A ɲini k’i ka waajuli kɛcogo fisaya: Mɔgɔ kuraw degicogo

Mun na a kɔrɔtanin lo: Yezu ka kalanden kuraw ka kan k’u yɛrɛ degi k’a ka ciiw bɛɛ labato. O cii dɔ ye ka mɔgɔw kalan u ka tiɲɛn lɔn (Mat. 28:19, 20). Kalanden kura caaman y’u tɔgɔ sɛbɛ ka ban lakɔli la. N’a sɔrɔ u yɛrɛ ye seereya kɛ u somɔgɔw wala u teriw ye sababu dɔw sen fɛ. Ni kalan tora ka diya u ye ani u y’a faamu ko Jehova b’a fɛ mɔgɔ sifaw bɛɛ ka kibaro diiman mɛn, n’a sɔrɔ u bena a ɲini k’u seen don waajuli baara la (Ɔrɔm. 10:13, 14). Ni sira dira u ma ko u ka waajuli daminɛ, o bena kɛ ɲɛtagaba ye u fɛ Alako ta fan fɛ. U mako bena kɛ fɔrɔmasɔn ɲuman na walisa u hakili ka sigi koɲuman waajuli la.—Luka 6:40.

A kɛcogo:

Weleweledala kura mako bena kɛ gafe minw na waajuli ni bibulukalanw kama, a dɛmɛ a k’u sɔrɔ. A yira a la i b’i ka sakɔsi labɛn cogo min na. Gafe minw b’a kɔnɔ, u kelen kelen bɛɛ kuun ɲɛfɔ a ye.
A’ ye yiracogo modɛli dɔ sugandi An ka Masaya Cidenyabaara kɔnɔ, ani a’ y’o kɛ ka filɛ. A tigi jija a k’o yiracogo fɔ a yɛrɛ kumacogo la. Waajuli kɛcogo dɔw kofɔra gafe École du ministère ɲɛɛ 82 kan. U minw ɲɛsinna aw ka kiin ma, a’ ye olu lajɛ. A fɔ ka gwɛlɛya ko a kɔrɔtanin lo an ka fani don ani an k’an kuun masiri cogo bɛnnin na.—2 Kor. 6:3, 4.
To k’o weleweledala kura degi dɔɔni dɔɔni. Waajuli kɛyɔrɔ karti dɔ yira a la. A ɲɛfɔ a ye a ka ɲi ka kunnafoni minw sɛbɛ ni mɔgɔ dɔ y’a mako don. A ɲɛfɔ a ye waajuli be kɛ ni jw.org ani gafe nin ye cogo min na: Une bonne nouvelle pour des gens de toutes nations. Mɔgɔ minw y’u mako don a fɛ, u dɛmɛcogo yira a la.—1 Kor. 3:6.
I ka muɲu a kɔrɔ ani i k’a tando (Talenw 25:11). I ka kɛ ɲɛyirali ɲuman ye a fɛ. N’a ɲɛɛ b’a la ko i kisɛyanin lo ani i b’i mako don a la, o bena nɔɔ ɲuman to a kan fɔɔ saan caaman na.

Nin kɛ ka filɛ kalo nin na:

Waajuli kɛ soo ni soo n’i ka kalanden ye. A to fana a k’i bila sira viziti kura wala bibulukalan dɔ la. Ni kalanden t’i fɛ, weleweledala min tɛ se waajuli la koɲuman, a ɲini ka waajuli kɛ n’ale ye.