Tile kelen lajɛnba ka labɛn kura

Tile kelen lajɛnba min bena kɛ waajulibaara saan nata la, a kalankun juu sigilen be koɲuman Bibulu kan: “A’ ye kolo Ala ye, a’ ye jɔ Sitanɛ ɲɛ ka a kɛlɛ.” ( Yaku. 4:7). Nin ye ladili ɲɛnama ye, min kɛɲɛnen be an ka wagati gwɛlɛn ma dɛ! An kɛtɔ ka kolo Ala ye, o be Sitanɛ lasu an kama. Lajɛnba bena a yira an na cogo min na an be se ka lɔ kelen kan Sitanɛ ka nanbaraw kama, minw dabɔra k’an ka lanaya nagasi. An bena nafolofɛn minw sɔrɔ Alako ta fan fɛ o lajɛn na, o dɔw ye jumanw ye?

“An ka gwa kɔnɔ, ka kɛɲɛ ni Ala sagoya ye, an ka kolo.” O kalan fɛ, sirikɔnsikiripsiyɔn kɔrɔsibaga bena a yira cogo min na an be se k’an ka gwa sabati walisa k’an lafasa duniɲa ka degunw ma. Lonan ka kalan fɔlɔ kuun ko: “Ka Sitanɛ kɛlɛ, o kɔrɔ ye min ye.” A bena a yira mun kama, ani cogo juman an ka kan k’an lafasa Sitanɛ ma sabu a b’a ɲini k’an ka hakilimaya nagasi. Yɔrɔ fila ɲɛsinna denmisɛnw yɛrɛw lo ma. Olu fana ka kan k’u yɛrɛw kɔrɔsi Sitanɛ ka nanbaraw ma. Kerecɛn caaman minw ye balikuw ye bi, olu banna duniɲa ka negew la tuma min na u tun ye denmisɛnw ye. A bena diya an ye k’olu ka fɛtaw lamɛn o kan.

Ka kolo kunna mɔgɔw ye, o ɲɛsinna hadamadenw bɛɛ ma. O kama, lonan ka kalan laban bena yɔrɔ naani yira, yɔrɔ minw na an ka kan ka kolo ka kɛɲɛ ni Ala sagoya ye: (1) faamanw, (2) kɔngeregasiyɔn kɔnɔ, (3) an tɔgɔla baara kɛtɔ, (4) gwa kɔnɔ. Nin ye kalan nafaman ye dɛ!

Minw b’a fɛ ka batise o lajɛn na, u ka kan k’a fɔ kɔngerega-siyɔn ka diinan mɔgɔkɔrɔw ɲɛbila ye joona. O lajɛnba loon mana fɔ, an k’a sɛbɛ kalandiriye kan. An bɛɛ ka labɛn kɛ walisa ka kɛ yen ka kalanw bɛɛ lamɛn. N’an be kolo Jehova ye fɔɔ abada, o bena duga banbaliw lase an ma.