Dɛmɛ, min sɔrɔ ka nɔgɔ
1 Balimamuso Ana bolo degunnen tun be a ka baloɲini baaraw la. A cɛɛ fana tun ye dannabali ye. A tun ka gwɛlɛ kosɔbɛ a fɛ ka taga lajɛnw na, ka waajuli kɛ, ani ka Ala ka Kuma kalan tuma o tuma. A labanna ka sumaya Jehova ka batoli la. O bɛɛ n’a ta, a tun be Jehova kanu hali bele. A kunnadiyara, diinan mɔgɔkɔrɔw y’u janto a la k’a dɛmɛ.
2 N’an be sɔn kafo ka dɛmɛ la Alako ta fan fɛ, o b’a yira ko an b’an jigi la Jehova yɛrɛ lo kan. Diinan mɔgɔkɔrɔw be Yesu Kirista ka makari ladegi: u be cogoya ɲini k’u balimaw jagwɛlɛya, ani ka dɛmɛ nafaman lase u ma ni gwɛlɛyaw b’u kan Alako ta fan fɛ (1 Thes. 5:14). Tuma caaman na o balimaw mako be Bibulu ka jijali ni jigisigi kumaw damanin dɔrɔn lo la. Minw sumana wagati dɔ kɔnɔ, kerecɛnw bɛɛ ka kunkanbaara lo k’u dɛmɛ, diinan mɔgɔkɔrɔw dɔrɔn ta tɛ. Siga t’a la, “kuma [duman] bɛnnen min fɔra a waati la”, barika b’a la. An kelen-kelen bɛɛ delila ka nafa sɔrɔ o la.—Ntal. 25:11; Esayi 35:3, 4.
3 An k’a bɔ an yɛrɛ la: Minw mako be dɛmɛ la, n’an b’a fɛ k’an janto u la ni kanuya ye, an k’a bɔ an yɛrɛ la ka hinɛ u la sɔbɛ la. Tuma min na Jonatan bɔra Dawuda ka tɔɔrɔ kala ma, a “wulila ka taa Dawuda nɔfɛ tu kɔnɔ ka a ja gɛlɛya Ala la.” (1 Sam. 23:15, 16). An ka dɛmɛni kɛ nɛmɛnɛmɛ. Kuma mana fɔ ni ŋaniya ɲuman ye, a be don an lamɛnbaga dusu la bɛrɛbɛrɛ. Ka fara o kan, Yesu y’a yira ka gwɛ ko n’an b’a fɛ ka balima dɔ dɛmɛ a ka barika kura sɔrɔ Alako ta fan fɛ, fɔɔ an ka timinandiya, ani an k’an cɛsiri o kama (Luka 15:4). N’a negeba b’an na k’an balima dɛmɛ, an bena timinandiya hali n’a tigi tɛ ɲɛtaga kɛra joona-joona.
4 Balima minw be an ka kitabukalan jɛnkulu kɔnɔ, wala jɛnkulu wɛrɛ kɔnɔ, n’an y’a bɔ an yɛrɛ la k’u weele u k’an bila sira waajuli la, o be u jagwɛlɛya dɛ! N’an be balima dɔ dɛmɛna waajuli la, an be se ka tɛmɛ o sababu fɛ k’a jija a ka kisɛya. U dɔw b’a ɲinina ka sabati kokura Alako ta fan fɛ. An be wagati duman minw kɛ n’u ye Jehova ka baara la, o be jagwɛlɛya di u ma dɛ!
5 Labɛn, min tara ni kanuya ye: Balima minw ye waajuli dabila kabini wagati damanin, ani u tɛ na lajɛnw na, u mako be dɛmɛ wɛrɛ la walisa k’u ka lanaya sabati. I be taga a sɔrɔ u mako tigitigi be Bibulu kalan lo la gafe ninw kɔnɔ: Adorez le seul vrai Dieu, Approchez-vous de Jéhovah wala Qu’enseigne réellement la Bible ? Komi kerecɛn batiselenw lo ka ban, waajibi tɛ ka kalan kɛ n’u ye wagati jan kɔnɔ. Kafo ka waajuliko ɲɛnabɔbagaw jɛnkulu ka kan ka teliya k’a filɛ jɔn lo makoya be o labɛn na.—A’ ye barokun “Aw ka ɲiningaliw jaabiliw” lajɛ An ka Masaya Cidenyabaara kɔnɔ (saanw 1998 ani 2000, novanburukalo taw).
6 An kɔnna ka Ana min kofɔ, diinan mɔgɔkɔrɔw ye labɛn kɛ walisa balimamuso kɔgɔnen dɔ ka Bibulu kalan n’a ye. Ana y’u waleɲuman lɔn ka sɔn o labɛn na. Kalan kɛra siɲɛ naani dɔrɔn, o y’a dɛmɛ ka magwɛrɛ Jehova la kokura. A ye lajɛnw sira ta kokura, ani a ye nege sɔrɔ kokura ka Jehova tando bɛɛ ɲɛɛ na. Balimamuso kɔgɔnen y’a dɛmɛ waajuli la. A tun be to ka taga bibulukalanw kɛ n’a ye fɔɔ ale yɛrɛ nana fanga sɔrɔ ka waajuli kɛ soo ni soo. A mako tun be o dɛmɛ sifa lo la walisa k’a ka baaraw daminɛ kokura Alako ta fan fɛ.
7 Minw mako be dɛmɛ la, n’an be barika kura don u la, bɛɛ lo be baraji sɔrɔ a la. Mɔgɔ min b’o dɛmɛ sɔrɔ, o tigi be ninsɔndiya ka magwɛrɛ Jehova la ani k’a sen don Ala ka ɔriganisasiyɔn ka baaraw la. Diinan mɔgɔkɔrɔw be ɲagali k’a ye k’o tigi be ɲɛtaga kɛra Alako ta fan fɛ (Luka 15:5, 6). Ni kafodenw b’u janto ɲɔgɔnw na ni kanuya ye, u ka jɛnɲɔgɔnya be barika sɔrɔ (Kol. 3:12-14). Tiɲɛn na, kuun b’a la an ka Jehova ladegi, ale min ka dɛmɛ sɔrɔ ka nɔgɔ.—Efes. 5:1.
[Study Questions]
1. Cogo juman na mɔgɔ be se ka sumaya Alakow ta fan fɛ?
2. Cogo juman na kerecɛnw bɛɛ be se ka kɛ dɛmɛbagaw ye, dɛmɛ min sɔrɔ ka nɔgɔ?
3, 4. Ka mɔgɔ wɛrɛ dɛmɛ, o kɔrɔ ko di? O be kɛ cogo di?
5. Diinan mɔgɔkɔrɔw be se ka dɛmɛ juman lase tuma dɔw la?
6. Cogo juman na balimamuso dɔ ye fanga kura sɔrɔ Alako ta fan fɛ?
7. Nafa juman b’a la n’an be balima dɔ sabati Alako ta fan fɛ?