An ka baara kɛ koɲuman n’an ka gafew ye
1. Yesu ye Jehova waleɲuman lɔn a ka labɛnw kosɔn. An be se k’a ladegi cogo di?
1 Yesu ye kabako kɛ ka domuni di jamaba ma. O kɔ, a ye labɛn kɛ walisa u ka o domuni tɔɔ bɛɛ cɛ a kana tiɲɛ (Mat. 14:19-21). Jehova tun ye domuni min di, Yesu ma sɔn o tɔɔ ka tiɲɛ. O ye ɲɛyirali ɲuman ye an fɛ walisa an ka kɛ “ɲuman dɔnbaaw ye”. An b’o yira an kɛtɔ ka baara ɲuman kɛ ni Jehova ka fɛɛnw bɛɛ ye, a be minw di an ma ka tɛmɛ soo kunnasigibaga kantigiman fɛ.—Kol. 3:15; Luka 12:42; Mat. 24:45-47.
2. An be se ka mun lo kɛ walisa zurunaliw kana ton an fɛ?
2 Zurunaliw: Zurunaliw ka teli ka ton ɲɔgɔn kan mɔgɔ fɛ. Tuma o tuma ni zurunaliw tɔɔ be to an fɛ, an b’o hakɛ min ta kafo kɔnɔ, an ka kan ka dɔ bɔ o la. Zurunali kɔrɔmanw do? Hali ni zurunaliw kɔrɔla, o tɛ dɔ bɔ u nafa la. Ni zurunali kɔrɔmanw tonnen b’an fɛ, n’a sɔrɔ waajulibaara kɔrɔsibaga wala diinan mɔgɔkɔrɔ dɔ be se k’an dɛmɛ ka cogoya ɲuman sɔrɔ walisa k’u di mɔgɔw ma kiin kɔnɔ.
3, 4. An ka kan k’an hakili to mun lo la n’an be gafew ta kafo kɔnɔ?
3 Gafe wɛrɛw: An be gafe min kofɔ mɔgɔw ye waajuli la, ni gafe wɛrɛ sugandira o nɔɔ na, an k’a filɛ fɔlɔ n’o gafe kura dɔw tɛ an fɛ soo kɔnɔ ka sɔrɔ ka dɔw minɛ kafo kɔnɔ. I mako be gafe hakɛ min na lɔgɔkun kɔnɔ, i janto k’o dɔrɔn minɛ. N’i y’u bɛɛ di mɔgɔw ma, i ka segi ka taga dɔw wɛrɛw minɛ kafo kɔnɔ tugun.
4 Ka ɲɛsin i tɔgɔla gafew ma, i mako be minw na tigitigi i k’olu dɔrɔn ta. I k’i tɔgɔ sɛbɛ u kan yɔrɔ min labila o kama. O la, n’u tununa i be se ka segi k’u sɔrɔ tugun. N’i be baara kɛ ni Watchtower Library ye CD-ROM kan, ani i b’i tɔgɔla zurunaliw mara, n’a sɔrɔ i mako tɛna kɛ a la ka La Tour de Garde ni Réveillez-vous ! kitabu kuturuw komandi kɛ tugun.
5. An ka kan k’an hakili to mun lo la n’an be gafew dira mɔgɔw ma?
5 N’an be gafew dira mɔgɔw ma: Mɔgɔ minw b’u mako don sɔbɛ la, an b’an jija k’an ka gafew di olu lo ma. An k’a to an hakili la ko an b’an ka cidenyabaara kɛ ni fɛɛn nafaman minw ye, u musakaw ye anw yɛrɛ lo kunko ye fɔlɔ. N’an be gafe di makodon mɔgɔw ma, an kana sigasiga k’a fɔ u ye k’u be se ka nili kɛ an ka baara kosɔn min be kɛra duniɲa kuru bɛɛ kɔnɔ.
6. Mun na an ka gafew nafa ka bon kosɔbɛ an fɛ, ani o b’an lasun ka mun lo kɛ n’u ye?
6 Yesu ye kabako kɛ ka domunifɛn di mɔgɔw ma, nka tuma caaman na a ye mɔgɔw balo Alako ta fan fɛ. Yesu y’a fɔ ko: “Dumunifɛn dama tɛ mɔgɔ balo, nka kuma minw bɛɛ bɛ bɔ Ala da la, a bɛ balo olu de la.” (Mat. 4:4). An ka gafew be mɔgɔw kalan Bibulu ka tiɲɛnkow la. Ɲɛnamaya banbali be sɔrɔ olu sababu dɔrɔn lo fɛ ( Yuh. 17:3). U nafa ka bon kosɔbɛ, an kana u tiɲɛ!