Tile kelen lajɛnba ka kalan kura

N’an ɲɛɛ be fɛɛn dɔ la wala an tulo b’a la a b’an lasɔmi ko balawo dɔ ka surun, nka n’an t’an janto a la, bɔnɛba be se k’an sɔrɔ. Alakow ta fan fɛ, a kɔrɔtalen be ka tɛmɛ o kan an ka tugu Jehova ka ɲɛminɛli kɔ. U bena sinsin o kan tile kelen lajɛnba nata la. O lajɛnba barokun ko “Aw k’aw ka mɛnni kɛcogo kɔlɔsi.”—Luka 8:18, LAYIDUKURA.

A ka kalan fɔlɔ kɔnɔ, kalankɛla lonan bena a yira cogo min na Pol ye lɛtɛrɛ min ci Heburuw ma hakili senu barika la, o lɛtɛrɛ sapitiri fɔlɔw ɲɛsinna an ma bi. Kuncɛli kalan barokun ko “A’ ye aw janto Ala ka kalan na tuma bɛɛ.” O kalan kɔnɔ, kalankɛla lonan bena bɛɛ dɛmɛ u k’a filɛ ni tiɲɛn na u be lamɛnni kɛra Jehova n’a Dencɛ ni “Jɔnkɛ dannamɔgɔ hakiliman” fɛ.—Mat. 24:45.

Lajɛnba kalan faan caaman bena denbayaw nafa ka tɛmɛ bɛɛ kan. “Denbaya minw be Ala ka Kuma lamɛn ni foyi tɛ u hakili ɲagami.” O kalan bena an dɛmɛ an ka duniɲa ka fɛɛnw bali u kana an ka hakilimaya nagasi. Mɔgɔ minw ye yɛlɛmani dɔw kɛ walisa ka Masayakow bila yɔrɔ fɔlɔ la, olu bena u ka fɛtaw fɔ o kalan kɔnɔ. “Ka Ala ka Kuma lamɛn ni jantoli ye, o be barika don an ka kamalenw ni sunguruw la cogo min na.” O kalan na, kamalenw ni sunguru dɔw bena u ka fɛtaw fɔ k’a yira cogo min na u ye lɔyɔrɔ ta tiɲɛn ta fan fɛ lakɔliso la, u filankuruw ɲɛ, wala waajuli la. “Denmisɛn minw be lamɛnni kɛ Ala fɛ, ani u be kalan a fɛ.” O kalan bena an dɛmɛ an kana a mafiɲɛya ko see be denmisɛnw ye ka kalan faamu. U bena denmisɛn dɔw n’u bangebagaw ɲininga u ka fɛtaw la. O bena an dɛmɛ an k’a faamu ko nafa b’a la k’a daminɛ ka denmisɛnw kalan Jehova sira la kabini u fitininman.

Ka Sitanɛ to a b’a la ka “dugukolo kan mɔgɔw bɛɛ lafili”, Jehova b’a yirala a sagokɛla kantigimanw la u ka kan ka sira min tagama ( Jira. 12:9; Esayi 30:21). N’an b’a ka ladili lamɛn ni jantoli ye, ani n’an be sɔn k’a sira tagama an ka ɲɛnamaya kɔnɔ, o bena an kɛ mɔgɔ hakilitigiw ye, an bena hɛɛrɛ sɔrɔ, ani o bena an bila ɲɛnamaya banbali sira kan.—Ntal. 8:32-35.