Aw Ka ƝIningaliw Jaabiliw

◼ Ala ka Mara cidenyabaara lakɔli, waajuliko lajɛn, foroba-kalan wala La Tour de Garde kalan ka dɔnkili fɔlɔ be dadon cogo di, ani jɔn lo b’o kɛ?

Dɔnkili minw sugandira walisa ka Ala ka Mara cidenyabaara lakɔli daminɛ lɔgɔkun o lɔgɔkun, u be sɔrɔ lakɔli ka porogramu kɔnɔ, An ka Masaya Cidenyabaara ɲɛɛ 3-6nan na (ɔkutɔburu ta). Dɔnkili minw be waajuliko lajɛn dadon ani k’a kuncɛ lɔgɔkun kelen-kelen kɔnɔ, u be sɔrɔ An ka Masaya Cidenyabaara ɲɛɛ 2nan na. O cogo kelen na, dɔnkili dɔw nimɔrɔ be sɔrɔ La Tour de Garde kelen-kelen ɲɛɛ 2nan na. U dira La Tour de Garde kalan kama lɔgɔkun kɔnɔ. O dɔnkili minw dira, u be jati lajɛnw kɔnɔfɛn dɔ ye. O kama, o lajɛn ɲɛminɛbaga lo ka kan k’u dadon sanni k’a to lajɛn tɛmɛnen ka kalankɛla ɲɛbila k’o kɛ.

Ɲɛyirali fɛ, Ala ka Mara cidenyabaara lakɔli kɔrɔsibaga ka kan ka lamɛnnikɛlaw bisimila, ka dɔnkili fɔlɔ dadon, ka lakɔli ɲɛminɛ ani ka waajuliko lajɛn ka kalankɛla fɔlɔ weele ka na tintin kan. Balimacɛ min be waajuliko lajɛn daminɛ, ale lo ka ɲi k’o lajɛn ka dɔnkili dadon walisa k’a daminɛ.

O cogo kelen na, kalankɛla ɲɛbila dɔ lo ka kan ka forobakalan dadon. A ka ɲi ka lamɛnnikɛlaw bisimila ni dusudiya ye ani k’a ɲini u fɛ u ka jɛn ka dɔnkili dɔ la, kalankɛla ye min sugandi. Ale lo bena lajɛn daminɛ ni delili ye (o cii be se ka kɔn ka di balimacɛ setigi dɔ wɛrɛ ma fana). Kalankɛla ɲɛbila bena forobakalan kɛbaga weele ani ka kalan barokun fɔ mɔgɔw ye. Forobakalan bannen kɔ, kalankɛla ɲɛbila tɛna segi kalan ka miiriyaw kan tugun. A bena kafo ka waleɲumanlɔn yira ka surunya kalan koo la. A bena lɔgɔkun nata ka kalan barokun fɔ ani k’a ɲini bɛɛ fɛ u ka to yen ka La Tour de Garde kalan makɔnɔ. Kun t’a la a k’a ɲini lamɛnnikɛlaw fɛ n’u b’a fɛ k’u ka balimaya kanuya yira ani k’u ka foliw lase kalankɛla lonan ka kafodenw ma. O kɔ, a bena La Tour de Garde kalan ɲɛminɛbaga weele ka na tintin kan.

La Tour de Garde kalan ɲɛminɛbaga bena dɔnkili fɔlɔ dadon min sugandira kalan kama. A bena kalan ɲɛminɛ ka kɛɲɛ ni cikanw ye minw be sɔrɔ sɛbɛw kɔnɔ. O kɔ, a bena kalan kuncɛli dɔnkili dadon. Koow sira fɛ, balimacɛ min ye forobakalan kɛ, La Tour de Garde kalan ɲɛminɛbaga bena ale lo weele ka na delili laban kɛ.

An kɛtɔ k’o cikanw sira tagama, o bena a to an ka lajɛnw ka kɛ cogo kelen na kafow kɔnɔ yɔrɔ bɛɛ.