Tile fila lajɛnba bena an dɛmɛ k’an ka hakilimaya latanga
1. Jehova be labɛn minw kɛ k’an dɛmɛ k’an ka cii dafa o min ye ka kibaro duman jɛnsɛn, u la kelen ye juman ye?
1 Jehova labilanen lo ka kalan, fɔrɔmasɔn ani jagwɛlɛya di an ma walisa k’an dɛmɛ an k’a ka cii dafa o min ye ka kibaro duman jɛnsɛn (Mat. 24:14; 2 Tim. 4:17). An ka saan o saan tile fila lajɛnba ye o labɛn dɔ ye. Cidenya baara saan 2010 kɔnɔ, tile fila lajɛnba barokun ko: “I k’i ka hakilimaya latanga.” A basiginen be Romɛkaw 8:5 ani Jude 17-19 ka miiriya kan. A bena daminɛ saan 2009, utikalo tile 31nan lɔgɔkun na.
2. (a) Cogo di tile fila lajɛnba bena an nafa? (b) Tile fila lajɛnba tɛmɛnenw ye i dɛmɛ cidenya baara la cogo di?
2 An bena nafa min sɔrɔ tile fila lajɛnba la: Tile fila lajɛnba ka kalan bena an lasɔmi farati dɔw koo la i n’a fɔ ɲɛnagwɛko minw ka teli k’an ka wagati ta ani k’an mabɔ koo kɔrɔtalenbaw la. An bena a lɔn cogo min na an be se ka see sɔrɔ yɛrɛmabilaliya kan ani an bena a ye a kɔrɔ ye min ye ka kɛ Alamɔgɔ ye. Dimansi loon ka kalan kulu bena a yira cogo min na bɛɛ kelen-kelen ani denbayaw be se ka labɛnw kɛ k’u ka hakilimaya sabati degunw ani kɔrɔbɔliw kama u minw be cayara ka taga a fɛ. Kalan bena an dɛmɛ k’an dusukun latanga, ani ka to kɛnɛya la Alako ta fan fɛ. Minw be u ka hakilimaya latanga, kalan bena a to a ka gwɛ u hakili la ko u bena dugabaw sɔrɔ o la.
3. Aw ka tile fila lajɛnba nata bena kɛ tuma juman ani aw cɛsirinen be ka mun kɛ?
3 N’aw y’a lɔn dɔrɔn tuma min na ani yɔrɔ min na aw ka tile fila lajɛnba nata bena kɛ, a’ ye labɛnw kɛ walisa aw ka kɛ yen ani ka lajɛnba kalanw bɛɛ lamɛn. Aw ka la a la ko minw timinan ka di baara la, Jehova be olu duga.—Ntal. 21:5.
4. An jigi b’a la ko an bena mun lo sɔrɔ an ka tile fila lajɛnba nata la?
4 Tiɲɛn na, Jehova ye o nilifɛn ɲuman dibaga ye. Jɔncɛ kantigiman jɛnkulu ye porogaramu min labɛn, o bena kɛ kalan tigitigi ye min bena an dɛmɛ an ka to k’an ka cidenya baara kɛ. An be Jehova waleɲuman lɔn a ka labɛnw kosɔn, a ye minw bɛɛ kɛ ni kanuya ye walisa k’an dɛmɛ “an ka to an jigi fɔlen kan ka nɔrɔ a la kosɛbɛ.”—Heb. 10:23-25; Yak. 1: 17.