“Jama lajɛn”

1. An ka lajɛnbaw ani Israɛldenw ka lajɛnba kabakoman bɔnin be ɲɔgɔn ma koo jumanw na?

¹ Israɛldenw bɔnin kɔ Misira, a ma mɛɛn, Jehova y’a fɔ Musa ye ko a ka “jama lajɛn” Sinayi kulu kan. O lajɛn kuun tun ye ka Jehova ka kuma lamɛn walisa u ka siran a ɲɛ ani k’u deenw kalan a ka siraw la (Deter. 4:10-13). O kɛra loonba ye dɛ! Sababu tun lo u fɛ k’u ka limaniya barika bonya fana. Kalo nataw la, Jehova sagokɛlaw bena u ka lajɛnbaw kɛ walisa ka kalan sɔrɔ Jehova fɛ: tile saba lajɛnbaw ani lajɛnba minw labɛnna jamana caaman kama. An ka kan ka mun lo kɛ walisa ka nafa sɔrɔ bɛrɛbɛrɛ u la?

2. An ka ɲi ka mun lo kɛ walisa an “labɛnnin ka sɔrɔ” an ka tile saba lajɛnba kama?

² I “labɛnnin ka sɔrɔ”: Jehova y’a ɲini Israɛldenw fɛ ko u “labɛnnin ka sɔrɔ” o lajɛnba kabakoman kama min tun bena kɛ Sinayi kulu kan (Ɛkis. 19:10, 11). O cogo kelen na, a ɲinina an bɛɛ fɛ an k’an yɛrɛ labɛn koɲuman lajɛnba kama. Minw niin be lajɛnba ka kalanw koo la, a ma ɲini olu dɔrɔn fɛ u k’u yɛrɛ labɛn. Ɲɛyirali fɛ, mɔgɔ caaman ka ɲi ka sira deli u ka baarakɛyɔrɔ la. N’a sɔrɔ i ka koow cogoya bɔnin be Neemi ta ma. Ale tun ye masacɛ Aritasɛrisɛsi ka dɔlɔ dibaga ye. A tun b’a fɛ ka taga Zeruzalɛmu walisa k’o dugu kogo lɔbagaw dɛmɛ. Nka, a tun b’a lɔn ko masacɛ be se ka ban ka sira di a ma. Neemi ye delili kɛ o koo la ani a y’a jaa gwɛlɛya ka kuma masacɛ fɛ ni bonya ye. Masacɛ ye sira di a ma ani a yɛrɛ ye dɛmɛ di a ma walisa a ka se ka Zeruzalɛmu kogow lɔ (Neemi 2:1-9). Yala i ye sira deli i ka patɔrɔn fɛ wa? Ka fara o kan, i tun ye labɛn minw kɛ voyazi ni sibon kama, yala i y’a yira ka gwɛ k’o bele be seen kan wa? Mɔgɔ o mɔgɔ mako be dɛmɛ na, a bena diya diinan mɔgɔkɔrɔw ye k’o tigi dɛmɛ. Kɔn ka na loon o loon ani i bena kalan minw mɛn, i k’i yɛrɛ labɛn k’i “janto olu la kosɛbɛ.”—Eburuw 2:1, Bible senuma, 1996.

3. Mun lo bena an dɛmɛ k’an dusukun labɛn lajɛnba ka kalanw kama?

³ A kɔrɔtanin lo kosɔbɛ fana an k’an dusukun labɛn walisa ka lamɛnni kɛ ani ka kalan sɔrɔ (Ɛsid. 7:10). U bena kɔn ka lajɛnba porogramu bila jw.org kan. Kalanw bɛɛ ka barokunw be sɔrɔ o porogramu kɔnɔ. A yirala fana vɛrise jɔnjɔn kelen wala fila minw ɲɛsinna kalan kelen kelen bɛɛ ma. Lɔgɔkun damanin ka kɔn an ka lajɛnba ɲɛ, an be se k’o hakilinata ɲumanw lajɛ an ka gwa kɔnɔ batoli tuma na. Dɔw b’o porogramu bɔ sɛbɛ kan ani u be basigi o kan ka miiriya jɔnjɔnw sɛbɛ lajɛnba tuma na.

4. Bangebagaw be se ka tɛmɛ tile saba lajɛnba fɛ cogo di k’u deenw kalan?

⁴ I deenw kalan: Israɛldenw ye lajɛnba min kɛ Sinayi kulu kan, o kuun dɔ tun ye ko bangebagaw ‘k’u deenw kalan.’ (Deter. 4:10). Lajɛnba be sababu ɲuman di bangebagaw ma k’o ɲɔgɔn kɛ. U ka kan k’a to u deenw be sigi u kɔrɔ lajɛnba tuma na ani u k’u dɛmɛ u ka lamɛnni kɛ. Loon o loon, kalan bannin kɔ, u be se ka baro kɛ porogramu kan. U fana be se k’o kɛ u ka gwa kɔnɔ batoli tuma na lajɛnba tɛmɛnin kɔ.

5. An bena nafa juman lo sɔrɔ lajɛnba nata la?

⁵ Israɛldenw ye lajɛnba kabakoman min kɛ Sinayi kulu kan, a y’u dɛmɛ k’a faamu ko nɛɛma min dira u ma ka kɛ Ala sagokɛlaw ye, o ɲɔgɔn tɛ yen (Deter. 4:7, 8). An ka lajɛnba nata fana labɛnna walisa k’an nafa o cogo kelen na. Tile saba kɔnɔ, an bena bɔ Sutana ka duniɲa juguman nin kɔnɔ ani ka dusu suman sɔrɔ. An fana bena jɛnɲɔgɔnya hɛɛrɛman diyabɔ n’an balimaw ye min bena kɛ sababu ye ka barika kura don an na (Ezayi 35:7-9). Jehova ka loon be surunyana. O kama, sababu min dira an ma ka jɛn n’an balimaw ye walisa ka ɲɔgɔn jija, an kana fɔn o kɔ!—Eburuw 10:24, 25.