“Hɛrɛ ka to aw ni mɔgɔw bɛɛ cɛ”

1. An ka kan ka Bibulu ka ladili juman sira tagama n’an lamɛnbaga dimina an kɔrɔ?

¹ Hɛɛrɛ koo ka di Jehova sagokɛlaw ye. An ka waajuli baara fana ye hɛɛrɛko ye (Es. 52:7). Nka tuma dɔw la, mɔgɔ dɔw be dimi an kɔrɔ sabu an y’u ka daa kɔkɔ. Mun lo bena an dɛmɛ an ka kɛ hɛɛrɛkɛla ye o koow ɲɔgɔn na?—Rom. 12:18.

2. Mun na a kɔrɔtanin lo an k’a ɲini ka mɔgɔw faamu?

² An k’a ɲini ka mɔgɔw faamu: Dɔw be dimi sabu tiɲɛn koo man di u ye. Nka, dɔ wɛrɛw dimikun tɛ an ka waajuli baara ye. N’a sɔrɔ an y’u ka daa kɔkɔ wagati dɔ la min bɛnnin tɛ wala an lamɛnbaga diminin lo a yɛrɛ ka kunkow lo kosɔn. Hali ni a tigi dimina an ka kibaro diiman kosɔn, an kana ɲinɛ ko a be se ka kɛ ko a lafilinin lo (2 Kɔr. 4:4). N’an b’a ɲini ka mɔgɔw faamu, an dusu tɛna gwan. O la, an tɛna a jati ko a tigi dimina an yɛrɛ lo kama.—Ntal. 19:11.

3. An be se k’a yira cogo di ko an b’an lamɛnbaga bonya?

³ An k’an lamɛnbaga bonya: An ka kiinmɔgɔ caaman lanin b’a la tigitigi ko u ka lannakow ye tiɲɛn lo ye (2 Kɔr. 10:4). Joo b’u fɛ ka sɔn wala ka ban k’an lamɛn. An tɛna a ɲini abada k’an lamɛnbaga mafiɲɛya a ka lannakow kosɔn wala k’a yira a la ko an be Bibulu lɔn ka tɛmɛ ale kan. N’a ko an ka bɔ ale kɔrɔ, an kana a sɔsɔ, an ka taga.

4. N’u ko an ka kuma ka kɛ ni nɛɛma ye, o kɔrɔ ko di?

⁴ An ka kuma ka kɛ ni nɛɛma ye: Hali n’a tigi ye kuma juguw fɔ an ye, an ka kan k’an dusu suman k’a jaabi ni kuma diimanw ye (Kol. 4:6; 1 Piɛrɛ 2:23). Sanni an ka sɔsɔli kɛ, an k’a ɲini ka bɛn kelen ma n’a ye. An be se k’a ɲini nɛmɛnɛmɛ k’a ka sɔsɔli kuun lɔn. Nka tuma dɔw la, a ka fisa an ka baro lalɔ walisa an kana na dɔ fara a ka dimiya kan.—Ntal. 9:7; 17:14.

5. Nafa juman b’a la ka kɛ hɛɛrɛkɛla ye waajuli la?

⁵ N’an ye hɛɛrɛkɛla ye, n’a sɔrɔ an lamɛnbaga bena o kɔrɔsi ani siɲɛ wɛrɛ a bena sɔn ka lamɛnni kɛ an balimaw fɛ (Rom. 12:20, 21). Hali n’a janin lo kelen kan, loon dɔ a be se ka kɛ an balima dɔ ye (Gal. 1:13, 14). Nka, hali n’a tigi m’a mako don tiɲɛn koo la, an bena nɔɔrɔ la Jehova kan ani k’an ka kalan bonya n’an b’an yɛrɛ minɛ ani n’an ye hɛɛrɛkɛla ye.—2 Kɔr. 6:3.