I ka “nafolotigiya kɛwale ɲumanw kɛli la”

¹ A ka cidenyabaara kisɛman saan labanw na, ciden Pol ye jɛnɲɔgɔnya teriman kɛ ni Timote ni Tite ye. A ye jagwɛlɛya kumaw sɛbɛ ka ci u kelen kelen ma. O kumaw bɔlen be ɲɔgɔn ma. A y’a fɔ Tite ye ko “minw lara Ala la”, u ka kan “ka miiri kɛwale ɲumanw kɛli la.” (Tite 3:8, NW ) A y’a fɔ Timote ye ko minw y’u jigi la Ala kan, “u ka nafolotigiya” ka kan ka “kɛ kɛwale ɲumanw kɛli ye.” (1 Tim. 6:17, 18). O ladili ɲumanba ɲɛsinna an bɛɛ ma! Nka, mun lo bena an lasu ka kɛwale ɲumanw kɛ an ka ɲɛnamaya kɔnɔ? Ani, an ka kan ka kɛwale tigitigi jumanw lo dafa loon nataw la?

² N’an be la Jehova la, n’an b’a kanu, ani a ye jigiya cɛɲumanba min di an ma, o bɛɛ lo bena an lasu kɛwale ɲumanw kɛli la (1 Tim. 6:19; Tite 2:11). Saan wagati nin na, a ɲininen be an fɛ an k’an hakili jigi a la ko: Jehova y’a Dencɛ ci dugukolo kan walisa a ka joo di a Faa ma. Ani, hadamaden minw bɛɛ ka kan n’a ye, a ye sira di u ma ka ɲɛnamaya sɔrɔ (Mat. 20:28; Yuh. 3:16). Ɲɛfɔli bena kɛ o kan ka gwɛ Kirista ka saya Hakilijigi seli la, marisikalo tile 28nan. Jigiya dira an ma ka ɲɛnamaya banbali sɔrɔ. N’an b’o waleɲuman lɔn, yala o t’an lasu k’an seko bɛɛ kɛ ka “nafolotigiya . . . kɛwale ɲumanw kɛli la” wa? Siga t’a la, o lo! An be se ka kɛwale jumanw dafa sisan?

³ Kɛwale ɲumanw kɛta marisikalo la, ani o kɔ: Siga t’a la, an bena taga Hakilijigi seli la. Saan kuru bɛɛ kɔnɔ, Jehova Seerew ka koo kɔrɔtalenba lo duniɲa bɛɛ kɔnɔ (Luka 22:19). Nka an b’a fɛ k’o seli ɲagali tilan ni mɔgɔ caamanba wɛrɛw ye. Waajulibaara rapɔɔri lajɛ saan 2002, zanwiyekalo tile fɔlɔ ka La Tour de Garde kɔnɔ. I bena a kɔrɔsi ko salon, jamana caaman kɔnɔ, minw nana hakilijigi seli la, u hakɛ tun ka ca ni weleweledalaw hakɛ ye siɲɛ saba, siɲɛ naani, looru wala caaman o kɔ tuma dɔw la. Siga t’a la, kafow kɔnɔ, bɛɛ ye jijali sɔbɛw kɛ walisa ka Hakilijigi seli weelelisɛbɛw tilan tilan mɔgɔw ye kiinw bɛɛ kɔnɔ. O kama, sanni marisikalo tile 28nan ka se, an b’a fɛ ka wagati caaman ta k’an seko bɛɛ kɛ ka mɔgɔw weele ka na Hakilijigi seli la walisa k’u dɛmɛ ka kisili jigiya lɔn.

⁴ Sanni awirilikalo ka se, tile yeelen bena daminɛ ka mɛɛn, ani wagati ɲɛɛ bena fisaya. An be se ka tɛmɛ o sababu ɲumanw fɛ ka ‘nafolotigiya kɛ kɛwale ɲumanw kɛli la’ cogo di? An kɛtɔ ka to ka kibaro duman waajuli kɛ ni dusu diya ye, “an jijalen kɛwale ɲumanw bɛɛ kɛli la.” (Tite 2:14; Mat. 24:14). N’i tɛ se ka kɛ piyɔniyew kɔrɔsigi ye marisikalo la, yala i be se ka kɛ a ye awirili ani/wala mɛkalo la wa? N’i b’a la ka ban marisikalo la, yala i be se ka to a la kalo nɔfɛtaw la wa?

⁵ Dɔw y’a ye k’u tagatɔ baara la, u be se ka waajuli kɛ lɛri kelen ɲɔgɔnna. U be seereya kɛ siradaw la, wala feerekɛyɔrɔw la, yɔrɔ minw na mɔgɔw be na baara la sɔgɔmada joona. Dɔ wɛrɛw be labɛn kɛ walisa ka seereya kɛ tilerafana wagati la, ani ka Bibulu kalan daminɛ n’u baarakɛɲɔgɔnw ye. Balimamuso minw be baara kɛ soo kɔnɔ, u caaman sera ka wagati labɛn walisa ka waajuli kɛ tuma min na u deenw be lakɔli la. Tuma dɔw la u be kɔn ka wili ani ka baara dɔw kɛ soo kɔnɔ. O cogo la, wagati be sɔrɔ u bolo tile kɔnɔ walisa ka waajuli kɛ ani ka mɔgɔw kalan. —Efes. 5:15, 16.

⁶ Hali n’i tɛ se ka kɛ piyɔniyew kɔrɔsigi ye, n’a sɔrɔ i be se k’i tɔgɔla labɛn kɛ walisa ka caaman kɛ waajuli baara la. O cogo la, i bena i seko bɛɛ kɛ ‘ka koo ɲuman kɛ, ka nafolotigiya kɛwale ɲumanw kɛli la, ka nili kɛ teliya k’i tɛgɛw labila.’ —1 Tim. 6:18.

⁷ I hakili to kɛwale ɲuman nin na: ka mɔgɔw kɛ kalandenw ye: Saan o saan, makodon mɔgɔw be na Hakilijigi seli la. O mɔgɔ minw tɛ Bibulukalan kɛra fɔlɔ, yala kafo ka weleweledala dɔw be se k’u janto u la wa? Yala u be se ka taga bɔ u ye ani k’u dɛmɛ ka ɲɛtaga sɔrɔ Alako ta faan fɛ wa? O mɔgɔ minw be na seli la, i be taga a sɔrɔ, u dɔw ye Seere dɔw ka somɔgɔw ye. N’a sɔrɔ dɔ wɛrɛw tun ye kalan kɛ ka tɛmɛ. Ani, u mako be jagwɛlɛya la walisa ka kalan kɛ kokura ani ka na lajɛnw na tuma o tuma. A bena kɛ ɲagali ye an fɛ k’a ye k’u kɛra Jehova ka baarakɛla kisɛmanw ye an gɛrɛfɛ dɛ!

⁸ N’an ye dɔ fara an ka waajuli baara kan marisikalo la ani kalo nɔfɛtaw la, siga t’a la, an bena viziti kura kɛta caaman sɔrɔ makodon mɔgɔw fɛ. Sanni i ka kɔ di u ma, a ɲini ka ɲiningali dɔ lawili. Ani, a fɔ ko i bena segi ka na a jaabi siɲɛ wɛrɛ. O kɛtɔ, an bena viziti kura jusigi. A fisaman ye ka segi ka taga bɔ a tigi ye joona. N’an tun ma se ka Bibulukalan daminɛ siɲɛ fɔlɔ la, an k’an seko bɛɛ kɛ ka dɔ daminɛ an segitɔ.

⁹ N’an be waajuli kɛra siradaw la, an k’an jija ka baro daminɛ ni mɔgɔw ye. Weleweledala caaman sera ka mɔgɔw tɔgɔw n’u ladɛrɛsiw n’u ka telefɔni nimɔrɔ sɔrɔ ka sɛbɛ waajuli kɛtɔ siradaw la. N’a tigi sigilen tɛ i ka kiinw kɔnɔ, i ka sɛbɛ (S-14) Veuillez suivre l’intérêt (hakɛ to ka makodon magwɛn) dɔ ta Masaya Boon kɔnɔ. A dafa, ani a di kafo ka sekeretɛri ma. Ale bena a ci kafo wɛrɛ ma, yɔrɔ min na makodon mɔgɔ sigilen be. N’o tɛ, sekeretɛri bena a ci tɔnbolo biro ma, min bena a koo filɛ. O cogo la, o makodon bena ladon.

¹⁰ N’a tigi m’a ka ladɛrɛsi di, nka a y’a ka telefɔni nimɔrɔ di, i ka tɛmɛ telefɔni fɛ k’o viziti kura kɛ. I bena min fɔ a tigi ye, kɔn k’i labɛn o kan. I ka gafe Comment raisonner to i gɛrɛfɛ walisa k’a lajɛ joona. Dɔw sera ka Bibulukalan dumanw kɛ ni mɔgɔw ye telefɔni fɛ, i n’a fɔ mɔgɔ minw sɔrɔ ka gwɛlɛ u ka soo. Waajuli kɛtɔ soo ni soo, balimamuso dɔ y’a latigɛ loon dɔ ka makodon mɔgɔw ka telefɔni nimɔrɔw ta. Mun sɔrɔla o la? A sera ka Bibulukalan fila daminɛ.

¹¹ I bolo di diinan mɔgɔkɔrɔw ma ka sumalenw dɛmɛ: Diinan mɔgɔkɔrɔw b’a fɛ k’u janto ni kanuya ye o sumalenw na. O sumalen caaman y’a bɔ u yɛrɛw la ka ban ka segi ka na kafo ka lajɛnw na. U bɔra a kalama k’u mako b’a la ka magwɛrɛ Jehova ka ɔriganisasiyɔn na walisa ka lafiya sɔrɔ Alako ta faan fɛ i ko Zaburuw 91nan b’a lakali cogo min na. Sisan, u dɔw labɛnna ka waajuli kɛ kokura. Ni sumalen wɛrɛw nana Hakilijigi seli la kalo nin na, n’a sɔrɔ u bena sɔn ka Bibulukalan kɛ. O la, diinan mɔgɔkɔrɔw bena labɛn kɛ walisa mɔgɔ dɔ ka kalan kɛ n’u ye, minw mako be dɛmɛ la. N’o y’a ɲini i fɛ i ka dɛmɛ lase o sumalenw ma, u bena i ka jɛnɲɔgɔnya waleɲuman lɔn kosɔbɛ. —Rom. 15:1, 2.

¹² To ka “kɛwale ɲumanw kɛ”: Weleweledala caaman minw kɛra piyɔniyew kɔrɔsigi ye kalo kelen wala kalo damanin, u y’a kɔrɔsi ko dɔ farala u ka waajuli baara kan kalo nɔfɛtaw kɔnɔ. U ye makodon mɔgɔw kunbɛn, ani u y’a ye k’u ka ɲi ka segi ka taga bɔ u ye. O ye u jija ka dɔ fara u ka jijali kan waajuli baara la ani ka segi ka taga bɔ mɔgɔw ye kokura. Dɔw ye Bibulukalanw daminɛ, ani o y’u dɛmɛ ka dɔ fara u ka waajuli baara kan.

¹³ Dɔ wɛrɛw ɲagalila kosɔbɛ ka waajuli kɛ caaman ani ka mɔgɔw kalan fɔɔ u y’a latigɛ k’u ɲɛnakow sɛgɛsɛgɛ k’a filɛ. O cogo la, dɔw sera ka dɔ bɔ u ka baloɲini baara wagati la walisa ka piyɔniyew kɔrɔsigiw baara kɛ kudayi. Dɔ wɛrɛw ye kudayi piyɔniye baara daminɛ. U y’u jigi la Ala kan bɛrɛbɛrɛ sanni k’a la duniɲa ka fɛɛnw kan. U y’a ye ko “ka nili kɛ” ani “ka u tɛgɛw labila”, o lo be Jehova ka dugaba lase u ma. O fana b’u ka jigiya sabati “ɲɛnamaya sɔbɛ” sɔrɔko la (1 Tim. 6:18, 19). Tiɲɛn na, mɔgɔ caaman mana u seen don piyɔniye baara la, kafo kuru bɛɛ lo b’a nafa sɔrɔ. Piyɔniyew delinanko ye ka waajuli walew lakali, ani ka mɔgɔ wɛrɛw weele ka taga waajuli kɛ n’u ye. O be dɔ fara kafo ka hakilimaya dusu diya kan.

¹⁴ An kelen kelen bɛɛ ka “nafolotigiya . . . kɛwale ɲumanw kɛli la”, an kɛtɔ ka dɔ fara an ka waajuli baara kan Hakilijigi seli wagati la, ani o kɔfɛ. Jehova ye jigiya min di an ma ka ɲɛnamaya banbali kɛ dugukolo kura dɔ kan tilennenya kɔnɔ, an k’o waleɲuman lɔn. —2 Piɛre 3:13.