An ka bibulukalanw daminɛ sodaw la ani telefɔni fɛ
1 Bi, mɔgɔw bolo degunnen be. O bɛɛ n’a ta, u caaman b’u mako don Alakow la. Cogo juman na an be se k’u dɛmɛ k’u yɛrɛw wasa Alakow la (Mat. 5:3)? Weleweledala caaman be se ka bibulukalan kɛ ni mɔgɔw ye u ka sodaw la wala telefɔni fɛ. Yala i be se ka dɔ fara i ka waajuli baara kan o cogo la wa?
2 N’an b’a fɛ ka bibulukalanw daminɛ, fɔɔ an k’an labɛn k’a kɛcogo ɲɛyira mɔgɔw la ni sababu dira an ma tuma o tuma. An be se k’o kɛ cogo juman na ani yɔrɔ juman na?
3 Sodaw la: N’an ye mɔgɔ dɔ kunbɛn min sɔnna ka baro kɛ Bibulu koo la, nka n’a t’a fɛ k’an ladon a ka boon kɔnɔ, an ka gafe dayɛlɛ dɔrɔn ka dakun dɔ ta, an tun kɔnna ka min labɛn kalan kama. A be se ka kɛ kitabunin Ɲini ka kalansen fɔlɔ, dakun fɔlɔ ye. An k’o dakun kalan, an ka dakun ka ɲiningali bila, ani an ka baro kɛ dakun ka vɛrise kelen wala fila kan. Tuma caaman na, an be se ka sin k’o kɛ soda la, miniti looru ni miniti tan cɛ. Ni baro diyara a tigi ye, an ka labɛn kɛ walisa ka segi ka na dakun nɔfɛta kelen wala fila lajɛ wagati wɛrɛ la.—Ladili wɛrɛw be sɔrɔ saan 2002, zanwiye ka An ka Masaya cidenyabaara ɲɛɛ 6nan kɔnɔ. U b’a yira cogo min na an be se ka sin ka bibulukalanw daminɛ.
4 An be se ka tɛmɛ o kɛcogo kelen fɛ ka bibulukalanw daminɛ n’an be viziti kuraw kɛra. Ɲɛyirali fɛ, an be se ka kitabunin Ɲini bɔ, ka kalansen 2nan ta, ani ka baro kɛ Ala tɔgɔ koo la dakun 1-2nan kɔnɔ. Viziti kura nɔfɛta kɛtɔ, an be se ka dakun 3-4nan ta k’a yira Bibulu be min fɔ Jehova ka jogow koo la. Siɲɛ wɛrɛ, an be se ka dakun 5-6nan ani ɲɛɛ 5nan ka jaa lajɛ n’a tigi ye walisa k’a yira cogo min na Bibulu b’an dɛmɛ ka Jehova lɔn. An be se k’o bɛɛ kɛ n’an lɔnen be o tigi ka soda la.
5 Telefɔni fɛ: A ka di mɔgɔ dɔw ye ka Bibulu kalan kɛ telefɔni fɛ sanni k’a kɛ n’an ye ɲɛɛ ni ɲɛɛ. An ka wale nin lajɛ: Waajuli kɛtɔ soo ni soo, balimamuso dɔ ye musonin dɔ kunbɛn. O muso tun ye denbatigi ye, ani a bolo degunnen tun be tuma bɛɛ a ka baara la. Balimamuso dɛsɛra k’a kunbɛn kokura a ka soo minkɛ, a y’a latigɛ ka telefɔni ci a fɛ. Musonin y’a ɲɛfɔ ko sɔbɛ la, wagati t’ale fɛ ka baro kɛ Bibulu koo la. Balimamuso y’a fɔ ko: “Miniti 10 wala miniti 15 cɛ i be se ka lɔnniya kura sɔrɔ, hali telefɔni fɛ.” Muso y’a jaabi ko: “Ayiwa, n’a bena kɛ telefɔni lo fɛ, ne sɔnna!” A ma mɛɛn, bibulukalan daminɛna n’a ye telefɔni fɛ.
6 I be to ka taga bɔ mɔgɔ minw fɛ, yala u dɔw bena sɔn ka kalan kɛ telefɔni fɛ wa? Kɛcogo min lakalila san fɛ, i be se k’o kɛ k’a filɛ, wala i be se k’a fɔ dɔrɔn ko: “N’a ka fisa i ma, an be se ka baro kɛ Bibulu kan telefɔni fɛ. Yala o ka fisa i ma wa?” N’an b’an ka bibulukalan porogaramu yɛlɛma ka bɛn ni mɔgɔw ka koow cogoya ye, an bena se k’u dɛmɛ ka “Ala dɔnniya sɔrɔ.”—Ntal. 2:5; 1 Kɔr. 9:23.
[Study Questions]
1, 2. Cogo juman na an be se k’an ka bibulukalan kɛcogo yɛlɛma ka mɔgɔ degunnenw dɛmɛ?
3. Mun na a ka ɲi an ka bibulu-kalan kɛcogo ɲɛyira mɔgɔw la an ka ɲɔgɔnye fɔlɔ la? Ani, o be se ka kɛ cogo di?
4. Viziti kuraw kɛtɔ, cogo juman na an be se ka bibulukalan daminɛ ni mɔgɔw ye u ka sodaw la?
5, 6. (a) Mun na a be se ka fisaya mɔgɔ dɔw fɛ ka Bibulu kalan kɛ telefɔni lo fɛ? (b) Kalan min be kɛ telefɔni fɛ, cogo juman na an be se k’o kofɔ mɔgɔw ye?