Yala i be baara kɛ ni kitabunin Wajibiya ye walisa ka kalanw daminɛ wa?
1 Yala i y’a lɔn ko n’i be tɛmɛ gafew fɛ ka sin ka baro kɛ ni makodon mɔgɔ dɔ ye Bibulu kan tuma o tuma, hali wagati kunkurunin kɔnɔ, i be Bibulukalan kɛra n’a tigi ye wa? Bibulukalan lo tiɲɛn na, hali n’o kalan be kɛra soda la wala telefɔni fɛ. Mɛkalo ni zuwɛnkalo la, mun na i tɛ jijaliba kɛ walisa k’o kalan ɲɔgɔn daminɛ kitabunin Wajibiya kɔnɔ?
2 I labɛn walisa ka se a la: I kɛtɔ ka kitabunin Wajibiya kofɔ mɔgɔw ye, i b’a fɛ ka baro kɛ koo min kan, a to o ka gwɛ i kuun na. Viziti kura kɛtɔ, i tun kɔnna ka baro kɛ koo min kan, miiri o kan. I yɛrɛ ɲininga: ‘Kitabunin kɔnɔ, ne ka kan ka n’ janto kosɔbɛ dakun jumanw na walisa ka baro nin lataga ɲɛ ani k’a yɛlɛma ka kɛ Bibulukalan ye? N’i be waajuli kɛra soo ni soo, a filɛ barokun min bena denmisɛn, mɔgɔ kɔrɔ, cɛɛ, wala muso ɲɛnatigɛ. Kitabunin ka barokunw lajɛ, ani dɔ ɲɛnatɔmɔ min bena diya a tigi ye. I mana yiracogo dɔ latigɛ, a dege siɲɛ caaman. O ye gundo dɔ ye walisa ka see sɔrɔ.
3 Saan 2002, zanwiyekalo ka An ka Masaya Cidenyabaara lankana be ladili seegi di, “Ladiliw, walisa ka kitabunin Wajibiya kofɔ mɔgɔw ye”. Barokun “Yiracogo tilennen” be baara kɛcogo yira ni kitabunin ye walisa ka kalanw daminɛ. I be se ka ladili fɔlɔ makɛɲɛ nin cogo la:
◼ “Yala i y’a lɔn ko miniti damaninw dɔrɔn kɔnɔ i be se ka jaabili sɔrɔ Bibulu ka ɲiningali dɔ la wa? I n’a fɔ: mun na diinan caaman be yen, minw b’a fɔ ko olu ye kerecɛn diinanw ye? Yala i delila k’i yɛrɛ ɲininga o la wa? A tigi ka jaabili lamɛn. O kɔ, kalansen 13nan ta. Ani, baro kɛ dakun fɔlɔ ni filanan kan. Ni wagati b’a fɛ, vɛrise kelen wala fila kalan, ani baro kɛ u kan. Ɲiningali laban min be yen kalansen daminɛ na, ale kalan, ani a fɔ ko: “Kalansen tɔɔ be tagamasiɲɛ looru yira, minw b’an dɛmɛ ka tiɲɛn diinan lɔn. A bena diya ne ye ka segi ka na u lajɛ n’i ye.”
4 I ka timinandiya: I mana fɛɛrɛ o fɛɛrɛ sɔrɔ, tɛmɛ o fɛ ka Bibulukalan kɛcogo ɲɛyira kitabunin Wajibiya kɔnɔ. Jehova ka duga ɲini (Mat. 21:22). Ka mɔgɔw dɛmɛ u ka sɔn kibaro duman na, o ye ɲagali sababu ye. N’i be timinandiya i ka jijaliw kɛli la, i bena o ɲagali diya bɔ!