“Aw taamacogo ka ɲa Alalɔnbaliw cɛma”

1. An ka lajɛnba nata la, mun na a kɔrɔtanin lo an tagamacogo ka ɲɛ?

¹ Saan o saan an ka tile saba lajɛnbaw tuma na, jama ɲɛɛ b’an kan. O lo kama, a kɔrɔtanin lo an tagamacogo ka bonya la an ka Ala kan (Lev. 20:26). An ka kɛwale ɲumanw ani an ka sawura ka kan k’a yira ka gwɛ ko an ye Krista ka kalanden sɔbɛw ye. Yanni dɔɔni an bena taga an ka lajɛnba la: tile saba ta wala min labɛnna jamana caaman kama. An bena a kɛ cogo di an “taamacogo ka ɲa Alalɔnbaliw cɛma” ani ka nɔɔrɔ la an sankolola Faa kan?—1 Piyɛri 2:12.

2. An bena sababu jumanw lo sɔrɔ ka kerecɛn jogow yira lajɛnba wagati la?

² I ka kɛ ni kerecɛn jogow ye: An be ɲɔgɔn kanu cogo min na ani “minw ma la Matigi la,” an b’olu minɛ cogo min na, o ni duniɲa mɔgɔw ka koow kɛcogo tɛ kelen ye fewu (Kɔlɔs. 3:10; 4:5; 2 Tim. 3:1-5). N’an be sira kan wala n’an be bolifɛn dɔ kɔnɔ ni jama ye an ka ɲumanya kɛ tɔɔw ye ani ka muɲu u kɔrɔ hali ni gwɛlɛya donna an ni u cɛ. Minw be baara kɛ an ye esansi feereyɔrɔw la, motow bilayɔrɔ ani a ɲɔgɔnnaw na, kɛcogo ɲuman ka kan k’an lasun k’a fɔ u ye ko a’ ni ce.

3. Bangebagaw ka kan ka mun lo kɛ, ani mun na do?

³ Bangebagaw ka kan k’u deenw kɔrɔsi koɲuman lajɛnba yɔrɔ la ani u jatigiso kɔnɔ (Talenw 29:15). Ɛrɛsitoran be lotɛli min kɔnɔ, ale ɲɛmɔgɔ dɔ y’a fɔ balimacɛ dɔ n’a muso ye ko: “Aw koo ka di anw ye. Aw fɛ, denbayaw n’u deenw sɔɔn ka ɲi ani aw be mɔgɔ bonya. An ka baarakɛlaw bɛɛ be aw kofɔ ani an b’a fɛ aw ka na yan wikɛniw bɛɛ la.”

4. N’an be lajɛnba dugu kɔnɔ, an ka ɲi k’an janto mun lo la an ka sawura koo la?

⁴ Fani doncogo bɛnnin: An ka lajɛnba tuma na, an ka ɲi ka fani don cogo bɛnnin na min b’a yira ko an majiginin lo. An man kan ka tugu duniɲa nin ka fani doncogo modɛliw kɔ minw man ɲi (1 Tim. 2:9). Lafiɲɛ tuma na lajɛnba yɔrɔ la, an kana an yɛrɛ labila kojugu wala ka fani don cogo ferekenin na. O la, a bena kɛ kunkɔrɔta ye an fɛ ka lajɛnba tagamasiɲɛ sɛbɛ to an ka faniw kan. An fana tɛna maloya ka seereya kɛ n’an ye sababu sɔrɔ. N’an sawura n’an tagamacogo ka ɲi lajɛnba tuma na, o bena a to Bibulu ka kibaro ka diya mɔgɔ kɔnɔgwɛw ye. O kibaro do be mɔgɔ kisi. Nka, o dɔrɔn tɛ dɛ! O fana bena Jehova dusu diya.—Sof. 3:17.

Hakilijigiko minw ɲɛsinna lajɛnbaw ma saan 2014 kɔnɔ

◼ Kalan kɛlɛriw: Boon daaw bena yɛlɛ 8H00 wagati la. Loon saba bɛɛ la, fɔlikan bena daminɛ ka fɔ 9H20. O wagati la, an bɛɛ ka kan ka sigi walisa kalan ka daminɛ cogo bɛnnin na. Juman ani samedi loonw, dɔnkili ni delili laban bena kɛ 16H55. Dimansi, dɔnkili ni delili laban bena kɛ 15H50.

◼ Lajɛnba minw labɛnna jamana caaman kama: O lajɛnbaw bena kɛ yɔrɔ dɔw la. A’ y’a to aw hakili la ko Betɛli ye kafo tigitigi dɔw ani jamana wɛrɛw kafoden dɔw lo weele o lajɛnbaw la. O labɛnw kɛtɔ, a ye jatiminɛ kɛ kosɔbɛ ka kɛɲɛ ni sigiyɔrɔw ni lotɛliw ka sibon hakɛ ye ani bolifɛnw bilayɔrɔ bonya ye. Jama be se ka caya k’a dama tɛmɛ ni weleweledala dɔw b’a latigɛ ka taga o lajɛnba dɔw la k’a sɔrɔ u ma weele yen. I weelela lajɛnba min na, ni koo dɔ y’a kɛ i ma se ka taga yen, ani i b’a fɛ ka taga lajɛnba wɛrɛ la, o man kan ka kɛ lajɛnba ye min labɛnna jamana caaman kama.

◼ Bolifɛnw bilayɔrɔ: Lajɛnbaw kɛyɔrɔ minw bɛɛ la balimaw lo be mɔgɔw ka bolifɛnw kɔrɔsi, wari tɛna minɛ. Bolifɛn bilayɔrɔ bena di mɔgɔw ma ka kɛɲɛ n’u na wagati ye. Komi bolifɛnw bilayɔrɔ man bon kojugu, a ka fisa aw ka jɛn ni dɔw ye ka bolifɛn kelen ta. Mɔgɔ minw ka bolifɛn plaki nimɔrɔ wala sɛbɛ dɔ b’a yira k’u ye namaraw ye, olu dɔrɔn lo be se k’u ka bolifɛnw bila namaraw ka bolifɛnw bilayɔrɔ la.

◼ Sigiyɔrɔ marali: Loon o loon, ni lajɛnba kɛyɔrɔ daa yɛlɛla, aw ye sabari aw kana a ɲini ka girin ka don tɔɔw ɲɛ walisa ka sigiyɔrɔ ɲini aw diyanye yɔrɔ la. Yɛrɛ-saraka hakili lo b’an lasun ka mɔgɔ wɛrɛw nafa ɲini fɔlɔ. O lo b’a yira ko an ye kerecɛn sɔbɛw ye ani o be mɔgɔw lasun ka Ala tando (Zan 13:34, 35; 1 Kor. 13:4, 5; 1 Piyɛri 2:12). Aw ni minw be soo kelen kɔnɔ wala bolifɛn kelen kan ani aw be bibulukalan kɛra ni minw ye, aw be se ka sigiyɔrɔw mara olu dɔrɔn lo ye. Sigiyɔrɔ dɔw marala mɔgɔkɔrɔbaw ni namaraw ye dan na. Minw be o ɲɔgɔnna mɔgɔw ladon yɛrɛ yɛrɛ la, olu la mɔgɔ kelen wala fila dɔrɔn lo be se ka sigi u gɛrɛfɛ sabu sigiyɔrɔw man ca o yɔrɔ la.

◼ Tilera dumuni: A’ ye na ni tilera dumuni ye aw bolo sanni aw ka bɔ ka taga a yaala kɛnɛma kalan banni kɔ midi. Aw be se ka aw ka dumuni mara minan fitinin dɔ kɔnɔ sigilan jukɔrɔ. Minanbabaw ni butelifɛnw daganin tɛ lajɛnba yɔrɔ la.

◼ Niliw: Lajɛnba yɔrɔ la, an be se k’an ka waleɲumanlɔn yira an kɛtɔ ka nili kɛ duniɲa kuru bɛɛ baara kama. Minw be tɛmɛ sɛkiw fɛ ka nili kɛ lajɛnba la, u ka kan k’o sɛkiw kɛ “Association les Témoins de Jéhovah du Burkina Faso” tɔgɔ la.

◼ Banakow: N’i be to ka fura dɔw ta, kana ɲinɛ ka na n’u ye lajɛnba yɔrɔ la sabu dɔ tɛna sɔrɔ o yɔrɔ la. Sukaro bana be minw na, olu b’u yɛrɛ sɔgɔ ni biɲɛ minw ye, u ka ɲi k’u fili faratifɛnw filiyɔrɔ la. U man ɲi k’u fili ɲamaɲama tɔɔw filiyɔrɔ la lajɛnba yɔrɔ la wala lotɛli la.

◼ An yɛrɛ tangacogo farati ma: A’ ye aw yɛrɛ kɔrɔsi aw kana talon wala ka tɛrɛndɛ ka ben ani k’aw yɛrɛ mandimi. Saan o saan, dɔw ka sanbaraw, sanko u ka sanbara seen janjanw b’a to u b’u yɛrɛ mandimi. Sanbara minw bɛnnin be i seenw ma ani u b’a to i be se ka tagama ɛsikaliyew n’a ɲɔgɔnna yɔrɔw la, a ka fisa i ka olu don.

◼ Minw tɛ mɛnni kɛ ka ɲɛ: Mɔgɔ bena se ka lajɛnba kalanw lamɛn arajo FM na. O kama, i ka na n’i ka arajo dennin ani ekutɛriw ye i bolo.

◼ Denɲɛninw ka wotorow ani sigilan minw be kuru: U daganin tɛ lajɛnba yɔrɔ la. Nka denɲɛninw ka sigilan minw be se ka siri lajɛnba sigilanw kan bangebagaw gɛrɛfɛ, olu ɲɔgɔn daganin lo.

◼ Parifɛnw: Lajɛnbaw fanba be kɛ boonw kɔnɔ yɔrɔ minw na vantilatɛriw be mɔgɔw fifa. O kama, an ka kan ka ɲumanya kɛ tɔɔw ye, an kɛtɔ ka latikɔlɔ ni parifɛn farimanw koo dama kɛɲɛ walisa an kana gwɛlɛya dɔ lase mɔgɔw ma nɛnɛkiri bana wala a ɲɔgɔnna bana be minw na.—1 Kɔr. 10:24.

◼ Makodon mɔgɔw dɛmɛcogo: Lajɛnba tuma na, n’an ye seereya kɛ sababu dɔ sen fɛ ani mɔgɔ dɔ y’a mako don, an ka sɛbɛ Veuillez suivre l’intérêt (S-43) dafa ka kunnafoniw di o tigi koo la. N’aw ye o sɛbɛ dɔ dafa, a’ y’a di gafew tilanyɔrɔ la wala a’ y’a di kafo ka sekeretɛri ma ni aw segira ka na aw ka kafo kɔnɔ.

◼ Ɛrɛsitoranw: I ka bonya la Jehova tɔgɔ kan i tagamacogo ɲuman fɛ ɛrɛsitoranw kɔnɔ. Fani min bɛnnin be kerecɛn cidenw ma, i k’o don. I ka wari dɔɔni di kado ye ɛrɛsitoran baaradenw ma ni mɔgɔw delinanko lo k’o kɛ.

◼ Lotɛliw:

Aw mako bena kɛ sibon hakɛ min na, a’ y’a ɲini u k’o dɔrɔn lo mara aw ye. Mɔgɔ daa min ka kan ka la boon kelen kɔnɔ, aw kana tɛmɛ o kan.
Boon min marala i ye, i kana o lasa fɔɔ n’i bolomako tɛ. N’i ka ɲi k’o kɛ, o fɔ joona joona lotɛli tigi ye walisa a k’o boon di mɔgɔ wɛrɛw ma n’u mako b’a la (Mat. 5:37). O kɔ, i k’a to u be nimɔrɔ dɔ di i ma k’o kɛ seere ye. N’i ma kɔn k’i nali lasa tile fila ɲɔgɔn, u tɛna i ka wari segi i ma.
I k’a lɔn ko n’i be tɛmɛ i ka banki karti fɛ ka lotɛli sara, lotɛli bena wari hakɛ dɔ bɔ i ka kɔnti la k’a mara. O wari bena kɛ i ka sibon sɔngɔ ye ani ka musaka wɛrɛw sara, i n’a fɔ n’i ye fɛɛn dɔw tiɲɛ a n’a ɲɔgɔnnaw. I ka wari tɔɔ tɛna segi i ma fɔɔ ni koow bɛɛ ɲɛnabɔra ka ban tile damanin i taganin kɔ.
Aw kana doni-ta-wotoro ta fɔɔ ni aw makoya sera a ma. Ani, a’ y’a segi a nɔɔ na joona walisa mɔgɔ wɛrɛ k’a mako ɲɛ n’a ye.
Lotɛli baarakɛla minw b’i dɛmɛ k’i ka minanw ta ani minw b’i ka sibon ladon, i ka wari dɔɔni di u ma kado ye ni mɔgɔw delinanko lo k’o kɛ.
N’i b’a fɛ ka tobili kɛ, i k’o kɛ yɔrɔ min na a daganin lo.
Lotɛli be dumunifɛn dɔw di a ka lonanw ma u k’u dumu lotɛli la, i n’a fɔ daraka, kafe ani galasi. An kana koow kɛ k’a dama tɛmɛ an kɛtɔ k’o fɛɛnw ta ka taga n’u ye lajɛnba la.
Aw ka lotɛli baarakɛlaw minɛ ka kɛɲɛ ni hakili senu deen cogoya ye tuma bɛɛ. A ka di u ye aw ka koow kɛ ni ɲumanya, muɲuli ni sabari ye sabu u be baara la mɔgɔ caaman kosɔn.
Bangebagaw ka kan k’u deenw kɔrɔsi tuma bɛɛ lotɛli lamini yɔrɔw la i n’a fɔ asensɛriw, pisini, mɔgɔw kunbɛn yɔrɔ, farikoloɲanagwɛ yɔrɔ ani a ɲɔgɔnnaw.
Sibon sɔngɔ minw kofɔra aw ye, o ye suu kelen ta ye, lanpo ma fara a kan. Ni u be wari wɛrɛ ɲini aw fɛ koo dɔ la aw ma min ɲini, aw kana o sara. A’ ye lajɛnba ka sibon koo ɲɛnabɔlaw jɛnkulu lalɔnniya o koo la joona.
Ni aw ye gwɛlɛya dɔ sɔrɔ aw ka sibon koo la lotɛli kɔnɔ, aw k’o ɲɛfɔ sibon koo ɲɛnabɔlaw jɛnkulu ye lajɛnba yɔrɔ la walisa u ka aw dɛmɛ.

◼ An k’an yɛrɛ di ka baara kɛ gwansan: Biro dɔ be lajɛnba yɔrɔ la o kama. Minw bɛɛ b’a fɛ k’u yɛrɛ di ka baara kɛ, olu be se k’u tɔgɔ di o biro mɔgɔw ma. Denmisɛn minw sii ma se saan 16 ma, olu fana be se ka baara ɲuman kɛ, nka fɔɔ u bangebaga wala u kɔrɔsibaga ka kɛ n’u ye. U bangebaga wala u kɔrɔsibaga be se ka sira di baliku wɛrɛ ma k’u ɲɛminɛ.