An ka teriya yiriwa an ni Jehova cɛ

¹ Balimamuso dɔ sɔnna k’a fɔ ko: “Kabini saan 20 ɲɔgɔn, ne ye ɲɛnamaya min kɛ tiɲɛn sira kan, o danna ka taga lajɛnw na ani ka taga waajuli kɛ.” Nka a y’a fara a kan ko: “Ne bɔra a kala ma ko hali ni lajɛnw tagali ani waajuli kɛli kɔrɔtalen be, olu dɔrɔn tɛ se ka ne dɛmɛ gwɛlɛya wagati la. [...] Ne b’a faamu sisan ko ne ka kan ka koow filɛcogo yɛlɛma ka kɛɲɛ. Ani, ne ka kan ka kalan labɛnsira sɔbɛ sigi seen kan: labɛnsira min bena ne dɛmɛ sɔbɛ la ka Jehova lɔn, k’a kanu, ani a Dencɛ ye min di an ma, k’o waleɲuman lɔn.”

² Walisa ka jɛnɲɔgɔnya teriman kɛ ni Jehova ye, fɔɔ an ka jijali kɛ. O tɛ dan kerecɛn baaraw kɛli dɔrɔn ma ka kɛɲɛ ni labɛnsira dɔ ye. N’an fɔnna ka kumaɲɔgɔnya kɛ ni Jehova ye tuma o tuma, a laban, a bena kɛ an ɲɛɛ kɔrɔ i ko teri sɔbɛ kɔrɔ dɔ, an tɛ magwɛrɛ min na tugun (Jira. 2:4). An k’a filɛ cogo min na Bibulu kelenna kalan ani delili be se k’an dɛmɛ ka teriya yiriwa an ni Jehova cɛ.—Zab. 25:14.

³ Delili ni miirili kɛli kɔrɔtalen be kosɔbɛ: Kelenna kalan min be mɔgɔ dusukun balo, o kalan tɛ dan gafe ka hakilinata jɔnjɔn kɔrɔ cili ma, ani vɛrisew filɛri ma Bibulu kɔnɔ. Fɔɔ an ka miiri k’a filɛ kalan be min yira Jehova ka siraw koo la, a ka sariyaw n’a jogow koo la (Ekis. 33:13). N’an sera ka hakilimaya koow faamuya, o bena nɔɔ to an dusukunnataw kan, ani o bena an lasun an ka miiri an ka ɲɛnamaya kan (Zab. 119:35, 111). Kelenna kalan ka kan ka kɛ walisa k’an dɛmɛ ka magwɛrɛ Jehova la (Yaku. 4:8). Kalan sɔbɛ tɛ ɲɛ n’an ma wagati ta a kama, ani n’an ma sigi yɔrɔ ɲuman na. Walisa ka se k’o kɛ tuma o tuma, fɔɔ an k’an yɛrɛ kolo (Dan. 6:10). Hali n’i bolo degunnen be sɔbɛ la, yala i be wagati labila loon o loon walisa ka miiri Jehova ka jogo cɛɲumanbaw kan wa?—Zab. 119:147, 148; 143:5.

⁴ Delili dunba ye kelenna kalan sɔbɛ fanba dɔ ye. An mako be Ala ka hakili senu la walisa Bibulu ka tiɲɛn kalan k’an ka dusukunnataw sɔrɔ ani u k’an lasun ka “baara kɛ [Ala] ye ka a diyaɲekow kɛ ni Ala bonyali ni a ɲɛsiran ye” (Heb. 12:28). O kama, an man kan ka kalan daminɛ n’an ma Jehova deli a hakili senu la (Mat. 5:3). An kɛtɔ ka vɛrisew lajɛ Bibulu kɔnɔ, ani an kɛtɔ ka baara kɛ ni Jehova ka ɔriganisasiyɔn ka gafew ye, an b’an dusukun dayɛlɛ Jehova ye (Zab. 62:9). N’an be kalan kɛ o cogo la, a be kɛ batoli wale ye. O cogo la, an b’a yira ko an masirilen be Jehova la, ani o be barika don an ka kantigiya la.—Jude 20, 21.

⁵ I ko jɛnɲɔgɔnya wɛrɛw, an be jɛnɲɔgɔnya min kɛ ni Jehova ye, an ka kan k’a ladon tuma o tuma walisa a ka to ka yiriwa an ka ɲɛnamaya kɔnɔ. O kama, loon o loon, an ka to ka wagati kunmabɔ walisa ka magwɛrɛ Ala la. Sabu, an b’a lɔn ko ale fana bena magwɛrɛ an na.—Zab. 1:2, 3; Efes. 5:15, 16.

[Study Questions]

1. Balimamuso dɔ bɔra mun lo kala ma, a kɛtɔ k’a ka hakilimaya koow kɛcogo lajɛ?

2. Mun na a kɔrɔtalen be ka teriya yiriwa an ni Jehova cɛ?

3. An ka kan k’an ka kelenna kalan kɛ cogo juman na walisa an ka magwɛrɛ Ala la?

4. Ka delili kɛ sanni an ka kelenna kalan daminɛ, cogo juman na o b’an dɛmɛ ka teriya yiriwa an ni Jehova cɛ?

5. Mun na a kɔrɔtalen be an fɛ an ka miiri Ala ka Kuma kan loon o loon?