Tile kelen lajɛnba ka kalan kura

¹ Duniɲa ka kunnafoniw n’a ka karamɔgɔw be fɛntigiya tando. Nka Ala ka Kuma b’an jija an ka “nafolotigiya ka kɛ kɛwale ɲumanw kɛli ye.” (1 Tim. 6:18) O ye tile kelen lajɛnba nata ka kalankun ye. A be daminɛ sɛputanburukalo nata la. An bena jagwɛlɛya kuma jumanw sɔrɔ o lajɛnba la?

² “Ka kɛ nafolotigi ye Ala ka miiriya la”, o kɔrɔ ye juman ye? Kafokulu kɔrɔsibaga bena baro kɛ o kan. A bena dɔw ka fɛtaw ɲininga, minw b’u jijara ka kɛ nafolotigi ye Alako ta fan fɛ. Lonancɛ ka kalan fɔlɔ ko: “Kɛwale ɲumanw, siman tigɛ wagati la.” A bena a yira cogo min na Ala ka sagokɛlaw b’o kɛra. A bena an kelen kelen jagwɛlɛya an k’a filɛ cogo min na an be se k’an sendon a ɲɛ ma Ala ka siman tigɛ baara la bi.

³ An mana kerecɛn denmisɛnw ye u be bolila nafolo nɔfɛ Alako ta fan fɛ, o ka di an ye dɛ! O be nɔɔrɔ la Jehova kan, ani o be denmisɛnw dɛmɛ u ka nɛɛma baara nata juu ɲuman sigi. Kerecɛn denmisɛnw be kɛwale ɲuman minw kɛra an sigida la, kalan nin bena o yira ka gwɛ: “An ka denmisɛnw fo, sabu u ka wale ɲumanw be Jehova tando.”

⁴ Ka kɛwale ɲumanw ɲini, mun lo be sɔrɔ o la? Lonancɛ bena baro kɛ o kan a ka kalan laban na. A kuun ko: “To ka kɛwale ɲumanw kɛ, ani i ka Jehova ka dugaw sɔrɔ.” An be duga caaman sɔrɔ faan minw na, a bena o naani yira: (1) an tɔgɔla ta, (2) denbaya kɔnɔ, (3) kafo kɔnɔ, (4) ɔriganisasiyɔn kuru bɛɛ kɔnɔ duniɲa na.

⁵ Mɔgɔ minw y’u yɛrɛkun di Jehova ma, u bena se ka batise. N’i labɛnnen be k’o latigɛli dafa, kɔn k’a fɔ diinan mɔgɔkɔrɔw ɲɛbila ye joona.

⁶ Ni aw ka lajɛnba loon nana fɔ, teliya ka labɛn tigitigi kɛ janko i ka se ka taga yen. I jija ka kɔn ka na lajɛnba la walisa ka nafa sɔrɔ datigɛli dɔnkili ni delili la. An kɛtɔ ka na tile kelen lajɛnba la ani ka kalan lamɛn ni jantoli ye, o bena fanga di an ma walisa an ka to sira kan: sira min b’an kɛ nafolotigi ye tiɲɛn na an ka Ala, Jehova, ka miiri la.