An k’an dusukun balo lanaya kumaw fɛ
1 N’an b’a fɛ ka ɲɛnamaya kɛ k’an masirilen to Ala la, fɔɔ an ka jijalibaw kɛ (1 Tim. 4:7-10). N’a danna an yɛrɛ fanga ma, an bena sɛgɛ joona ani an bena fili (Esayi 40:29-31). An be se ka fanga sɔrɔ Jehova fɛ cogoya dɔ fɛ: n’an b’an ‘dusukun balo ni lanaya kumaw ye.’—1 Tim. 4:6, KIBARO DIMAN, 1994.
2 Hakilimaya domuni nafamanba: Jehova be tɛmɛ a ka Kuma fɛ ani “Jɔnkɛ dannamɔgɔ hakiliman” bolo fɛ ka hakilimaya domuni nafamanba di an ma (Mat. 24:45). Yala an b’an seko kɛra walisa ka nafa sɔrɔ a la wa? Yala an be Bibulu kalan loon o loon wa? Yala an ye wagati latigɛ kelenna kalan ni miirili kama wa (Zab. 1:2, 3)? N’an b’an ka hakilimaya balo koɲuman o cogo la, o bena barika don an na ani o bena an tanga Sitanɛ ka duniɲa nɔɔ ma, min b’an ka barika dɔgɔya (1 Yuh. 5:19). N’an b’an hakili fa ni koo nafamanw ye ani n’an b’o koow sira tagama, Jehova bena kɛ an fɛ.—Filip. 4:8, 9.
3 Jehova be tɛmɛ kafo ka lajɛnw fana fɛ ka barika don an na (Heb. 10:24, 25). O lajɛnw na, an be kalan sɔrɔ Alakow kan, ani an be jɛnɲɔgɔnya ɲuman kɛ n’an balimaw ye. O bɛɛ be barika don an na walisa an ka to kelen kan n’an be gwɛlɛyaw kunbɛnna (1 Piɛre 5:9, 10). Kerecɛn sunguru dɔ y’a fɔ ko: “Ne be taga lakɔli la tile kuru bɛɛ kɔnɔ. O be ne barika ban. Nka lajɛnw be komi jii boyi kongokolon kɔnɔ. U be ne dɛmɛ ka fanga kura sɔrɔ ani ka lakɔli ka koow muɲu o dugusagwɛ.” Siga t’a la, baraji b’a la n’an be jijali kɛ ka taga lajɛnw na.
4 An ka tiɲɛnko weleweleda: Yesu tun be waajuli jate komi domuni. O tun be barika don a la ( Yuh. 4:32-34). O cogo kelen na, an mana kuma Ala ka layidu cɛɲumanbaw koo la, an b’a ye k’o be an ka barika lakuraya. N’an bolo degunnen be waajuli baara la, o b’a to an dusukun n’an hakili be sigi Masaya koow kan ani duga nataw kan. Tiɲɛn na, o be barika kura don an na.—Mat. 11:28-30.
5 Jehova be hakilimaya domuni nafamanba dira a ka mɔgɔw ma bi. Nɛɛma lo an fɛ an ka nafa sɔrɔ o la dɛ! O kama, an ka to ka ɲagalikan bɔ ka nɔɔrɔ la a kan.—Esayi 65:13, 14.