Ɲɔgɔn jijali kabakoman
1 Loon kelen tɛ tɛmɛ ni Jehova sagokɛlaw ka lanaya ma kɔrɔbɔ. Komi Sitanɛ y’a lɔn ko a ka wagati tɔɔ man jan tugun, a b’a benkanni laban kɛ walisa k’an ka kantigiya tiɲɛ ( Jira. 12:12). A kɔrɔtalen be kosɔbɛ an k’an “barika bonya Matigi ni a ka sebagaya fangama la” walisa an “ka se ka kɛlɛ kɛ don jugu la, ani [an] selen kɔ o bɛɛ la, [an] jɔlen ka se ka to.”—Efes. 6:10, 13.
2 Ka lajɛn kɛ ni balima dannabagaw ye, o ye Jehova ka labɛn dɔ ye, a be min ta walisa k’an dɛmɛ ka sebagaya sɔrɔ. Ciden Pol tun y’a faamu k’o kɔrɔtalen be. A tun b’a fɛ kosɔbɛ ka kɛ n’a balima kerecɛnw ye walisa u ka “ɲɔgɔn jija” ani “ka sabati.” (Rom. 1:11, 12). Walisa ka barika don an na janko an ka Ala sago kɛ, Koow Ɲɛnabɔla Jɛkulu ye labɛn dɔ kɛ kanuya fɛ. O labɛn sababu fɛ, an be se ka nafa sɔrɔ ɲɔgɔn jijali la tile saba lajɛnba nata wagati la. O lajɛnba kuun ko: “Masaya ka wele weledala kisɛmanw”.
3 I ka kɛ yen walisa k’a nafa sɔrɔ: A laɲini ka kɛ lajɛnba tile saba bɛ kɔnɔ. An be nafa sɔrɔ a la n’an be kɔn ka na datigɛli dɔnkili ɲɛ, ani n’an tɛ segi ka taga n’an m’a fɔ “amiina” ni dusu gwɛ ye kuncɛli delili kɛnen kɔ (Esayi 48:17, 18). Walisa ka wagati labilanen sɔrɔ tile saba lajɛnba kama, mɔgɔ caaman mako bena kɛ a la ka kɔn ka labɛn ɲuman kɛ u ka baarakɛyɔrɔ la. Tiɲɛn na a be se ka gwɛlɛya i fɛ ka wagati labilanen sɔrɔ i ka baara ɲɛfɛmɔgɔw fɛ. Nka Jehova b’an jigi sigi ko a bena an dɛmɛ k’a sago kɛ (1 Yuh. 5:14, 15). N’an m’o ɲɛnabɔ fɔlɔ, sisan lo ye wagati ye ka labɛn laban kɛ taransipɔri ni jatigiya kama. An kana koow to u yɛrɛ ma. An ka la a la ko Jehova bena an ka jijaliw duga walisa an ka kɛ tile saba lajɛnba la.—Ntal. 10:22.
4 Jagwɛlɛya minw bena sɔrɔ, i ka miiri u kan: Yala i ma deli ka bɔ lajɛnba dɔ la i kɛtɔ k’a fɔ i yɛrɛ ye ko: “Lajɛnba nin ɲɔgɔn tɛ yen!” wa? Mun na i y’a miiri o cogo la? Katugu an ye hadamaden dafabaliw ye. Ani o kosɔn an barika be se ka ban dɔɔni dɔɔni. O kama an mako be jagwɛlɛya la hakilimaya ta fan fɛ (Esayi 40:30). Balimamuso dɔ y’a ɲɛfɔ ko: “Duniɲa nin be ne barika banna. Ne mako be kunkɔrɔta min na, lajɛnbaw b’o di n’ ma. O cogo la, u be ne dɛmɛ ka koow filɛcogo makɛɲɛ hakilimaya ta fan fɛ. A be i komi o jagwɛlɛya be na a wagati la, ne makoyaba tun b’a la wagati min na.” I be taga a sɔrɔ o ɲɔgɔn ye i fana sɔrɔ ka ye.
5 An tɛ jagwɛlɛya sɔrɔ kalanw ni mɔgɔw ka fɛtaw lamɛnni dɔrɔn fɛ. An ka lajɛnbaw faan nafaman wɛrɛw fana b’an jagwɛlɛya. Balima-cɛ dɔ y’a fɔ ko: “Bibulu ka sariyaw sira tagamacogo mana yira ka gwɛ cogo nɔgɔman na, o kɔni lo ka di ne ye. Siga si t’a la, drames nafa tɛ se ka jate. U b’a yira cogo min na fɔlɔfɔlɔ ka ɲɛyirali ɲumanw n’a jugumanw be se k’an kalan. Ne be fɛɛn minw makɔnɔ tuma bɛɛ, o ye gafe kuraw ye. Ne mana segi ka taga soo o kɔ, ne b’u kalan.”
6 “Wagati gɛlɛnw” ninw na, lajɛnba ye labɛn kɔrɔtalenw ye minw bɔra Jehova yɔrɔ (2 Tim. 3:1). U b’an dɛmɛ k’an janto ladili nin na, min bɔra Ala yɔrɔ: “A’ ye to aw ɲɛ na. Aw sinsinnen ka to dannaya la. A’ ye aw ja gwɛlɛya ka aw barika bonya.” (1 Kɔr. 16:13). O kama, an ka koo bɛɛ kɛ ka kɛ tile saba lajɛnba ka loon kelen kelen bɛɛ la. Ani, an ka ɲɔgɔn jijali nafaba diya bɔ o lajɛnba “Masaya ka weleweledala kisɛmanw” la!
[Picture on page 3]
Labɛn kɛ, ka kɛ
lajɛnba la tile saba bɛɛ
■ Wagati deli i ka baara kɛyɔrɔ la.
■ Siyɔrɔ dɔ mara ka bila lajɛnba dugu la.
■ Labɛn kɛ taransipɔri kama ka taga lajɛnba la.