Kana boli “fɛɛn fufafu” nɔɔ fɛ
1 Bi, mɔgɔ caaman be tɛmɛ I-mɛli (E-mail) fɛ ka kuma-ɲɔgɔnya kɛ. Denbaya mɔgɔw ni teriw be se ka tɛmɛ o fɛɛrɛ fɛ ka lakalitaw ni miiriya dɔw tilan ɲɔgɔn cɛ cogo bɛnnen na. Nka, ni daan ma sigi I-mɛli koo la, a be se k’an bila ka boli “fɛn fufafu” jumanw nɔɔ fɛ?—Ntal. 12:11.
2 Lasɔmini minw be I-mɛli koo la: Dɔw b’a jate k’u be magwɛrɛ Jehova ka ɔriganisasiyɔn na cogo fisaman na n’u ye kunnafoni dɔw sɔrɔ I-mɛli fɛ. U b’o jate i ko ɔriganisasiyɔn ka kunnafoni kuramanw. O kunnafoniw be se ka kɛ wale dɔw ye, wala Betɛli koo dɔ, lakalita dɔw balawo wala kɔrɔbɔli koo la, ani hali Masaya cidenyabaara lakɔli ka gundo dɔw. Dɔw be kɔrɔtɔ ka dama tɛmɛ k’o kunnafoniw lase mɔgɔ wɛrɛw ma. U jigi b’a la k’olu fɔlɔ lo bena o kunnafoniw yira u teriw la.
3 Tuma dɔw la, kunnafoniw ni walew fɔra ka yɛlɛma, wala k’a dama tɛmɛ. Wala, komi u b’a ɲini ka mɔgɔw kabakoya, mɔgɔ dɔw ka lakalitaw kɛra ngalon ye. Minw daa ka fiɲɛ k’o koo ɲɔgɔnw fɔ, tuma dɔw la, u yɛrɛ tɛ tiɲɛn bɛɛ lɔn o koow kan (Ntal. 29:20). Tuma dɔw la, hali ni mɔgɔ tɛ se ka la lakalita dɔ la, u b’a yira i ko baro diiman. O lakalita minw tilennen tɛ, wala u be mɔgɔ lafili, u bɔlen be “nsiirin” ma. Ani u tɛ mɔgɔ dɛmɛ ka Ala ɲɛsiranya sɔbɛ sɔrɔ.—1 Tim. 4:6, 7.
4 N’i ye kunnafoni dɔw jɛnsɛn, ani u ma sɔrɔ ka kɛ tiɲɛn ye, dusukasi ni ɲagamini minw bɔra o la, u jalaki dɔ b’i kan. Lakalita dɔ fɔra Dawuda ye k’a dama tɛmɛ ko a dencɛw bɛɛ fagara. A y’o mɛn minkɛ, a dusu kasitɔ y’a ka “finiw fara.” K’a sɔrɔ tiɲɛn na, a dencɛ kelenpe dɔrɔn lo tun sara. O deen kelen saya dimi tun b’a bɔ. Nka, o lakalita dama tɛmɛnen ye dɔ fara Dawuda ka dimi kan (2 Sam. 13:30-33). Tiɲɛn na, an t’a fɛ ka koo si kɛ min bena an balimaw lafili wala k’u fari faga.
5 Ala ye fɛɛrɛ min sigi sen kan: A to i hakili la ko an sankolola Faa ye kumaɲɔgɔnya fɛɛrɛ dɔ sigi sen kan: “Jɔncɛ kantigiman hakiliman.” Kunkanbaara dira o “jɔncɛ” ma k’a latigɛ kunnafoni min bena labila lanaya somɔgɔw kama, ani fana “wagati latigɛlɛn” min na o bena labila. O hakilimaya domuni labilanen be Ala ka Mara ɔriganisasiyɔn kelenpe bolo fɛ. Ala ye fɛɛrɛ min sigi sen kan, an ka kan ka ɲɛsin o ma tuma bɛɛ walisa ka kunnafoni bɛrɛbɛrɛ sɔrɔ. An man kan ka ɲɛsin ɔridinatɛri jɛkulu dɔ wala ɛntɛrinɛti ma.—Mat. 24:45.
6 Sites Web: Site Web daganen b’an fɛ. O ye: www.watchtower.org. ye. Sira dira o ma ka kunnafoniw labila jama kama. Kuun t’a la mɔgɔ dɔ, jɛkulu dɔ, wala kafo dɔ ka kunnafoni dɔw labɛn Jehova Seerew koo la k’u labila ɛntɛrɛnɛti kan. Dɔw ye Sosiyete ka gafew kɔnɔnakow labila ɛntɛrɛnɛti kan gwansan kama. Bibulusenw ni kalan bɔyɔrɔ minw be o gafew kɔnɔ, u y’o bɛɛ labila yen fana. U yɛrɛ ye lajɛnba ka kalan dɔw labila yen wari kama. Ka Jehova Seerew ka gafew bisigi sɛbɛ ɔridinatɛri fɛɛn dɔ fɛ, ani k’o tilan tilan ka di mɔgɔ wɛrɛw ma, wari kama wala gwansan, o ye sɛbɛbɔbagaw ka joo tiɲɛni ye sariya ɲɛ kɔrɔ. Hali ni dɔw b’a jate k’u be balimaw dɛmɛna o cogo la, o ma daga, ani daan ka kan ka sigi o koo la.
7 An kɛtɔ ka kumaɲɔgɔnya kɛ I-mɛli fɛ, n’an b’o kɛ ni hakilitigiya ni ceguya ye, siga t’a la, an hakili bena fa “fɛn ɲuman sɔngɔ gɛlɛnw ani fɛn dumanw na.”—Ntal. 24:4.