An ka “Kibaru Duman fɔ” ka dafa
1 Kibaro duman sɔrɔ man di bi duniɲa kɔnɔ. Nka nɛɛma dira an ma ka “Ala ka nɛɛma Kibaru Duman fɔ” ka dafa (Kɛw. 20:24). O kɔrɔ ko ka mɔgɔw dɛmɛ u k’a lɔn ko yanni dɔɔni cɛ, “laban donw” ninw bena ban ani Jehova ka duniɲa kura tilennen bena kɛ u nɔɔ na. O duniɲa kura kɔnɔ, “fɛn fɔlɔw” tɛna kɛ yen (2 Tim. 3:1-5; Jir. 21:4). O wagati la, bana tɛna kɛ yen tugun (Es. 33:24). An ka mɔgɔ kanulen minw sara u bena kunu ka bɔ hakilijigi kaburuw kɔnɔ ka jɛn n’u denbaya n’u teriw ye (Yuh. 5:28, 29). Dugukolo kuru bɛɛ bena yɛlɛma ka kɛ alijɛnɛ cɛɲumanba ye (Es. 65:21-23). O ye an ka kibaro duman faan damanin dɔrɔn lo ye.
2 Marisi, awirili ni mɛ kalow la, an bena sababu ɲumanba sɔrɔ k’o kibaro duman fɔ mɔgɔw ye. O kalow kɔnɔ, saan ɲɛɛ ka ɲi, ani suu tɛ ko joona duniɲa yɔrɔ caaman na. O la, an be se ka waajuli kɛ ka mɛɛn. Ka fara o kan, koo kɔrɔtalenba min bena kɛ saan kɔnɔ, o ye Hakilijigi lajɛn ye: a bena kɛ samedilon, marisikalo tile 22nan na tileben kɔ. Sisan lo an ka ɲi k’a daminɛ k’an yɛrɛ labɛn ka dɔ fara an ka waajuli baara kan.
3 Piyɔniye kɔrɔsigi baara: Yala i be se k’i labɛn ka kɛ piyɔniye kɔrɔsigi ye kalo kelen, fila wala o kalo saba bɛɛ kɔnɔ wa? Mun na aw tɛ wagati dɔ ta ka baro kɛ o kan gwakalan nata la? Ɲɔgɔndɛmɛ sababu fɛ, n’a sɔrɔ mɔgɔ kelen wala mɔgɔ caaman bena se ka kɛ piyɔniye kɔrɔsigi ye aw ka gwa kɔnɔ (Ntal. 15:22). A’ ye delili kɛ o koo la, ani a’ y’a filɛ cogo min na Jehova bena aw ka jijali kɛli duga (Ntal. 16:3). Hali ni gwamɔgɔ si tɛ se ka kɛ piyɔniye kɔrɔsigi ye, u bɛɛ be se ka laɲinita tigitigi dɔw latigɛ: ka dɔ fara u ka cidenya baara kan u kɛtɔ ka baara kɛ ni mɔgɔw ye minw be se ka kɛ piyɔniye ye.
4 N’i be taga baara la tuma bɛɛ, porogramu ɲuman be se k’i dɛmɛ ka kɛ piyɔniye kɔrɔsigi ye. Tile fɛ, i be se ka lafiɲɛ wagati dɔɔni ta ka waajuli kɛ. Wala i be se ka waajuli kɛyɔrɔ dɔ sɔrɔ i tɔgɔ la i ka soo gɛrɛ fɛ wala i ka baara kɛyɔrɔ gɛrɛ fɛ walisa ka waajuli kɛ yen lɛri kelen ɲɔgɔn kɔnɔ sanni baara ka wuli wala baara jiginen kɔ. I fana be se ka wagati wɛrɛ sɔrɔ tugun i kɛtɔ ka baara dɔw bila kalo wɛrɛ kama ni kɔrɔtɔ t’u la, ani i kɛtɔ ka samedi wala dimansi kuru bɛɛ kɛ waajuli la. Dɔw fana sera ka tile kelen wala tile fila kɔnze ta ka waajuli kɛ.
5 N’i ye mɔgɔkɔrɔba ye, ni farikolodɛsɛ b’i kan wala n’i barika ka dɔgɔ, i be se ka kɛ piyɔniye kɔrɔsigi ye i kɛtɔ ka wagati dɔɔni kɛ cidenya baara la loon o loon. A ɲini Jehova fɛ a ka “sebaaya dama dɔnbali” di i ma (2 Kɔr. 4:7). Saan 106 balimamuso dɔ sera ka kɛ piyɔniye kɔrɔsigi ye. A ka somɔgɔ minw ye Seerew ye, ani kafoden dɔw ka dɛmɛ sababu fɛ, a sera ka waajuli kɛ soo ni soo, ka taga viziti kuraw ni bibulukalanw kɛ ani k’a seen don cidenya baara faan wɛrɛw la. A ye dɛmɛ kɛ ka bibulukalanw daminɛ ni mɔgɔ tan ye. A ko: “Nɛɛmaba min dira ne ma ka kɛ piyɔniye kɔrɔsigi ye, ne mana miiri o kan, ne dusukun be fa kanuya ni waleɲumanlɔn na Jehova n’a Dencɛ n’a ka ɔriganisasiyɔn kanunci ta fan fɛ. Tiɲɛn na, ne b’a fɛ k’a fɔ ko ‘I ni ce Jehova!’”
6 N’i ye kamalen wala sunguru ye, i batisera, ani i be lakɔli la, e fana be se ka kɛ piyɔniye kɔrɔsigi ye. I n’a fɔ minw be taga baara la tuma bɛɛ, n’a sɔrɔ i bena samedi ni dimansi lo labila cidenya baara kama fɔlɔ. Lakɔli banni kɔ, n’a sɔrɔ i fana be se ka taga waajuli kɛ lɛri kelen ɲɔgɔn kɔnɔ loon dɔw la. Yala kɔnze loon dɔw be yen i be se ka waajuli kɛ minw na wa? N’i b’a fɛ ka kɛ piyɔniye kɔrɔsigi ye, i k’o fɔ i bangebagaw ye.
7 Dusudiya don mɔgɔw la: Diinan mɔgɔkɔrɔw ka ɲɛyirali be se ka kɛ sababuba ye ka dusudiya don kafodenw na waajuli kama (1 Piɛrɛ 5:2, 3). U be se k’a latigɛ ka lajɛn wɛrɛw labɛn waajuli kama walisa ka kafodenw dɛmɛ minw bena bɔ waajuli kama sɔgɔma joona, lakɔli banni kɔ wala baara jiginen kɔ. Waajulibaara kɔrɔsibaga ka kan k’a janto a la ko cii dira weleweledala setigi dɔw ma ka waajuli baara ɲɛminɛ. A fana k’a filɛ ni kiinw ni zurunaliw ni gafew bena labɔri kɛ waajuli kama o kalo kɛrɛnkɛrɛnninw kɔnɔ.
8 Kafo dɔ kɔnɔ, diinan mɔgɔkɔrɔw kɔnna k’a daminɛ kabi kalo caaman kɔnɔ ka piyɔniye kɔrɔsigi baara nege don kafodenw na. Sira dira mɔgɔ hakɛ minw ma ka kɛ piyɔniye kɔrɔsigiw ye, u tora k’o fɔ kafo ye lɔgɔkun o lɔgɔkun. O la, minw tun b’a fɛ ka dɔ fara u ka cidenya baara kan, olu hakili sigira ko u bena dɛmɛ sɔrɔ. Lajɛn wɛrɛw labɛnna waajuli kama sɔgɔma joona ani tileben kɔ. O kɛra sababu ye weleweledala 53 kɛra piyɔniye kɔrɔsigiw ye: o kɔrɔ, kafo tilancɛ ɲɔgɔn!
9 Mɔgɔ wɛrɛw dɛmɛ u ka waajuli kɛ: Mɔgɔ kuraw ni denmisɛnw ka koow mana dafa waajuli kama, an be se k’u weele u ka waajuli kɛ ni weleweledala kolɔnbaga dɔw ye. U be se k’o sababu sɔrɔ marisi, awirili ni mɛ kalow la tuma min na kafoden caaman bena dɔ fara u ka cidenya baara kan. Yala Bibulu kalanden dɔ b’i fɛ min be ɲɛtaga kɛra ani a ka ɲɛnamaya kɛcogo bɛnnen be ni Jehova ka sariya tilennenw ye wa? Yala denmisɛnw b’i fɛ minw sɔɔn ka ɲi ani u be ɲɛtaga ɲuman kɛra nka u tɛ weleweledalaw ye fɔlɔ wa? N’o ɲɔgɔnna mɔgɔw y’a yira k’u b’a fɛ ka kɛ weleweledalaw ye minw ma batise fɔlɔ, n’a be i ɲɛɛ na k’u ka koow dafara, i k’a fɔ diinan mɔgɔkɔrɔ dɔ ye. Diinan mɔgɔkɔrɔw ɲɛbila bena labɛn kɛ walisa diinan mɔgɔkɔrɔ fila ka baro kɛ ni aw ye: ile n’i deen wala ile n’i ka kalanden.
10 Kalo nataw fana bena kɛ wagati ɲumanba ye weleweledala sumalenw fɛ u ka segi ka baara kɛ kokura ni kafo ye. Kitabukalan kɔrɔsibagaw ni diinan mɔgɔkɔrɔ tɔɔw ka kan k’u jija sɔbɛ la ka taga bɔ o sumalenw fɛ ani k’u weele ni dusudiya ye u k’u bila sira cidenya baara la. N’u tun ye waajuli dabila a mɛɛnna, diinan mɔgɔkɔrɔ fila ka kan ka kuma n’u ye fɔlɔ k’a filɛ n’u be waajuli saratiw dafa.—km 11/00 ɲɛɛ 3.
11 I yɛrɛ labɛn Hakilijigi lajɛn kama: Kunmabɔsara ye “Ala ka nɛɛma” bɛɛ la fisaman lo ye (Kɛw. 20:24). Duniɲa kuru bɛɛ kɔnɔ, o waleɲumanlɔn bena mɔgɔ miliyɔn caaman lasun ka lajɛn walisa k’u hakili jigi Krista ka saya koo la samedilon, marisikalo tile 22nan na tileben kɔ. An b’a fɛ ka mɔgɔ sɔbɛw bɛɛ weele u ka na o kooba la min b’a yira ko Jehova ye nɛɛma kɛ hadamadenw ye.
12 I b’a fɛ ka mɔgɔ minw weele ka na, i k’u tɔgɔw sɛbɛ. Siga t’a la, i bena i somɔgɔw tɔgɔ sɛbɛ, ani fana i sigiɲɔgɔnw, i lɔnbagaw baarakɛyɔrɔ wala lakɔliso la, Bibulu kalanden kɔrɔw ani sisan taw, ani i be to ka taga bɔ mɔgɔ wɛrɛ minw bɛɛ ye. Ni ɲiningali be u dɔw fɛ Hakilijigi lajɛn koo la, gafe Qu’enseigne la Bible ɲɛɛ 206-8 ka barokun be se ka aw dɛmɛ k’u jaabi: o barokun ɲɛsinna Matigi ka surafana koo ma. O yɛrɛ be se ka kɛ sababu ye i fɛ ka bibulukalan daminɛ n’a tigi ye, sabu an be baara kɛ n’o gafe lo ye ka kalan kɛ ni mɔgɔw ye.
13 Balimamuso dɔ ye denbaya 48 tɔgɔw sɛbɛ a ka lisi kan. A tun mana welekan lase minw ma a tun b’o loon sɛbɛ ani a tun be tagamasiɲɛ dɔ kɛ u tɔgɔw gɛrɛ fɛ. A dusu diyara kosɔbɛ k’a ye ko mɔgɔ 26 sɔnna ka na Hakilijigi lajɛn na! Balimacɛ dɔ ye bitigitigi ye. A y’a ka baaraden weele a ka na Hakilijigi lajɛn na. O cɛɛ tun ye mɔnpɛricɛ dɔ lo ye fɔlɔ la, a sɔnna ka na. O kɔ, a kabakoyara ko: “Ne ye kalan min sɔrɔ Bibulu kɔnɔ lɛri kelen kɔnɔ, o ka ca ni ne ye min sɔrɔ saan 30 kɔnɔ katolikiw fɛ.” Hakilijigi lajɛn tɛmɛnen kɔ dɔrɔn, a sɔnna ka bibulukalan daminɛ gafe Qu’enseigne la Bible ? kɔnɔ.
14 Kanpaɲi: K’a ta samedi, marisikalo tile fɔlɔ ma fɔɔ ka taga se a tile 22nan ma, welelisɛbɛ kɛrɛnkɛrɛnnin dɔw bena tilan ka di mɔgɔw ma duniɲa kuru bɛɛ kɔnɔ walisa k’u weele ka na Hakilijigi lajɛn na. An bɛɛ ka kan k’an seen don bɛrɛbɛrɛ o kanpaɲiba la. A ka fisa an k’o welelisɛbɛ don mɔgɔw bolo sanni k’a to u ka bonda la. Nka ni kafo ka kiinw ka ca, diinan mɔgɔkɔrɔw be se k’a latigɛ ko aw be se ka welelisɛbɛw don nɛmɛnɛmɛ mɔgɔw ka bondaw jukɔrɔ n’u tɛ yen u ka soow kɔnɔ. Samedi ni dimansi, an bena zurunali kuraw yira fana mɔgɔw la.
15 Komi an bena o sɛbɛ jɛnsɛn wagati kunkurunin kɔnɔ, a ka fisa an kana kuma caaman. A’ ye kuma ni dusudiya ye ani teriya la. Aw be se k’a fɔ ko: “An b’a fɛ k’a filɛ ni aw n’a somɔgɔw ani a teriw ye sɛbɛ dɔ sɔrɔ min be mɔgɔw weele kooba dɔ kama, o min bena kɛ marisikalo tile 22nan na. Nin ye aw ta ye. Kunnafoniw bɛɛ b’a kan.” Ɲiningaliw be se ka sɔrɔ a tigi fɛ, wala a be se ka sɔn o sɛbɛ la ani k’a fɔ ko ale bena na. Minw y’u mako don, a’ y’u tɔgɔw sɛbɛ ani a’ ye labɛn kɛ ka segi ka taga bɔ u ye.
16 Salon, sɔrɔdasi dɔ ye Hakilijigi lajɛn welelisɛbɛ sɔrɔ a ka bonda la. A’ y’a latigɛ ka taga yen. Nka a tun ka kan ka sira deli a ka sɛrzan fɛ. A ye welelisɛbɛ yira sɛrzan la tuma min na, sɛrzan jera dɔɔni ka sɔrɔ k’a fɔ ko ale bangebagaw ye Jehova Seerew ye ani ko ale tun be to ka taga lajɛnw na n’u ye. A ye sira di sɔrɔdasi ma nka a ma dan o ma. Ale yɛrɛ y’a bila sira ka taga Hakilijigi lajɛn na!
17 Waleɲumanlɔn yira: Komi saan 2008 ka Hakilijigi lajɛn wagati be surunyana, an kelen-kelen bɛɛ ka miiri ka jatiminɛ kɛ Jehova ka nɛɛma kan, a ye min kɛ an ye. Ciden Pol y’a sɛbɛ ko: “An bɛ aw deli ko aw ye Ala ka nɛɛma min sɔrɔ, aw kana sɔn o ka kɛ fu ye.” (2 Kɔr. 6:1). An b’a yira cogo di ko Ala ka nɛɛma ma kɛ fuu ye an fɛ? Pol ko: “Nka an b’an yɛrɛw jira ko an ye Ala ka baarakɛla ɲumanw ye fɛn bɛɛ la.” (2 Kɔr. 6:4). O de kosɔn an b’a yira an ka jogo ɲuman n’an ka kisɛya fɛ kibaro duman waajuli la ko an be Jehova waleɲuman lɔn a ka nili kosɔn. Nin Hakilijigi lajɛn wagati la, an bena sababu ɲumanba sɔrɔ ka dɔ fara an ka cidenya baara kan walisa ka kibaro duman fɔ ka dafa.
[Study Questions]
1. Kibaro duman juman lo b’an fɛ k’a fɔ mɔgɔw ye?
2. Mun na Hakilijigi lajɛn wagati ye sababu ɲumanba ye an fɛ ka seereya kɛ kibaro duman koo la?
3. Mun lo bena gwamɔgɔw dɛmɛ u ka dɔ fara u ka cidenya baara kan?
4. N’an be taga baara la tuma bɛɛ, an be se k’an ka koow labɛn cogo di walisa ka kɛ piyɔniye kɔrɔsigi ye?
5. Farikolodɛsɛ be minw kan, i be se k’olu wala mɔgɔkɔrɔbaw dɛmɛ cogo di u ka kɛ piyɔniye kɔrɔsigiw ye?
6. Denmisɛn minw batisera ani u be lakɔli la, u be se ka kɛ piyɔniye kɔrɔsigi ye cogo di?
7. Diinan mɔgɔkɔrɔw be se ka mun lo kɛ ka cidenya baara diya don mɔgɔw la Krista saya Hakilijigi wagati la?
8. An be kalan juman sɔrɔ kafo dɔ ka ɲɛyirali la?
9. Minw ka koow dafara waajuli kama, mun na marisi, awirili ni mɛ kalow ye sababu ɲuman ye u fɛ ka kibaro duman waajuli daminɛ?
10. Diinan mɔgɔkɔrɔw be se ka mun lo kɛ walisa ka sumalenw dɛmɛ?
11. “Ala ka nɛɛma” bɛɛ la fisaman ye juman lo ye?
12. An ka kan ka jɔn lo weele ka na Hakilijigi lajɛn na?
13. Weleweledala fila dɔw y’u jija sɔbɛ la ka mɔgɔw weele ka na Hakilijigi lajɛn na. Jehova y’u ka jijali kɛli duga cogo di?
14. Kanpaɲi juman lo bena daminɛ marisi tile fɔlɔ la duniɲa kuru bɛɛ kɔnɔ?
15. An be se ka mun lo fɔ walisa ka Hakilijigi lajɛn welelisɛbɛ di mɔgɔw ma?
16. Wale juman b’a yira ko nafa b’a la ka kanpaɲi kɛ ka kiin mɔgɔw weele ka na Hakilijigi lajɛn na?
17. An b’a yira cogo di ko Ala ka nɛɛma ma kɛ fuu ye an fɛ?
[Box on page 3]
Jɔn fana be se ka kɛ piyɔniye kɔrɔsigi ye?
◼ Denbayaw
◼ Minw be baara kɛ tuma bɛɛ
◼ Mɔgɔkɔrɔbaw ani farikolo dɛsɛbagatɔw
◼ Lakɔlidenw
[Caption on page 4]
Welelisɛbɛw jɛnsɛntɔ:
◼ Kuma ni dusudiya ye ka surunya
◼ Makodon mɔgɔw tɔgɔw sɛbɛ ani segi ka taga bɔ u ye
◼ Zurunaliw yira mɔgɔw la samedi ni dimansi