An ka kɛ ɲɛyirabagaw ye kɛwale ɲumanw na
1 An mana lajɛn caaman tile saba lajɛnbaw kama, o tuma kɔni, an be koow kɛ cogo min na, ani an be mɔgɔw minɛ cogo min na, an filɛbagaw b’o kɔrɔsi . O kama, an kelen kelen bɛɛ ka kan k’an janto Bibulu ka lasɔmini na. A ko an ka ‘kɛ hakilimanw ye. An yɛrɛ fana ka kɛ ɲɛyirabagaw ye kɛwale ɲumanw bɛɛ la.’ (Tite 2:6, 7). An ka kan ka jijaliba kɛ walisa ‘An si kana miiri an yɛrɛw ka koow la dɔrɔn, nka an bɛɛ kelen kelen ka miiri an mɔgɔɲɔgɔnw koo fana la.’ (Filip. 2:4). An k’a filɛ an be se k’o ladili sira tagama faan minw na an ka tile saba lajɛnba nata la, o min barokun ko “An ka nɔɔrɔ la Ala kan.”
2 Siyɔrɔ labɛnw: Minw be labɛn kɛra siyɔrɔ kama mɔgɔ wɛrɛ ka soo kɔnɔ, foroba yɔrɔw la, wala lotɛli la, cogoya ɲuman dira u ma ka kɛwale ɲumanw yira mɔgɔw la. Ka taga o koo fan fɛ, ladili dɔw filɛ nin ye: “Siyɔrɔ ɲinisɛbɛ” dafa koɲuman, ani a di sekeretɛri ma. I ye mɔgɔ daa min fɔ o sɛbɛ kan, i ka na n’olu dɔrɔn ye i ka jatigiso. Musaka minw sɔrɔla jii ni kuran koo la, a ɲini k’i jatigiw dɛmɛ k’u sara. Ni gasi dɔ sɔrɔla i siyɔrɔ la, teliya k’a fɔ lajɛnba ka koow ɲɛnabɔbagaw jɛkulu ye. N’an b’an dusu suman ni lotɛli baarakɛlaw ye, ani lajɛnba koow ɲɛnabɔbagaw jɛkulu ye, ani n’an b’u ka sariyaw sira tagama, an bena Ala ka hakili senu deenw yira, ani an bena kɛ ɲɛyirabagaw ye kɛwale ɲumanw na.—Gal. 5:22, 23.
3 Bangebagaw ni denmisɛnw: An ka duniɲa kɔnɔ, denmisɛn caaman ka kɛcogow man ɲi. Nka an ka denmisɛnw kɔni b’a yira k’u be dan na. O be tandoli la Jehova n’a ka ɔriganisasiyɔn kan. Nka, kunkow sɔrɔla tuma dɔw la, sabu bangebaga dɔw m’u deenw kɔrɔsi koɲuman (Ntal. 29:15). Bangebagaw man kan k’u deenw labila u yɛrɛw ma lotɛli kɔnɔ, pisini yɔrɔ fana la, mɔgɔ wɛrɛ ka soo kɔnɔ, wala lajɛnba kɛyɔrɔ la.
4 Ka kɔn lajɛnba ɲɛ, bangebaga dɔw y’a ye ko nafa b’a la ka baro kɛ n’u deenw ye. Tagamacogo min ɲininen be deenw fɛ, u y’u dɛmɛ k’o faamuya (Efes. 6:4). U ye denmisɛnw dɛmɛ u k’a faamu ko kerecɛn sɔbɛw ka kanuya “tɛ ko bɛnbali kɛ”, ani a tɛ “a yɛrɛ nafa ɲini.” (1 Kɔr. 13:5). Tile saba lajɛnba wagati latigɛra ka kɛ dan na walisa Jehova k’an kalan. U ka kɛwalew fɛ, denmisɛnw ni balikuw fana be se k’a yira k’u be bonya la o labɛn kan lajɛnba kɛyɔrɔ la, ani yɔrɔ wɛrɛ la fana.—Esayi 54:13.
5 An ka tagamacogo ɲuman be se ka kɛ sababuba ye ka ngalon miiriyaw bɔ mɔgɔw hakili la. Ani, a be se ka mɔgɔw sama ka don tiɲɛn batoli kɔnɔ (Mat. 5:16; 1 Piɛre 2:12). An be mɔgɔ minw bɛɛ kunbɛn an ka lajɛnba la, an k’a to u ka seereya ɲuman sɔrɔ an ka kɛwalew fɛ ani u minɛcogo fɛ. O cogo la, an bena a yira ko an ye ‘ɲɛyirabagaw ye kɛwale ɲumanw na’, ani an bena nɔɔrɔ la Jehova kan.—Tite 2:7.
6 Ka saniya, ani ka ladon koɲuman: An ka Ala saniyalen be, ani a ka koow ferekelen tɛ. An yecogo ka kan ka bɛn n’a ka sariyaw ye (1 Kɔr. 14:33; 2 Kɔr. 7:1). An farikolo, an kunsigi n’an sɔnfaraw ka kan ka saniya, ani an yecogo ka kan ka ɲɛ. Bi, mɔgɔ caaman b’u yɛrɛw labila ka cɛjuguya. Mɔgɔ minw tɔgɔ bɔra filimu wala farikolo ɲɛnagwɛ kosɔn, hali n’olu be fani don cogo ferekelen na, a ma fɔ ko an ka kan k’a kɛ ten fana. N’an be tugu sangawiliw kɔ, a be se ka gwɛlɛya mɔgɔw fɛ u ka tiɲɛn Ala batobagaw faranfasi ka bɔ mɔgɔ wɛrɛw la.—Mal. 3:18.
7 Fani doncogo min bɛnnen be kerecɛn baarakɛlaw ma: Ciden Pol kɛtɔ ka bataki ci kerecɛnw kɔrɔsibaga Timote ma, a ye musow jagwɛlɛya ko u “ka u masiri cogo bɛnnen na ka fini bɛnnen don minw bɛ u sutara. [ . . . ] U ka u masiri ni kɛwale ɲumanw ye. Muso minw ko u bɛ siran Ala ɲɛ, o bɛ bɛn ni olu cogo ye.” (1 Tim. 2:9, 10). N’an b’a fɛ ka la a la k’an ka fani doncogo labɛnna koɲuman, fɔɔ an k’an janto o koo la kosɔbɛ. Fani doncogo ka kan ka bɛn, ka saniya, ani ka kɛ ni majigilenya ye. A man kan ka kɛ yɛrɛyira ye, wala darabɔli ye.—1 Piɛre 3:3.
8 Pol ye ladili di fana ko musow “kana u yɛrɛw masiri ni kun digili sɔngɔ gɛlɛn ye, wala sanu ni kɔnɔnkisɛ sɔngɔ gɛlɛnw wala fini saramaw.” (1 Tim. 2:9). Kerecɛn musow kɛtɔ k’u yɛrɛw masiri k’a dama kɛɲɛ, o ye hakilitigiya sira ye u fɛ.—Ntal. 11:2.
9 Pol ye ladili min lase kerecɛn musow ma, o ladili ka miiriya ɲɛsinna kerecɛn cɛɛw ma fana. Fani doncogo minw be duniɲa ka miiriya yira, balimacɛw ka kan k’u yɛrɛw tanga o ma (1 Yuh. 2:16). Ɲɛyirali fɛ, jamana dɔw la, mɔgɔw ka faniw be wolowolo, ani u ka waga. Ani, o lo be sangawili la. Nka o fani doncogo ma bɛn Ala ka baarakɛla ma.
10 Lafiya wagati la: Kalan wagati la, balima caamanba ka fani doncogo ni kuun masiricogo ka ɲi kosɔbɛ. Nka lakalitaw b’a yira ko dɔw b’u yɛrɛ labila tuma min na u be taga wala u be bɔ lajɛnba la, wala tuma min na u be lafiyara tilera kalan bannen kɔ. Tiɲɛn na, mɔgɔ wɛrɛw be Ala ka mɔgɔw filɛ cogo min na, o be bɔ an ka fani doncogo n’an kuun masiricogo la: kalan tuma na wala wagati wɛrɛw la. Komi an be lajɛnba ka tagamasiɲɛ sɛbɛw bila an ka faniw kan, an ka fani doncogo ka kan ka bɛn kerecɛn cidenw ma tuma bɛɛ. Tuma caaman na, o be mɔgɔ wɛrɛw lasun k’an tando, ani o be sira di an ma ka seereya di u ma.—1 Kɔr. 10:31-33.
11 I ko yɛlɛmisɛn teriman be an ɲɛda cogo fisaya cogo min na, o cogo kelen na, fani doncogo ni kuun masiricogo ɲuman be bonya la an ka cira n’an ka ɔriganisasiyɔn kan. Mɔgɔ minw b’an kɔrɔsi tile saba lajɛnba “An ka nɔɔrɔ la Ala kan” wagati la ɲinan, u dɔw be se k’a ɲini k’a faamu mun kama an be dan na. Ani, n’a sɔrɔ u be se k’a fɔ ko: “An b’a fɛ ka taa i fɛ, k’a masɔrɔ an y’a mɛn [ani an y’a kɔrɔsi] ko Ala bɛ aw cɛma.” (Zak. 8:23). An ka fani doncogo n’an kuun masiricogo fɛ, an bɛɛ k’a yira ko an be Jehova bonya.
[Study Questions]
1. Lajɛnba la, mun na an ka kan k’an janto kosɔbɛ an tagamacogo la ?
2. Labɛn kɛtɔ siyɔrɔ kama, an ka kan ka mun lo to an hakili la?
3, 4. Denmisɛnw be se ka tandoli la Jehova kan cogo di? Ani, bangebagaw ka kunkanbaara ye mun ye?
5. An ka tagamacogo ɲuman be se ka nɔɔ juman to mɔgɔ wɛrɛw kan?
6. Mun na a kɔrɔtalen be an fɛ an ka saniya, ani an yecogo ka ɲɛ?
7. Cogo juman na an be se ka la a la ko an sawura bena bɛn ni 1 Timote 2:9, 10 ka ladili ye?
8, 9. Kerecɛn cɛɛw ni musow ka kan k’u janto lasɔmini juman na?
10. Mun na an ka fani doncogo n’an kuun masiricogo ka kan ka ɲɛ kosɔbɛ n’an be taga wala n’an be bɔ lajɛnba la, lajɛnba yɔrɔ la, ani kalan bannen kɔ loon o loon?
11. An ka fani doncogo n’an kuun masiricogo ɲuman be se ka nɔɔ juman to mɔgɔw kan?
[Box on page 4]
I janto mɔgɔ wɛrɛw la
▪ I natɔ lotɛli la, ani i bɔtɔ yen, i dusu suma.
▪ I ka denmisɛnw kɔrɔsi ka ɲɛ.
A to i sawura ka danbe la i kan
▪ I tagatɔ dugu la.
▪ Lajɛnba kɛyɔrɔ la.
▪ Lafiya wagati la.