I be sɔn ka yɛlɛmani kɛ wa?

1. Komi duniɲa cogoya be yɛlɛma, an fana ka kan ka mun lo kɛ?

¹ Bibulu b’a fɔ 1 Korɛntikaw 7:31 kɔnɔ ko duniɲa nin be i n’a fɔ teyatiri, min na koow ani mɔgɔw cogoya be yɛlɛma tuma bɛɛ. Komi duniɲa nin cogoya be yɛlɛma, o kama an ka kan k’an ka waajuli kɛcogo, an ka porogramu ani an ka baro dadoncogo yɛlɛma tuma dɔw la. I be sɔn k’o yɛlɛmani kɛ wa?

2. Mun na an ka kan ka yɛlɛmani dɔw kɛ walisa ka tagama cogo kelen na ni Jehova ka ɔriganisasiyɔn ye?

² I ka waajuli kɛcogo: Kerecɛn kafo labɛnnin lo k’a ka koow kɛcogo yɛlɛma tuma bɛɛ. Tuma min na Yezu y’a ka kalandenw ci a siɲɛ fɔlɔ la, a y’a fɔ u ye ko u kana dumunifɛn ni wari ta u bolo (Mat. 10:9, 10). Nka kɔfɛ, a ye cikan wɛrɛ di u ma sabu a tun b’a lɔn ko waajuli baara bena kɛ yɔrɔ wɛrɛw la ani mɔgɔw tɛna a ka kalandenw minɛ ka ɲɛ (Luka 22:36). Saan kɛmɛkulu tɛmɛnin na, Jehova ka ɔriganisasiyɔn tɛmɛna fɛɛrɛ caaman fɛ ka waajuli kɛ ka kɛɲɛ n’o wagati ka koow cogoya ye. Balimaw tun be kibaro diiman sɛbɛ papiye kan k’a di mɔgɔw ma u k’o kalan. U tun be kuma arajo la ani u tun be mikro bila mobiliw sanfɛ walisa jama ka forobakalan dɔw lamɛn. Bi, mɔgɔ caaman sɔrɔ man di u ka soo. O kama u be to k’an jija ko, ka fara soo ni soo waajuli baara kan, an ka banba ka seereya kɛ forobayɔrɔw la ani sababu dɔw sen fɛ. U b’an jija fana ko an ka waajuli kɛ soo ni soo tileben tuma na n’o y’a sɔrɔ mɔgɔw be baara la tilefɛ. Jehova ka sankolola wotoro be to k’a tagayɔrɔ yɛlɛma yɛlɛma ka kɛɲɛ ni koow cogoya ye. Yala e fana be jɛn ka tagama n’a ye wa?—Ezek. 1:20, 21.

3. Cogo di an be se ka sanga sɔrɔ waajuli la n’an be baro dadoncogo yɛlɛma ka kɛɲɛ ni mɔgɔw makoya ye?

³ I ka baro dadoncogo: I ka kiinmɔgɔw be hami mun lo la? Wariko, denbayakow wala marifakɛlɛ koo lo wa? N’an b’a fɛ ka baro dadoncogo labɛn ka ɲɛ, a ka ɲi an ka kiinmɔgɔw ka gwɛlɛyaw n’u ka koow cogoya lɔn (1 Kor. 9:20-23). N’an lamɛnbaga y’a kɔnɔkow fɔ an ye, an kana a jaabi sanfɛ sanfɛ ani ka taga ɲɛ ni baro ye i ko an tun ye an yɛrɛ labɛn cogo min na. A ka fisa an ka baro dadoncogo yɛlɛma ka kɛɲɛ n’a tigi makoya ye.

4. Mun na an ka kan ka teliya ka yɛlɛmani don an ka waajuli kɛcogo la?

⁴ Yanni dɔɔni, duniɲa nin ka teyatirikow bena ban ani tɔɔrɔba bena daminɛ. “Waati caaman t’an bolo” tugun (1 Kor. 7:29). O kama, a kɔrɔtanin lo an ka yɛlɛmani don waajuli kɛcogo la. An k’o kɛ teliya la. O la, an bena se ka baara ɲuman caaman kɛ wagati kunkurunin kɔnɔ.