An ka mɔgɔ sɔbɛw ɲini
1 Yesu ye ladiliw di waajuli baara kɛcogo kan. O baara be se ka gwɛlɛya. A y’a fɔ ko: “Aw mana se dugu o dugu la, duguba wala dugu misɛn, aw ka mɔgɔ sɛbɛ ɲini.” (Mat. 10:11). Bi, mɔgɔw tɛ wagati caaman kɛra tugun u ka soo. O la, cogo juman na an be se ka mɔgɔ sɔbɛw ɲini bɛrɛbɛrɛ?
2 I ka kiinw cogoya jati minɛ: A daminɛ k’i ka kiin cogoya jati minɛ fɔlɔ. Mɔgɔw ka teli ka sɔrɔ u ka soo tuma juman na? An be se k’u sɔrɔ yɔrɔ juman na tile fɛ? Yala loon fisaman dɔ be yen lɔgɔkun kɔnɔ, wala wagati fisaman dɔ be yen tile fɛ n’u bena sɔn ka lamɛnni kɛ wa? I be waajuli kɛ wagati min na, o makɛɲɛ ka bɛn ni mɔgɔw ka labɛnsira n’u ka koow cogoya ye. O be se k’i dɛmɛ ka tɔnɔ fisaman sɔrɔ.—1 Kɔr. 9:23, 26.
3 Weleweledala caaman ye sanga sɔrɔ u ka baara la, u kɛtɔ ka waajuli kɛ tileben tuma na. O wagati la, luu kɔnɔ mɔgɔ caaman lafiyanen be ka tɛmɛ tile fɛ kan, ani u be sɔn ka lamɛnni kɛ. Suu fɛ, an be se ka sanga sɔrɔ telefɔni seereya sen fɛ (n’a dagalen be). An fana be se ka kibaro duman lase mɔgɔw ma n’an be waajuli kɛ jagokɛyɔrɔ la, wala jama yɔrɔw la.
4 Baara kɛtɔ dan na kalo dɔ kɔnɔ, kafo dɔ ye labɛn kɛ waajuli kama samedi ni dimansi wula fɛ, ani tile fila wɛrɛ suuw fɛ lɔgɔkun kɔnɔ. U fana ye labɛn kɛ telefɔni seereya kama, ani waajuli kama jagokɛyɔrɔw la. O labɛnw ye dusudiyaba don kafodenw la waajuli kama fɔɔ kafo y’a latigɛ k’o labɛnw to sen kan kalo wɛrɛw kɔnɔ.
5 An ka timinandiya viziti kuraw kɛli la: Viziti kuraw kɛtɔ i ka kiinw kɔnɔ, n’a ka gwɛlɛ ka mɔgɔw sɔrɔ u ka soo, baro kelen kelen laban na, hali siɲɛ fɔlɔ la yɛrɛ, i ka bɛn n’u ye loon tigitigi wɛrɛ dɔ kan. O kɔ, la a la ko i bena kantigiya kɛ ka na o loon na (Mat. 5:37). N’a bɛnnen be, i be se k’a tigi ka telefɔni nimɔrɔ deli ka ta. O be se k’i dɛmɛ k’a tigi sɔrɔ kokura.
6 N’an b’an jija ka mɔgɔ sɔbɛw ɲini ani ka mɔgɔw ka makodon ladon, siga t’a la, Jehova bena an ka jijali kɛli duga.—Ntal. 21:5.