Tile kelen lajɛnba ka kalan kura

Hakili senu barika sababu fɛ, kerecɛn fɔlɔw ye kisɛya kabakoman kɛ ka kibaro duman wangola n’u seko bɛɛ ye (Kɛw. 1:8; Kol. 1:23). Waajulibaara saan 2007 ka tile kelen lajɛnba bena an dɛmɛ an ka tugu u ka ɲɛyirali ɲuman kɔ. A kalankun ko “An ‘ka waati bɛɛ ta ka waajuli kɛ.’”—Kɛw. 18:5.

Masacɛ Dawuda ye nin fɔ Ala ka Kuma koo la ko: “Matigi ka kalanw ye tiɲɛ de ye, u bɛ hakilitigiya di mɔgɔ ko dɔnbali ma.” (Zab. 19:8). Tile kelen lajɛnba ka kalan labɛnna koɲuman. A bena a yira ka gwɛ ko nafa be Bibulu la “latilenni kama.” A fana bena an jija an ka baara kɛ ni Ala ka Kuma ye walisa ka waajuli kɛ ani ka mɔgɔw kalan ni kɔrɔtɔ miiriya ye (2 Tim. 3:16, 17). A bena a yira cogo min na an be se k’an tanga jaanw ma, ani ka nafa sɔrɔ a la n’an be Bibulu ka sariyaw bato loon o loon. A fana bena an dɛmɛ ka baara kɛ ni Ala ka Kuma ye walisa ka denmisɛnw ni mɔgɔ kuraw dɛmɛ u ka ɲɛtaga sɔrɔ Alako ta fan fɛ.

I janto a la ko kalan bena daminɛ i ɲɛɛ na. Ani, i ka lamɛnni kɛ koɲuman. I ka hakilinataw sɛbɛ, minw ɲɛsinna i ma. I ka waleɲumanlɔn yira kalanw ni hakilijigikow kosɔn. Ani, i ka miiri cogo min na i bena u sira tagama.

Tile kelen lajɛnba kalan bena dɔ fara an ka waleɲumanlɔn kan Ala ka Kuma koo la. A bena an hakili jigi ko a kɔrɔtalen be an ka to ka Masaya kibaro duman waaju ni kisɛya ye. A fana bena a ɲɛfɔ cogo min na an be se ka mɔgɔ wɛrɛw dɛmɛ k’o ɲɔgɔn kɛ. O kama, i k’i cɛsiri janko i kana fɔn lajɛnba yɔrɔ si la, sabu Jehova b’an ɲɛminɛ ani a b’an kalan o cogo de la.—Esayi 30:20b, 21.