An ka hakili sɔrɔ n’an be baara kɛ n’an ka gafew ye minw basiginen be Bibulu kan
1 “Ne be aw ka gafew kalan kabini saan 1965. Kalan kɛtɔ, ne be Bibulu lajɛ ka filɛ, ani ne y’a ye ko aw ka gafew kɔnɔnakow bɛɛ basiginen be Bibulu kan. Ne y’a ɲini ka tiɲɛn lɔn Ala ni Yesu koo la tuma bɛɛ. Ayiwa, ne be se k’a fɔ ni kɔnɔgwɛ ye ko aw ka gafew ni Bibulu lo be ne dɛmɛna ka tiɲɛn jaabili sɔrɔ.” Cɛɛ dɔ y’o lo sɛbɛ ka ci Jehova Seerew ka tɔn sigiyɔrɔsoba ma. O lɛtɛrɛ kelen kɔnɔ, a y’a fɔ ko ale b’a fɛ ka Bibulu kalan ni Seere dɔ ye.
2 I n’a fɔ o cɛɛ, “Jɔnkɛ dannamɔgɔ hakiliman” ka gafew ka di mɔgɔ miliyɔn caaman fana ye duniɲa kɔnɔ. O gafew be mɔgɔ dɛmɛ ka Bibulu kalan (Mat. 24:45). Saan o saan, gafe caamanba be dilan walisa ka mɔgɔ kɔnɔgwɛw dɛmɛ u ka lɔnniya tigitigi sɔrɔ tiɲɛn koo la (1 Tim. 2:4). Cogo juman na an be se ka hakili sɔrɔ ka baara kɛ n’an ka gafew ye minw basiginen be Bibulu kan?
3 An kana tiɲɛni kɛ: Dɔɔni dɔɔni, gafew be se ka caya an bolo k’a dama tɛmɛ. Komi u nafa ka bon, an be se ka mun lo kɛ walisa tiɲɛni kana kɛ? An ka ɲi ka hakili sɔrɔ n’an be gafew tara kafo kɔnɔ waajuli kama. Sanni an ka gafe caaman deli waajuli kama, an be se ka kelen wala fila dɔrɔn ta fɔlɔ. N’an sera k’olu to mɔgɔw ye, an be se ka segi ka na dɔ wɛrɛw ta. O la, gafew tɛna fara ɲɔgɔn kan ka caya an ka soo kɔnɔ. O cogo kelen na, ni kalo tɛmɛnenw ka zurunali tora an bolo caaman, a ka fisa an ka dɔ bɔ an ka komandi hakɛ la.
4 Ni kafo ka gafew ka ca kojugu: Ni gafe dɔw ka ca kojugu kafo fɛ, balimacɛ min be gafekow ɲɛnabɔ, a be se k’a filɛ a sigida la ni kafo wɛrɛw tɛ se ka dɔw minɛ ka baara kɛ n’u ye. Weleweledalaw be se ka gafe kɔrɔmanw di Bibulu kalandenw ma, u somɔgɔw ma minw tɛ Seerew ye, ani mɔgɔ wɛrɛw fana ma. Minw jɛnna ni kafo ye kɔsa la, n’a sɔrɔ a bena diya olu ye k’o gafe kɔrɔw sɔrɔ ka mara u yɛrɛw ta ye.
5 An ka gafew dilanna kuun min kama, an b’a fɛ u k’o dafa: ka mɔgɔ kɔnɔgwɛw dɛmɛ u ka Jehova ka sagonata cɛɲumanba lɔn. Yesu ye kabako kɛ ka jamaw balo, nka a ma domuni tɔɔ to a tiɲɛna. O cogo kelen na, gafe minw be dilan ka di an ma, an ka kan k’an jija ka baara fisaman kɛ n’u ye (Yuh. 6:11-13). Cira min be sɔrɔ u kɔnɔ, a be se ka mɔgɔw niin kisi. Nka a tɛ se ka dusukun tilennenw sɔrɔ n’an ka gafew maralen be mɛmɛ kan wala an ka sakɔsiw kɔnɔ? O de kama, n’an be gafew tara waajuli kama, an kana a dama tɛmɛ. Ka fara o kan, an ka baara kɛ n’u ye hakilitigiya la walisa ka mɔgɔ wɛrɛw nafa.—Filip. 4:5.
[Study Questions]
1, 2. Mɔgɔ caaman be mun miiri an ka gafew koo la? O be na ni ɲiningali juman ye?
3. An be se ka mun kɛ walisa tiɲɛni kana kɛ an ka gafew la?
4. Ni kafo dɔ ka gafew ka ca kojugu, a be se ka mun kɛ?
5. Cogo juman na an be se k’a yira ko an ka gafew nafa ka bon an ɲɛɛ kɔrɔ?