Gafe Dɔnniya dayɛlɛ sapitiri 8nan na, ani dakun 2nan kalan. N’a tigi ma sɔn Jenɛse 1:1 ka kuma la, a jija a ka daliluw lajɛ, minw b’a yira ko Danbaga be yen.—A filɛ gafe Comment raisonner kɔnɔ, a ɲɛɛw 72-74nan.

“Komi bi tagamacogo be yɛlɛma joona joona, yala i sɔnna ko an mako be ɲɛminɛli bɛrɛbɛrɛ la ɲɛnamaya kɔnɔ wa? [A tigi ka jaabili lamɛn.] Hali n’a ka kɔrɔ ni gafe tɔɔw bɛɛ ye, Bibulu be ladili nɔgɔmanw di bi tile ka ɲɛnamaya kama ani denbaya hɛɛrɛman ka ɲɛnamaya kama.” Gafe Dɔnniya dayɛlɛ sapitiri 2nan na, ani dakun 10nan kalan. Dakun 11nan ka kumasen fɔlɔ fana kalan. 2 Timote 3: 16, 17 kalan ka fara a kan.

“Siniɲasigi be min mara an ni dugukolo fana ye, yala i t’a fɛ k’o lɔn wa? [A tigi ka jaabili lamɛn.] Bibulu be siniɲasigi kuma surunya kumaden kelen ma: Alijɛnɛ! Ala ye mɔgɔ fɔlɔ fila minw dan, a y’u bila o yɔrɔ lo la. O yɔrɔ bɔlen tun be fɛɛn min ma, o lakalita filɛ.” Gafe Dɔnniya dayɛlɛ a ɲɛɛ 8nan na. Dakun 9nan kalan barokun nin jukɔrɔ: “Ɲɛnamaya, alijɛnɛ kɔnɔ.” O kɔ, baro kɛ dakun 10nan ka hakilinataw kan, ani Esayi 55:10, 11 kalan. A fɔ a tigi ye ko i b’a fɛ ka baro lataga ɲɛ k’a yira a la ɲɛnamaya bena kɛ cogo min na alijɛnɛ kura nata kɔnɔ. Baara kɛ dakunw 11-16nan kan.

Mɔgɔ minw tun ye periyodikiw La Tour de Garde ni Réveillez-vous ! ta, viziti kura kɛtɔ u fɛ, i be se ka nin fɔ ko:

“O loon na ne tɛmɛna i fɛ, a diyara ne ye ka periyodiki La Tour de Garde dɔ to i fɛ. N’a sɔrɔ i y’a kɔrɔsi k’o zurunali tɔgɔ dafalen ko La Tour de Garde annonce le Royaume de Jéhovah (La Tour de Garde be Jehova ka Masaya kofɔ.) O Masaya ye fɛɛn min ye, ani a be se ka min ɲɛ ile n’i denbaya ye, ne b’a fɛ k’o ɲɛfɔ bi.” O kɔ, kitabunin Wajibiya dayɛlɛ kalansen 6nan na. A kalan, ani baro kɛ o kan, i kɛtɔ k’i janto a tigi ka wagati la.

“A wagati ma mɛn, ne tɛmɛna i fɛ. Ani ne tun ye periyodikiw La Tour de Garde ni Réveillez-vous ! to i fɛ. O zurunaliw be mɔgɔw lasu ka bonya la Bibulu kan ani a ka ɲɛminɛli kan tagamacogo ta fan fɛ. Komi ne b’a jate ko a kɔrɔtalen be bɛɛ ka Ala ka Kuma faamuya, o kama ne segira ka na fɛɛn dɔ yira i la . O fɛɛn bena i dɛmɛ ka Bibulu faamuya.” Kitabunin Wajibiya wala gafe Dɔnniya bɔ ka yira, ani, bibulukalan kofɔ a tigi ye.

I kɛtɔ ka ɲɛɛ 192 gafe kɔrɔ dɔ yira mɔgɔw la, i be se ka kuma ladon nin cogo la:

“A fɔra ka gwɛlɛya ko mɔgɔ ka kan ka kalan ɲuman sɔrɔ. E ka miiri la, mɔgɔ ka kan ka kalan sifa juman lo magwɛn walisa ka hɛɛrɛ fisaman sɔrɔ ani k’a balo cogo ɲɛ? [A tigi ka jaabili lamɛn. O kɔ, Ntalen 9: 10, 11 kalan.] Gafenin nin [A tɔgɔ fɔ] basiginen be Bibulu kan. Lɔnniya be bɔ yɔrɔ kelenpe min na ka mɔgɔ bila ɲɛnamaya banbali sira kan, gafe b’o yira.” Ɲɛyirali tigitigi dɔ yira gafe kɔnɔ, ani, dusu don a tigi la a k’a kalan.

N’i ye kuma yiracogo barikaman wɛrɛ dɔ sɔrɔ min b’i dɛmɛ ka makodon ladon bɛrɛbɛrɛ, i ka to ka baara kɛ n’o ye! I k’a makɛɲɛ ni gafe yirata ye dɔrɔn.

Sɛbɛ wɛrɛw

Ladiliw dira gafe ni kitabunin wɛrɛw yiracogo kan. U be sɔrɔ Index des Publications de la Société Watch Tower kɔnɔ barokun nin jukɔrɔ:

Yiracogo tilennen

Walisa ka Bibulukalan daminɛ, a ɲini ka baara kɛ ni yiracogo tilennen ninw dɔ ye:

“Yala i y’a lɔn ko miniti damaninw dɔrɔn kɔnɔ i be se ka jaabili sɔrɔ Bibulu ka ɲiningaliba dɔ la wa? I n’a fɔ . . . ” O kɔ, ɲiningali minw be sɔrɔ kitabunin Wajibiya ka kalansenw daminɛ na, o dɔ bila, min be se k’a tigi ɲɛnatigɛ ile ka miiriya la.

“Ne tɛmɛna i fɛ walisa k’an ka Bibulu kalan kɛcogo yira i la gwansan. O ɲɛyirali be kɛ miniti looru ɲɔgɔn kɔnɔ. Yala miniti looru b’i fɛ wa?” N’a tigi sɔnna, tɛmɛ kitabunin Wajibiya ka kalansen fɔlɔ fɛ ka kalan ɲɛyira a la. Bibulusen kelen wala fila dɔrɔn ɲɛnatɔmɔ k’u kalan fana. O kɔ, a ɲininga ko: “Walisa ka kalansen nɔfɛta lajɛ, an mako bena kɛ miniti 15 la. I be se k’u sɔrɔ tuma juman?”

“Bibulu be mɔgɔ caaman fɛ. Nka u m’a lɔn ko a be jaabili di ɲiningaliw kan, an bɛɛ be minw bila ka taga siniɲasigi kan. Sɛbɛ nin [Kitabunin Wajibiya, wala gafe Dɔnniya] be mɔgɔ dɛmɛ ka kalan kɛ. I kɛtɔ ka baara kɛ n’a ye lɛri kelen ɲɔgɔn kɔnɔ lɔgɔkun o lɔgɔkun, i be se ka faamuyali jɔnjɔn sɔrɔ Bibulu koo la kalo damaninw dɔrɔn kɔnɔ. A bena diya ne ye k’o kalan kɛcogo yira i la.”

“Ne nana bɔ i ye ka Bibulukalan kofɔ i ye i ka soo kɔnɔ gwansan. N’i sɔnna, a bena diya ne ye ka miniti damanin dɔrɔn ta k’a yira i la cogo min na jamana 200 ɲɔgɔn kɔnɔ, gwa mɔgɔ miliyɔn caaman be baro kɛ Bibulu kan. An be se ka baro basigi barokun ninw na kelen kan. [Kalansenw lajɛyɔrɔ yira a la gafe Dɔnniya kɔnɔ.] A juman lo diyara i ye kosɔbɛ?” A to a tigi ka dɔ ɲɛnatɔmɔ. Gafe dayɛlɛ o sapitiri yɔrɔ la, ani kalan daminɛ ni dakun fɔlɔ ye.

“Ne be Bibulukalan kɛ ni mɔgɔw ye gwansan kama. Ani, wagati labilanen be ne fɛ ka sɔn mɔgɔ wɛrɛ ka kalan na. An be baara kɛ ni dɛmɛnan ni ye ka Bibulu kalan. [Gafe Dɔnniya yira.] O kalan be mɛn kalo damaninw dɔrɔn, ani a be ɲiningali dɔw jaabi i n’a fɔ: Mun na Ala b’a to tɔɔrɔ ka kɛ? Mun na an be kɔrɔ, ani an be sa? An diyanyemɔgɔ salenw be kɛ di? An be se k’an magwɛrɛ Ala la cogo di? Yala ne be se k’o kalan ɲɛyira wa?”