An ka waajuli kɛ ni jagwɛlɛya ye, nka an fana ka kɛ hɛɛrɛkɛlaw ye
1 An be mɔgɔ minw waaju, u caaman b’u kɔnɔ gwɛ k’u ka lannakow fɔ an ye. Nka u bɛnnen tɛ Bibulu ka tiɲɛn kalan ma. Hali ni an ka kan ka waajuli kɛ ni jagwɛlɛya ye, an fana b’a fɛ ‘hɛɛrɛ ka to an ni mɔgɔw bɛɛ cɛ.’ An t’a fɛ ka don u gasi la gwansan (Rom. 12:18; Kɛw. 4:29). Cogo juman na an be se ka Masaya kibaro fɔ ni jagwɛlɛya ye, nka ka kɛ hɛɛrɛkɛlaw ye fana?
2 An ka bɛn ɲini yɔrɔ dɔw kan: Hɛɛrɛkɛla b’a yɛrɛ tanga sɔsɔlikow ma. N’an lamɛnbaga lanen be a ka lannakow la n’a dusu bɛɛ ye, ani an b’a ɲini k’a sɔsɔ gwansan, o tɛna a lasun ka lamɛnni kɛ an fɛ. Ni a ye ngalon kuma dɔ fɔ, n’a sɔrɔ an be se ka miiriya dɔ fɔ nɛmɛnɛmɛ, an fila bena bɛn min kan. N’an be sinsin o miiriya ɲɔgɔn kan, n’a sɔrɔ an bena se k’a tigi dusu mala ani ka baro diya a ye.
3 N’an lamɛnbaga ye ngalon miiriya dɔ fɔ ani an m’a jaabi, yala an tɛ joo dira a tigi ma wala an tɛ tiɲɛn nagasira wa? Ayi. Cii min dira an kerecɛn cidenw ma, o ye ka Ala ka Masaya kibaro duman waaju. A ma fɔ ko an ka mɔgɔw ka ngalon miiriyaw kelen-kelen bɛɛ jaabi (Mat. 24:14). An lamɛnbaga mana ngalon miiriya dɔ fɔ, sanni an k’o kɛ basi ye, an be se ka tɛmɛ o sababu fɛ k’a ɲini k’a tigi ka fɛtaw faamu.—Ntal. 16:23.
4 An ka danbe la an lamɛn-baga kan: Tuma dɔw la, waajibi lo an k’an jagwɛlɛya k’a yira ko kalan dɔw ye ngalon ye. Nka komi an ye hɛɛrɛkɛlaw ye, an b’an yɛrɛ minɛ, an tɛ yɛlɛ bɔ mɔgɔw la, ani an t’u kɔrɔfɔ k’u mafiɲɛya u ka ngalon lannakow ni u ka kalanw kosɔn. N’an b’a kɛ komi an ka fisa n’u ye, u be se k’u mako bɔ an na. Nka, n’an b’an majigi ka koow kɛ ni teriya ye, o bena mɔgɔw dusu minɛ ni tiɲɛn koo ka di u ye. N’an be an lamɛnbagaw bonya k’an janto u ka lannakow la, o be danbe la u kan. O la, a tɛna gwɛlɛya u fɛ ka sɔn an ka cira la.
5 Ciden Pol tun be minw waaju, a tun b’a janto u ka lannakow la. A tun b’a ɲini ka kibaro duman fɔ cogo dɔ la walisa k’u dusu minɛ (Kɛw. 17:22-31). A sɔnna ka a ‘yɛrɛ kɛ fɛɛn bɛɛ ye bɛɛ kosɔn, walisa cogo o cogo, a ka u dɔw kisi.’ (1 Kɔr. 9:22). An fana be se k’o ɲɔgɔn kɛ: An kɛtɔ ka kibaro duman waaju ni jagwɛlɛya ye, nka an ka kɛ hɛɛrɛkɛlaw ye fana.