An k’a yira ko an be Ala ka Mara bololafɛnw jate
1 Tuma min na masacɛ Josiasi ye labɛn kɛ walisa ka batoso ladinɛ, a ye o baarakɛbagaw fo ko: “Wari min dira u ma, mɔgɔ kana u ɲininga o koo la, sabu u be baara kɛra ni kantigiya lo ye.” (2 Masak. 22:3-7, NW ). Bololafɛnw tun kalifara o cɛɛw ma. O fɛɛnw minɛcogo fɛ, u tun b’a yira ka gwɛ k’u be fɛɛn senumanw jate. Bi, an fana y’an sendon “Ala ka kibaro duman baara senuman na.” Bololafɛn minw kalifara an ma, an fana ka kan k’u minɛ ni kantigiya ye.
2 Waajulibaara la: Cira kɔrɔtalen be sɔrɔ an ka gafew kɔnɔ. Ani u sɔngɔ ka ca. N’an b’o faamu, o bena an lasun k’u jate i ko fɛɛn nafamanbaw. Mɔgɔ minw t’u mako don sɔbɛ la Bibulu ka cira la, an man kan k’an ka gafew di u ma. Ni mɔgɔ dɔ y’a mako don fitinin kibaro duman na, an ka kan ka sɛbɛnin dɔ di a ma sanni an ka gafe dɔ di a ma.
3 A to gafew jɛnsɛncogo k’a yira ko i b’u nafa jate. Kana u to yen foroba yɔrɔw la, sabu u bena yɛrɛkɛ yɔrɔ bɛɛ. Walisa i kana tiɲɛni kɛ, a filɛ ni gafew labilanen tɛ i fɛ soo ka sɔrɔ ka dɔ wɛrɛw deli. Ni zurunaliw delila ka caya i bolo k’a dama tɛmɛ, a ɲini ka dɔ bɔ i ka komandi hakɛ la.
4 I tɔgɔla gafew: An mako be gafe minw na tiɲɛn tiɲɛn na, an ka kan k’olu dɔrɔn lo komandi kɛ. An ka kan ka koow dama kɛɲɛ n’an be gafew ninw kɔni komandi kɛra: Bibulu deluxe, Bibles à références, ani gafebaw i n’a fɔ Concordance, Index, Étude perspicace ka kitabu kuturuw, ani gafe Prédicateurs. O gafew bɛɛ dilanko sɔngɔ ka gwɛlɛ.
5 Yala i b’i janto k’i tɔgɔ n’i ka ladɛrɛsi sɛbɛ i tɔgɔla gafew kan wa? O cogo la, i tɛna to ka gafe wɛrɛw deli ka bila i ka gafe tununenw nɔɔ na. N’i ka dɔnkili gafe, Bibulu wala gafe kalanta tununa, n’a sɔrɔ i bena a sɔrɔ fɛɛn tununenw cɛma Masaya Boon kɔnɔ wala lajɛnba yɔrɔ la.—Luka 15:8, 9.
6 An k’an jija ka baara kɛ n’an ka gafew ye ni hakili ye. O cogo la, i bena a yira ko Jehova ye Masaya bololafɛn minw kalifa an ma, i b’u minɛ ni kantigiya ye.—Luka 16:10.