Tile kelen lajɛnba ka kalan kura
Bi tile la, kunnafoniw ka ca, minw b’an dɛmɛ k’an sɔnkun mara kɛnɛya la walisa an ka sii jan sɔrɔ ani ka ɲɛnamaya diya bɔ. Hakilimaya ta fan fɛ, an dusu cogoya kɔrɔtalen be ka tɛmɛ o kan. O kama, tile kelen lajɛnba nata ka barokun bɛnnen be kosɔbɛ, A ko: “An ka baara kɛ Jehova ye ni dusukun jɛlen ye.” (1 Tilew Kib. 28:9). O tile kelen lajɛnbaw bena daminɛ saan 2003, sɛputanburukalo la. An bena kalan juman sɔrɔ?
Kafokulu kɔrɔsibaga bena kalan kɛ barokun nin kan: “An ka mɔgɔ wɛrɛw dɛmɛ u ka baara kɛ Jehova ye ni dusu diya ye.” U bena dɔw ɲininga u ka fɛtaw la. Olu bena a yira ka gwɛ ko mɔgɔ minw b’a fɛ ka baara kɛ Jehova ye, n’an b’u ka makodon ladon, ani n’an be bibulukalan kɛ n’u ye, o be ɲagali lase an ma. Kalankɛla lonan ka kalan fɔlɔ bena dusu saalo ni jagwɛlɛya di bɛɛ ma. A barokun ko: “An k’an dusukun kɔrɔsi duniɲa ɲagaminen kɔnɔ.” Batɛmu kalan bena sɔgɔma ka kalanw kuncɛ.
Wula fɛ, kalan dɔ bena a yira cogo min na an be se ka mɔgɔ wɛrɛw dɛmɛ. A barokun ko: “An k’an bolo labila k’u dɛmɛ.” Bangebagaw be se ka mun kɛ walisa k’u deenw dusukun tanga nɔɔ juguw ma, ani k’u dɛmɛ ka magwɛrɛ Jehova la? Kalan nin bena ladili nɔgɔmanw di, ani a bena o kɛcogo yira. A kuun ko: “I deenw dɛmɛ u ka ɲagali Jehova la.”
Jehova be labɛnw kɛ walisa k’an dusukun mara kɛnɛya la ani barika la hakilimaya ta fan fɛ. Yala an be nafa sɔrɔ o labɛn kelen kelen bɛɛ la wa? Kalankɛla lonan ka kalan laban kuun ko: “An ka dusukun jɛlɛn mara Jehova ka baara la.” An be labɛn minw kɛ an ka hakilimaya marali kama, a bena sinsin o yɔrɔ naani kan. An be wagati joli ni jijali jumanw kɛ delili sɔbɛw kɛli la, Ala ka Kuma kalanni na, waajuli kɛli la ni kisɛya ye, ani lajɛnw kɛli la n’an balimaw ye? Yala an be se k’o koo dɔ kɛcogo fisaya wa?
Jehova be welekan nin lase: “I ka i dusu sin kalan ma, ka i tulo majɔ dɔnniya kumaw la.” (Ntal. 23:12). Kabini sisan, an ka labɛn kɛ walisa ka nafa sɔrɔ o kalan na, min be bɔ Ala ka Kuma kɔnɔ. N’an y’o kɛ, an bena fanga sɔrɔ ka to ka baara kɛ Jehova ye ni dusukun jɛlen ani dusu diya ye.