Yala aw ka waajuli kɛyɔrɔ ka bon wa?
1 K’a ta Jude ka dugubaw la ka taga a bila Galile dugu denninw na, Yesu ye seereyaba di Israɛl kɔrɔman kɔnɔ. A ka waajuli kɛyɔrɔ tun ka boon (Marka 1:38, 39; Luka 23:5). An fana ka kan ka kibaro duman lase mɔgɔ caamanba ma (Marka 13:10). Nka o be se ka kɛ baara gwɛlɛman ye. Mun na?
2 Afiriki tileben n’a cɛmancɛ na, kafo caaman ka waajuli kɛyɔrɔ fanba kɛra dugu denninw lo ye: minw jɛnsɛnnen be fɔɔ kilo tan ni kɔ. Kaan wɛrɛ kafow be waajuli kɛ jamaba yɔrɔw la, dugubaw kɔnɔ. U be mɔgɔw ɲini, minw be kuma olu ka kaan na. Mɔgɔ minw sigilen be o waajuli kɛyɔrɔbaw kɔnɔ, an be se ka mun kɛ k’u dɛmɛ ka tiɲɛn lɔn Jehova ni Yesu ni Masaya kan?
3 I labɛn koɲuman: Waajuli baara kɔrɔsibaga ani waajuli kɛyɔrɔ baaraden ka kan ka kafo ka baara ɲɛminɛ walisa tɔnɔn nafaman ka sɔrɔ a ka jijaliw la. Ni mɔgɔ caamanba be se ka waajuli kɛ tile kuru bɛɛ kɔnɔ samedi, n’a sɔrɔ labɛn dɔw be se ka kɛ dan na o kama. Waajuli kɛtɔ yɔrɔ jan na, labɛn kɛ walisa ka mɛɛn yen. I tagatɔ, domunifɛn dɔ ta i bolo tilera kama. Aw be se ka ɲɔgɔn kunbɛn joona. O cogo la wagati bena sɔrɔ ka taga waajuli kɛyɔrɔ la, wala ka lajɛn kɛ waajuli kɛyɔrɔ gɛrɛ fɛ. A’ ye jɛkuluw labɛn taransipɔri kama. Dɔw be se k’u tɔgɔla mobiliw ta. Bisi (bus) wala takasiw be se ka ta luwanse la. O cogo la, mɔgɔ caaman be se ka taga. A’ ye waajuli baara labɛn dugu denninw kɔnɔ tuma min na siraw ni wagati ɲɛɛ ka ɲi.
4 Walisa ka wagati nafaman kunmabɔ, kaan wɛrɛ fɔbagaw tɔgɔw n’u ladɛrɛsi kuraw ka kan ka sɔrɔ kaan wɛrɛ waajulikɛlaw bolo. Dugu karti (carte) kura fana ka kan ka sɔrɔ u bolo. Ladɛrɛsiw labɛn walisa weleweledalaw ka tɛmɛ u bɛɛ fɛ ka taga bɔ mɔgɔw ye o yɔrɔ nin na.
5 I janto ka gafe caaman ta i bolo. Ni waajuli ma deli ka kɛ o mara la, i be se ka sɛbɛnin wala zurunali kɔrɔman dɔ to soo dɔw kɔnɔ ni mɔgɔ tɛ yen. Ni sɛbɛnin Aimeriez-vous en savoir plus sur la Bible ? be yen, i mana mɔgɔ o mɔgɔ kunbɛn, a di a ma. Minw tɛ yen u ka soo, kelen to u ye.
6 A’ ye jɛn ka koow kɛ ka dafa: Ni waajuli kɛyɔrɔ ka boon, waajibi lo bɛɛ ka bolo di ɲɔgɔn ma ka baara kɛ kafo kɔnɔ. Ni taga yɔrɔ ka jan, minw be bolifɛn kelen kɔnɔ, u ka kan ka esansi musakaw sara ɲɔgɔn fɛ. N’i ye mɔgɔ sɔrɔ min sɔnna ka baro kɛ n’i ye, i ka hakili sɔrɔ. Kana ɲinɛ ko aw ka kan ka seereya di o mara mɔgɔ bɛɛ ma, ani ko jɛkulu tɔɔ b’i kɔnɔna. N’i b’a fɛ ka baro jan kɛ ni makodon mɔgɔ dɔ ye, labɛn kɛ walisa jɛkulu tɔɔ ka baara kana lalɔ.
7 Labɛn tigitigi kɛ walisa ka makodon bɛɛ magwɛn. Makodon mɔgɔ ka ladɛrɛsi ta. Ka fara o kan, a ɲini k’a ka telefɔni nimɔrɔ ta n’o be se ka kɛ. O cogo la i bena se ka seereya di a ma telefɔni fɛ. Ni tɔgɔ tɛ siraw la, wala nimɔrɔ tɛ boonw na, jaa dɔ bisigi kɛ wala lakalita dɔ kɛ. O bena i dɛmɛ k’o makodon mɔgɔ sɔrɔ viziti kura kɛtɔ.
8 Ka Yesu ka cikan nin sira tagama, o ye nɛɛma ye an fɛ dɛ! A ko: “Aw mana se dugu o dugu la, duguba wala dugu misɛn, aw ka mɔgɔ sɛbɛ ɲini.” (Mat. 10:11). O baara be wasaliba di mɔgɔ ma. Aw be jijali minw kɛ ka aw yɛrɛw di o kama, siga t’a la, Jehova bena o duga!