A ɲini k’i ka waajuli kɛcogo fisaya: Waajuli kɛcogo jagokɛyɔrɔw la

Mun na a kɔrɔtanin lo: Mɔgɔ caaman be baara kɛ lɛri caaman kɔnɔ. Cogo fisaman min na an be se ka Masaya kibaro lase u ma, o ye ka taga bɔ u ye u ka baarakɛyɔrɔ la. Ka waajuli kɛ jagokɛyɔrɔw la, nafa ni ninsɔndiya be se ka sɔrɔ o la, sabu mɔgɔw tɛ fɔn yen. Ka fara o kan, jagokɛlaw be mɔgɔw minɛ ka ɲɛ sabu u be u jati sannikɛlaw ye. Walisa ka se ka waajuli kɛ jagokɛyɔrɔw la koɲuman, weleweledalaw ka kan ka koow kɛ nɛmɛnɛmɛ. U ka fanidoncogo n’u sawura cogo ka kan ka ɲɛ fana (2 Kor. 6:⁠3). O kama, waajuli be kɛ jagokɛyɔrɔw la siɲɛ daa min na ani mɔgɔ minw b’o kɛ, waajulibaara kɔrɔsibaga ka kan ka k’a janto kosɔbɛ o koo la.

A kɛcogo:

Yiracogo kunkurunin dɔ labɛn. N’an ye feerelikɛlaw ka wagati caaman ta, n’a sɔrɔ u tɛna sɔn k’an lamɛn siɲɛ wɛrɛ.
Labɛn kɛ ka taga bɔ u ye wagati min na u bolo degunnin tɛ, i n’a fɔ feerekɛyɔrɔw dayɛlɛtuma na.
A ɲini ka kuma ni patɔrɔn ye fɔlɔ. Baro kɛ n’a ye ninsɔndiya la ani teriya la. I be se k’a fɔ ko: “Jagokɛlaw sɔrɔ man di u ka soo. O lo kama an nana bɔ aw ye aw ka baarakɛyɔrɔ la.” Baro kɛ n’a tigi ye dɔɔni ani sɛbɛnin, zurunaliw wala sɛbɛ kalanta wɛrɛ to a fɛ. Walisa a kana an jati feerelikɛlaw ye, a ka fisa an kana bolomafara kofɔ a ye fɔɔ n’ale yɛrɛ b’a fɛ k’a lɔn an ka baara musakaw be sara cogo min na.
Ni patɔrɔn y’i minɛ teriya la, sira ɲini a fɛ ka kuma dɔɔni baarakɛla tɔɔw fɛ fana. Feerekɛyɔrɔ dɔw la, n’a sɔrɔ a ka fisa i ka sira ɲini patɔrɔn fɛ walisa ka sɛbɛ dɔw bila baarakɛlaw ka lafiɲɛyɔrɔ la.
I ka hakili sɔrɔ ani i kana ja kelen kan. Ɲɛyirali fɛ, ni feerelikɛla be kumana ni sannikɛla dɔ ye wala n’a bolo degunnin lo, i ka kɔnɔni kɛ u be tila fɔlɔ i be sɔrɔ ka kuma a fɛ.

Nin kɛ ka filɛ kalo nin na:

N’aw ka kan ka waajuli kɛ jagokɛyɔrɔ la, aw bena baro dadon cogo min na, aw ka ɲɛyirali surun dɔ kɛ o kan gwa kɔnɔ batoli nata la.