Gafe Approchez-vous de Jéhovah kalan bena daminɛ zanwiye tile 6nan na
1. Ka ta zanwiye tile 6nan lɔgɔkun ma, sababu juman lo bena an dɛmɛ k’an magwɛrɛ Jehova la?
1 Jehova b’a fɛ an k’an magwɛrɛ ale la (Zaki 4:8). O kama, k’a ta zanwiye tile 6nan lɔgɔkun ma, an bena a daminɛ ka gafe Approchez-vous de Jéhovah kalan Kafo ka Bibulu kalan na. O Gafe sɛbɛkun ye mun ye? A fɔra a dadon kumaw na ko: “Jehova be a ka jogo kelen kelen bɛɛ yira cogo min na, Yezu Krista fana ye o jogow yira cogo dafanin min na, n’an be wagati ta ka miiri o koo la, ani n’an b’a faamu cogo min na an fana be se k’u ladegi, o lo bena a to an b’an magwɛrɛ Ala la.” Kafo ye o gafe lajɛ saan 2004 ani 2005 kɔnɔ. Nka weleweledala miliyɔn fila ɲɔgɔn minw batisera o kɔ, a bena kɛ siɲɛ fɔlɔ ye olu fɛ ka Jehova ka jogo cɛɲumanbaw lajɛ koɲuman. Mɔgɔ minw ye gafe nin lajɛ fɔlɔ la, a kalan filanan bena a to Jehova ka jogow bena diya u ye tugun kosɔbɛ.—Zab. 119:14.
2. Kalan bena kɛ cogo di ni gafe Approchez-vous de Jéhova ye?
2 Kalan bena kɛ cogo min na: Kalan ɲɛminɛbaga bena a dadon ka surunya. N’a sɔrɔ a be se k’o kɛ ni kumasen kelen wala fila ye. Vɛrise minw ka ɲi ka kalan, o ma fɔ gafe kɔnɔ. O kama kalan kɛtɔ, vɛrise jɔnjɔn minw bena kalan, ɲɛminɛbaga lo ka ɲi k’u sugandi. Kalan kelen kelen bɛɛ bannin kɔ, a be se ka ɲiningali kelen wala fila kɛ walisa ka segi kalan kan. Ni koorilen nin “Éléments de méditation” be sɔrɔ sapitiri min kɔnɔ, segikanni bena kɛ n’o ye. Ni wagati be yen, kalan ɲɛminɛbaga be se k’a ɲini u ka koorilen ka vɛrise dɔw kalan. Ani, a be se ka ɲiningali wɛrɛw kɛ walisa ka mɔgɔw lasun u k’u ka miiriyaw fɔ.
3. Gafe kalantɔ, an ka ɲi ka mun lo kɛ, ani mun na do?
3 An k’a ɲini ka nafa bɛrɛbɛrɛ sɔrɔ o la: Kɔn k’i yɛrɛ labɛn hali n’i ye o gafe kalan fɔlɔ la. I daa don baro la. O cogo la i bena tanuli la Jehova kan. O bena a to i kana ɲina kalan kɔ. O bena tɔɔw fana nafa (Zab. 35:18; Eburuw 10:24, 25). Jehova ka jogo minw ɲɔgɔn tɛ yen, n’i miirila u koo la, i bena i magwɛrɛ a la koɲuman (Zab. 77:12-14). Ka fara o kan, i bena i cɛsiri k’a ka ciiw labato. O fana bena i lasun bɛrɛbɛrɛ ka Jehova kofɔ mɔgɔw ye.—Zab. 150:1-6.