An ka Yesu ka miiriya ladegi
1 Hali n’an ma Ala Dencɛ ye ka ye, sɛbɛw be min fɔ a ka ɲɛnamaya n’a ka cidenya baara kan, o sen fɛ, an sera k’a kanu tiɲɛn na (1 Piɛre 1:8). A y’a ka sankolola lɔyɔrɔ nɔɔrɔman bila, ani a nana dugukolo kan walisa ka kolo a Faa sagonata ye. Tuma min na a kɛra hadamaden ye, a y’a yɛrɛ di ka baara kɛ mɔgɔw ye, ani a y’a ka ɲɛnamaya di hadamadenw kama (Mat. 20:28). Ala ka Kuma b’an jagwɛlɛya ko: “Nin miiri min tun bɛ Krista Yesu la, o yɛrɛ ka kɛ aw la.” Cogo juman na an be se k’a ka yɛrɛ saraka hakili ladegi?—Filip. 2:5-8.
2 N’an sɛgɛnen be: Hali ni Yesu tun ye mɔgɔ dafalen ye, a tun be sɛgɛ. Loon dɔ, a ye seereya dafalen di Samarika muso dɔ ma k’a sɔrɔ a tun ‘sɛgɛnnen be taama la.’ ( Yuh. 4:6). O gwɛlɛya kelen be kerecɛn caaman sɔrɔ bi. An mana baara kɛ ka sɛgɛ lɔgɔkun kɔnɔ, a be se ka gwɛlɛya an fɛ ka fanga sɔrɔ waajuli baara kama. Nka n’an be timinandiya ka waajuli kɛ, an bena a ye ko kerecɛnya baara be hakilimaya fanga kura don an na.—Yuh. 4:32-34.
3 Loon dɔ, Yesu n’a ka kalandenw ye yɔrɔ dɔ ɲini walisa ka taga lafiya dɔɔni u daan na. Nka jamaba dɔ bɔra o yɔrɔ kala ma, ani u bolila ka bila u ɲɛ yen. Sanni Yesu ka dimi u kɔrɔ, “u hinɛ donna a la”, ani a tora ka “u kalan fɛn caman na.” (Marka 6:30-34). Walisa an ka se ka bibulukalanw daminɛ ani k’u kɛ, fɔɔ an k’o miiriya kelen kɛ an yɛrɛ la, ani an ka jijali kɛ ni timinandiya ye, ani ka mɔgɔw kanu ni kɔnɔgwɛ ye. N’i tɛ bibulukalan kɛra ni mɔgɔ dɔ ye fɔlɔ, i kana i fari faga, to ka dɔ ɲini.
4 An ka Alakow bila koow bɛɛ ɲɛ: Piyɔniye kɔrɔsigi baara be se k’an dɛmɛ k’an hakili jɔlen to Alakow kan. Balimamuso dɔ y’a sɛbɛ ko: “Ne terimuso dɔ ka bamuso y’an fila jagwɛlɛya ko an k’an sen don piyɔniye kɔrɔsigi baara la n’ale ye kalo kelen kɔnɔ. Ne ninsɔn ka di tiɲɛn na sabu an sɔnna. A diyara ne ye ka balimaw lɔn cogo fisaman na, ani u ma mɛɛn ka kɛ komi ne ka denbaya. A diyara ne ye fana ka cogoya caaman sɔrɔ ka kuma mɔgɔw fɛ Jehova koo la, ani k’u kalan Masaya ka tiɲɛnko cɛɲumanbaw la. O bɛɛ sababu fɛ, ne y’a ye ko ne magwɛrɛla Jehova n’a ka ɔriganisasiyɔn na.”—Zab. 34:9.
5 An bɛɛ be bondori dɔ kɛ: an b’a fɛ ka diya Jehova ye nka an farisogo dafabali b’an kɛlɛ (Rom. 7:21-23). An ka kan k’an yɛrɛ lafasa duniɲa ka miiriya ma, min b’an lasun an kana jijali kɛ (Mat. 16:22, 23). A ka hakili senu barika la Jehova be se k’an dɛmɛ an ka see sɔrɔ o kan (Gal. 5:16, 17). An kɛtɔ k’an ka kisili makɔnɔ walisa an ka don Ala ka duniɲa kura tilennen kɔnɔ, an ka Yesu ka miiriya cogo ladegi an kɛtɔ ka Masayakow ni mɔgɔ wɛrɛw ka koow bila an yɛrɛ ta ɲɛ.—Mat. 6:33; Rom. 15:1-3.
[Study Questions]
1. Miiriya sifa juman tun be Yesu la?
2. Gwɛlɛya juman be kerecɛn caaman kan, ani mun lo be se k’u dɛmɛ ka see sɔrɔ o kan?
3. An be se ka Yesu ladegi ka mɔgɔw kalan ni diyanye ye cogo di?
4. Cogo juman na piyɔniye kɔrɔsigi be se k’an dɛmɛ an ka Kirista ka miiriya cogo ladegi?
5. Mun na an ka kan ka to ka jijali kɛ walisa ka Kirista ka miiriya cogo ladegi?