An k’an mako don mɔgɔw la: An kɛtɔ ka koow kɛ ni ɲumanya ye
1 Hali ni Jehova ye duniɲa kuru bɛɛ Masaba ye, a be hadamaden dafabaliw minɛ ni ɲumanya ni jantoli ni bonya ye (Jen. 13:14; 19:18-21, 29). An be se ka kibaro duman fɔcogo fisaya an kɛtɔ ka an ka Ala ka ɲumanya ladegi (Kol. 4:6). O tɛ dan kumacogo dɔrɔn ma ni bonya ye.
2 Daa ni daa: An ka kan ka mun kɛ n’an natuma ma bɛn, wala n’an lamɛnbaga bolo degunnen lo kojugu fɔɔ a tɛ se ka baro kɛ n’an ye do? A ka ɲi an k’an janto o ɲɔgɔnna koow la an kɛtɔ ka kuma surunya kosɔbɛ wala k’a ɲini ka segi ka na tuma wɛrɛ la. An ka ɲumanya kɛ k’an yɛrɛ minɛ an kana sinsin a kan ko mɔgɔw ka gafew ta n’u t’a fɛ. Jantoli bena an lasun fana ka mɔgɔw ka fɛɛnw minɛ ni bonya ye, ani k’an deen degi o la: i n’a fɔ ka ludaw ni bondaw tugu an kɔ. An ma mɔgɔ minw sɔrɔ u ka soo, n’an ye gafe o gafe to u ye, an k’an janto a la ko mɔgɔ wɛrɛw ɲɛɛ t’a la. Tiɲɛn na, ɲumanya bena an lasun ka mɔgɔw minɛ i n’a fɔ an b’a fɛ olu k’an minɛ cogo min na.—Luka 6:31.
3 Sirada la waajuli: Waajuli kɛtɔ sirada la, an be se ka bonya la mɔgɔw kan n’an tɛ sennatigiw tɛmɛyɔrɔ datugu, ani n’an tɛ ɲɔgɔnw lajɛn bitigidaw la. An k’an janto mɔgɔw ka cogoya la: an ɲɛɛ b’a la ko dɔw kɔrɔtɔlen lo. Sanni an ka ɲɛsin olu ma, an k’a ɲini ka kuma mɔgɔw fɛ, wagati dɔɔni be minw fɛ. Sira kan mankan kosɔn, an mako bena kɛ a la k’an kaan kɔrɔta tuma dɔw la. Nka an ka ɲi k’o kɛ ni danbe ye, an kana a to mɔgɔw b’an filɛ o kosɔn.—Mat. 12:19.
4 Waajuli kɛtɔ telefɔni fɛ: N’an be waajuli kɛra telefɔni fɛ, ani n’an b’an janto mɔgɔw la, an bena sigi yɔrɔ min na mankan tɛ yen. Kɛcogo ɲumanw bena an lasun an ka teliya k’a fɔ an ye mɔgɔ min ye ani k’an welekun ɲɛfɔ. Kuma kɛtɔ, an k’an daa sin telefɔni mikro ma, ani an k’an kumakan diya. O bena an lamɛnbaga lasun a k’a daa don baro nafaman la Bibulu kan (1 Kɔr. 14:8, 9). Nin kɛcogow bɛɛ la, n’an be mɔgɔw ladiya, k’an janto u la, ani ka bonya la u kan, an be an ka Ala Jehova ka ɲumanya ladegi.