Yala i deen be se ka koow latigɛ i n’a fɔ baliku wa?
1 Ka koo juman latigɛ i n’a fɔ baliku? N’u b’a fɛ k’a fura kɛ ni joli ye. Barokun dɔ tun bɔra saan 1991, zuwɛnkalo 15nan La Tour de Garde kɔnɔ, min tɔgɔ ko “An ka tagama ka kɛɲɛ ni Jehova ka cikanw ye.” A tun b’a yira ko Jehova Seerew ka denmisɛnw ka kan ka lɔ kelen kan k’a yira ko ŋaniya min b’u la ka Ala ka sariya bato joli ta fan fɛ, o ŋaniya kɔrɔtalen be u ɲɛɛ kɔrɔ i n’a fɔ a fana kɔrɔtalen be u bangebagaw ɲɛɛ kɔrɔ cogo min na. Yala i ka denmisɛn be se k’o kɛ wa?
2 Sariya be mun lo fɔ? Eta Zini jamana na, Illinois (ilinuwa) mara ka kititigɛda kunba lo ye kiti tigɛ k’a fɔ ko ni denmisɛn dɔ t’a fɛ u k’a fura kɛ ni joli ye, joo be se ka di a ma. O kititigɛda ye saan 17 balimamuso dɔ ka koo ɲɛnabɔ, ani a y’a latigɛ ko: “N’a gwɛnen be, ani siga t’a la ko deen kɔgɔra fɔɔ a be se k’a ka ŋaniya nɔfɛkow faamu, ani a be se ka koow jati minɛ i n’a fɔ baliku, o la, sariya be se ka joo di a ma a ka sɔn furakɛli dɔ la wala a ka ban a la.” O kama, walisa ka se k’a lɔn ni deen dɔ kɔgɔra fɔɔ see b’a ye ka koow latigɛ a yɛrɛ ma, dɔgɔtɔrɔw wala faamanw be se ka na baro kɛ n’a ye walisa k’a mɛn a daa la ko a tɛ joli fɛ. O la, deen ka kan k’a faamu ka ɲɛ ko a ka bana ka jugu. N’a y’a latigɛ ko a tɛ joli fɛ, a ka kan k’o ŋaniya nɔfɛkow faamu ka ɲɛ. O kɔ, a ka kan k’a fɔ ka gwɛlɛya ale yɛrɛ be min miiri Ala ka sariya koo la joli ta fan fɛ.
3 I deen bena na mun lo fɔ? Yala i ka denmisɛnw labɛnnen be koɲuman ka kuma u yɛrɛ ma joli koo kan wa? Yala u lanen b’a la n’u dusu bɛɛ ye ko Ala ka sariya lo b’a fɔ ko an k’an yɛrɛw tanga joli ma wa? (Kew. 15:29; 21:25). Yala u be se ka tɛmɛ Bibulu fɛ k’u ka lannakow ɲɛfɔ wa? Hali n’u bangebagaw tɛ yen, yala u bena na u jagwɛlɛya k’a yira k’u lɔra kelen kan ka ban joli la ni dɔgɔtɔrɔw y’a jati k’u niin be farati la wa? Komi barinan koow be se ka cun bɛɛ kan wagati bɛɛ, cogo juman na ile be se ka kɔn k’i deenw labɛn gwɛlɛya sifa bɛɛ kama n’u ka lanaya nana kɔrɔbɔ?—Waaj. 9:11; Efes. 6:4.
4 Bangebagaw, aw be se ka mun lo kɛ? Aw ka kunkanbaara lo k’aw deenw kalan u ka Ala ka miiriya lɔn joli ta fan fɛ (2 Tim. 3:14, 15). Gafe Comment raisonner be joli koo ɲɛfɔ ka gwɛ a ɲɛɛw 359-362nan na. A’ y’o ɲɛfɔli kalan ka ɲɛ n’a denbaya ye. Gafe ɲɛɛ 362-4nan na, barokun nin be yen: “Ni dɔ y’a fɔ i ye ko:” A’ ye tɛmɛ o barokun fɛ k’aw deenw degi u yɛrɛ lafasa cogo la. O la u bena deli a la k’u lannakow ɲɛfɔ ani k’a ɲɛfɔ mun na u lanen be o koow la (1 Piɛre 3:15). Gafe ninw be dɛmɛ wɛrɛ di an ma walisa k’an kalan joli koo la: Comment le sang peut-il vous sauver la vie? ani saan 2004, zuwɛnkalo 15nan La Tour de Garde ɲɛɛ 14-24nan. Ka fara o kan, videwo dɔw b’a yira ko siga t’a la, u be se ka banabagatɔ operasɔn kɛ wala k’a fura kɛ ni joli ma don a la. O furakɛcogo barika ka bon ani a bɛnnen be. O videwow ye: Alternatives à la transfusion — Le droit et les besoins des patients; Pas de sang : la médecine relève le défi. O videwow be sɔrɔ DVD nin kɔnɔ sisan: Des alternatives à la transfusion. Yala aw ka denbaya y’o videwow filɛ kɔsa la wa?
5 A’ ye aw ka denmisɛnw dɛmɛ u ka ‘Ala sago ɲuman, a duman, ni a dafalen faranfasi’ ka lɔn joli ta fan fɛ. O cogo la, u bena se ka koow latigɛ i n’a fɔ baliku ani u bena Jehova ka baraji sɔrɔ.—Rom. 12:2.
[Kalan ka ɲiningaliw]
1. Jehova Seerew ka denmisɛnw lɔra kelen kan ka mun kɛ joli ta fan fɛ? A’ ye ɲɛyirali dɔ di.
2. Denmisɛn dɔ tun banna joli furakɛli la minkɛ, kititigɛda dɔ y’o koo ɲɛnabɔ ka kɛɲɛ ni sariya juman ye? O koo be kalan juman di kerecɛn bangebagaw n’u denmisɛnw ma?
3. Bangebagaw ka kan ka ɲiningali jumanw jati sɔbɛ la, ani mun na?
4, 5. (a) Bangebagaw ka kunkanbaara ye mun ye, ani cogo juman na u be se k’o dafa? (b) Fɛɛn jumanw labilara bangebagaw ye walisa k’u dɛmɛ?