“Aw ka tugu koo ɲuman kɛli la tuma bɛɛ”
1 Kerecɛn ka ɲɛnamaya kɛcogo kɔrɔ ko ‘ka tugu koo ɲuman kɛli la mɔgɔw bɛɛ ye tuma bɛɛ.’ (1 Tes. 5:15). An tagatɔ tile saba lajɛnbaw la, an be se ka koo ɲuman kɛ mɔgɔ wɛrɛw ye cogoya caaman na. O wagatiw la, jama ɲɛɛ b’an kan. An be mɔgɔ minw bɛɛ kunbɛn, ani an b’u minɛ cogo min na, o lo be to u hakili la an koo la. Walisa an tɔgɔ ɲuman ka mara i ko Jehova Seerew, fɔɔ an k’a yira an ka kɛwalew fɛ ko an “be mɔgɔ bɛɛ bonya.” (1 Piɛre 2:17). O kɔrɔ ko ‘an si kana miiri an yɛrɛw ka koow la dɔrɔn, nka an bɛɛ kelen kelen ka miiri an mɔgɔɲɔgɔnw koo fana la.’ (Filip. 2:4) Labɛn minw kɛra siyɔrɔ kama lajɛnba la, an k’a filɛ cogo min na an be se k’u sira tagama.
2 Yala i y’a miiri ka labɛnw kɛ siyɔrɔ kama tile saba lajɛnba wagati la wa? Denbaya dɔw y’a miiri ko yɔrɔ labilanen bena sɔrɔ. Ani ko, olu mana se lajɛnba kɛyɔrɔ la lamisa wala jumalon sɔgɔma, u be se ka siyɔrɔ ɲini ka sɔrɔ. O ma daga. Aw minw bena jatigiya sɔrɔ mɔgɔ wɛrɛ ka soo wala lotɛli la, a’ ye aw janto hakilijigiko ninw na: (1) Siyɔrɔ ɲinisɛbɛ mana di i ma, a dafa koɲuman ani joona joona. (2) Mɔgɔ daa min sɛbɛra siyɔrɔ ɲinisɛbɛ kan, kana o tɛmɛ ani kana na ni mɔgɔ wɛrɛw ye. (3) Hali n’i siyɔrɔ cogoya m’i ɲɛɛ fa i ko i ka soo, i k’a waleɲuman lɔn. I be se k’o kɛ, i kɛtɔ k’i jatigiw dɛmɛ ka jii ni kuran sara. (4) Ni gasi dɔ sɔrɔla i siyɔrɔ la, i ka lajɛnba koow ɲɛnabɔbagaw lalɔnniya joona. (5) N’i ka siyɔrɔ la danfara sigira balimacɛw ni balimamusow ka sibonw cɛ, i ka bonya la lajɛnba ka koow ɲɛnabɔbagaw jɛkulu kan i kɛtɔ k’o labɛn sira tagama. N’i jigira lotɛli la, hakɛ to ka nin to i hakili la: (1) Dusu suman kɛ ni lotɛli baarakɛlaw ye, ani bonya la u kan. (2) Lotɛli ka cikanw bɛɛ sira tagama ka taga u ka yɔrɔ minɛcogo fan fɛ. (3) I ka deenw kɛwalew kɔrɔsi koɲuman. Bɛɛ ka jijaliba kɛ k’a janto mɔgɔ wɛrɛw ka kelenya na, ani ka tugu koo ɲuman kɛli la tuma bɛɛ n’an be jigira lotɛli la wala mɔgɔ wɛrɛ ka soo.
3 An ka denmisɛnw kalan koo ɲuman kɛcogo la: Tuma dɔw la, denmisɛnw labilara u yɛrɛma lotɛli la wala mɔgɔ wɛrɛ ka soo, ni baliku dɔ t’u kɔrɔsira, u kɛra gwɛlɛya sababu ye (Ntal. 29:15). Tuma dɔw la, bangebagaw bolo degunnen tun be baara wɛrɛ la. U ye denmisɛnw labila u yɛrɛw ma boon kɔnɔ, wala yɔrɔ wɛrɛ la lotɛli kɔnɔ, wala lotɛli yɔrɔ wɛrɛ la. Denmisɛn dɔw ka mankan cayara fɔɔ lotɛli mɔgɔw, wala jatigi, waajibiyara k’u bali u kana se boon yɔrɔ dɔw la. O ye lonan tɔɔw kɔnɔgwan ani k’u sɛgɛn, Seerew ani mɔgɔ wɛrɛw bɛɛ. N’i ye jatigiya sɔrɔ balima wala makodon mɔgɔ dɔ ka soo, hakɛ to k’a tigi ka cikanw sira tagama. I kana a tigi ka kelenya yɔrɔw daan tɛmɛ, wala yɔrɔ minw ma labila i ye. Hakɛ to, i janto a la k’i denmisɛnw be o cikanw faamu ani u b’o sira tagama.
4 Bangebagaw, ka kɔn lajɛnba ɲɛ, nafa b’a la aw ka wagati ta ka baro kɛ n’aw denmisɛnw ye. U k’a faamuya kerecɛn tagamacogo sifa min ɲininen be u fɛ tuma bɛɛ ani yɔrɔ bɛɛ la (Efes. 6:4). Ɲɛyirali fɛ, a’ y’a yira u la ko kerecɛn kanuya lakika “tɛ ko bɛnbali kɛ, a t’a yɛrɛ nafa ɲini. Ani a tɛ dimin joona.” (1 Kɔr. 13:5). Balikuw be se ka barika don o kumaw la u kɛtɔ ka ɲɛyirali ɲuman di walisa bɛɛ k’a ye. Denmisɛnw, aw be se ka tugu koo ɲuman kɛli la ni aw be aw bangebagaw kan minɛ, n’aw be bonya la jatigiw ka fɛɛnw kan, ani n’aw be aw janto mɔgɔ wɛrɛw la aw gɛrɛ fɛ (Kolos. 3:20). An bɛɛ lajɛnnen kɛtɔ k’an jija ka tugu koo ɲuman kɛli la bɛɛ ye, an be “an Kisibaa Ala ka kalan bonya ko bɛɛ la.”—Tite 2:10.
5 An ka tagamacogo ɲuman be nɔɔ ɲuman to an filɛbagaw bɛɛ kan. Nka a nɔɔ fana be u dɔw kan: minw b’an kɔrɔfɔra sababu dɔ kosɔn. An be koo o koo kɛ lajɛnba yɔrɔ la, ani a dugu kɔnɔ, an ka kumaw n’an ka kɛwalew ka kan k’a yira ko an b’a fɛ ka tugu koo ɲuman kɛli la: n’an be tagamana sira kan, n’an be domuni kɛra yɔrɔ dɔ la, wala n’an be seereya dira mɔgɔ ma hali n’an tun ma wili o kama.
[Picture on page 4]
Hakɛ to, i hakili to nin na:
■ Siyɔrɔ ɲinisɛbɛ dafa koɲuman, ani a wagati la.
■ Mɔgɔ daa min sɛbɛra siyɔrɔ ɲinisɛbɛ kan, kana o tɛmɛ ani kana na ni mɔgɔ wɛrɛw ye.
■ Lajɛnba ka koow ɲɛnabɔbagaw jɛkulu be min fɔ, i ka sɔn o la.
■ Bonya la lotɛli mɔgɔw kan, wala i jatigiw kan.