Denbaya ka wagati labɛnsira: Tilera kalan

¹ Kanuya be bangebaga minw na, u b’u jija ka domuni ɲɛnama di u deenw ma loon o loon. Nka a kɔrɔtalen be ka tɛmɛ u ka hakilimaya domuni di u ma, min be bɔ Ala ka Kuma kɔnɔ (Mat. 4:4). Aw be se ka hakilimaya domuni nege don aw deenw na cogo dɔ la walisa u ka ‘bonya ka kisili sɔrɔ’: ni aw be wagati ta loon o loon ka tilera kalan n’a ɲɛfɔli lajɛ denbaya kɔnɔ (1 Piɛre 2:2). Aw be se k’o kalan sigi wagati juman na denbaya ka labɛnsira kɔnɔ?

² Domuni kɛwagati la: Ni aw be tilera kalan kɛ ka sɔrɔ ka tile daminɛ, o be se ka aw dɛmɛ ka Jehova to aw hakili la tile kuru bɛɛ kɔnɔ (Zab. 16:8). Bamuso dɔ tun tɛ fɔn ka tilera kalan n’a ɲɛfɔli lajɛ ani ka delili kɛ n’a dencɛ ye darakan kɛwagati la sanni a dencɛ ka taga lakɔli la. O ye barika don deen na walisa a ka lɔ kelen kan ka ban k’a seen don faso kanuya koow la ani jatɔya koow la. O fana y’a dɛmɛ k’a jagwɛlɛya ka seereya di lakɔlidenw ni karamɔgɔw ma. Hali n’ale kelenpe lo tun ye Jehova Seere ye o lakɔliso kɔnɔ, o kelenya m’a sɛgɛ.

³ Ni a man nɔgɔ aw fɛ ka tilera kalan kɛ sɔgɔma, aw be se k’a lajɛ kɔfɛ, n’a sɔrɔ surafana wagati la. O wagati la, dɔw be baro kɛ fana waajuli baara walew kan, ani u ye hakilinata minw sɔrɔ Bibulu kɔnɔ u ka kelenna kalan kɛtɔ. Seere caaman hakili be o surafana wagati ɲɔgɔnw na: olu fɛ, o ye u ka denbaya wagati duman dumanw lo ye.

⁴ Suu fɛ: Denbaya dɔw be tilera kalan lajɛ ka sɔrɔ ka taga la: o lo ye wagati fisaman ye olu fɛ. O fana be se ka kɛ sababu ɲuman ye denbaya mɔgɔw fɛ u be delili kɛ ɲɔgɔn fɛ. Ni aw ka deenw tulo b’a la ko aw be kuma Jehova koo la, ani aw b’a deli loon o loon, Jehova be kɛ mɔgɔ yɛrɛ yɛrɛ ye u ɲɛɛ na.

⁵ Aw be baara ɲuman min kɛ ni gafenin Examinons les Écritures chaque jour ye walisa ka tiɲɛn kalan don aw deenw kuun na, an be Jehova deli a k’o jijali kɛli duga.