Kafo ka lajɛnw porogramu kura
1 Balimaya jɛnkuluden minw be duniɲa kuru bɛɛ kɔnɔ, u ye kibaro duman dɔ mɛn saan 2008, awirilikalo tile 21-27nan lɔgɔkun kɔnɔ. “K’a daminɛ zanwiyekalo tile fɔlɔ, saan 2009 kɔnɔ, kafo ka kitabukalan bena kɛ loon kelen na ni Ala ka Mara cidenyabaara lakɔli ani waajuliko lajɛn ye. Kafo ka kitabukalan tɔgɔ bena yɛlɛma ka weele ko: Kafo ka Bibulu kalan.”
2 O loon ka lajɛnw porogramu: Dɔnkiliw ni deliliw fara o lajɛn saba kan, o wagati mumɛ bɛɛ bena kɛ lɛri kelen ni miniti 45 ye. Lajɛn bena daminɛ ni dɔnkili ni delili ye (min. 5), kafo ka Bibulu kalan be tugu o kɔ (min. 25). Ala ka Mara cidenyabaara lakɔli (min. 30) bena sin ka tugu kafo ka Bibulu kalan kɔ. O kɔ, dɔnkili (min. 5) be la ka waajuliko lajɛn (min. 35) dadon. Dɔnkili ni delili (min. 5) be kɛ ka lajɛn kuncɛ. Walisa ka aw dɛmɛ k’o lajɛnw labɛn, kafo ka Bibulu kalan, lakɔli ani waajuliko lajɛn porogramuw bena to ka sɛbɛ kalo o kalo An ka Masaya Cidenyabaara kɔnɔ.
3 Kafo ka Bibulu kalan: O lajɛn bena kɛ La Tour de Garde kɛcogo la. Kuun t’a la ka segi lɔgɔkun tɛmɛnen ka kalan kan ka sɔrɔ k’a daminɛ. Kalan dadon kumaw ka kan ka surunya kosɔbɛ. O bena a to bɛɛ ka wagati sɔrɔ ka lakalita surunw kɛ. Diinan mɔgɔkɔrɔw ɲɛbila bena labɛn kɛ walisa diinan mɔgɔkɔrɔw k’o kalan kɛ ka di ɲɔgɔn ma lɔgɔkun o lɔgɔkun.
4 Waajuliko lajɛn: O lajɛn bena to a cogo la nka a kalan yɔrɔw bena surunya. Kunnafoniw bena to ka kɛ miniti looru kɔnɔ. O ka kan ka labɔri kɛ kunnafoni jɔnjɔnw kama ani ka tɔnbolo ka lɛtɛrɛ dɔw kalan. Waajibi tɛ ka kunnafoni ninw ɲɔgɔnw kalan tintin kan: waajulibaara labɛnw, Masaya boon saniya koo, jatiminɛw rapɔɔriw, ani Betɛli ka lɛtɛrɛ minw be deli ka ci kafow ma. U ka kan ka nɔɔrɔ kunnafoniw tablo kan walisa balimaw k’u kalan. Cii dira balima minw ma waajuliko lajɛn na, u ka kan k’u yɛrɛ labɛn koɲuman ani ka cikanw ni wagati latigɛnen labato.
5 Kafokulu kɔrɔsibaga mana na bɔ kafo ye: Dan na lɔgɔkun porogramu tɛna yɛlɛma. Ala ka Mara cidenyabaara lakɔli ani waajuliko lajɛn bena kɛ talatalon. O lajɛnw be laban ni dɔnkili ye. O kɔ, kafokulu kɔrɔsibaga b’a ka miniti 30 kalan kɛ. I n’a fɔ an tun be deli ka dan na lɔgɔkun kɛ cogo min na, loon wɛrɛ bena latigɛ kafo ka Bibulu kalan kama. Dɔnkili be la o kalan kɔ, kafokulu kɔrɔsibaga ka kalan filanan be sɔrɔ ka tugu. Lajɛn kuun bena cɛ ni dɔnkili ni delili ye.
6 Waajulibaara lajɛnw: Diinan mɔgɔkɔrɔw jɛnkulu bena cii di jɛnkulu kɔrɔsibagaw ma walisa u ka waajuliko ɲɛnabɔ jɛnkuluw kɔnɔ ani k’u janto jɛnkuludenw ka hakilimaya koo la. O kunkanbaara mana di kɔrɔsigi ciden dɔ ma, a ka kan ka weele ko “jɛnkulu baarakɛden.”
7 Nin kunnafoniw b’a yira ko an bena sababu sɔrɔ o suu la ka hakilimaya domuniba diya bɔ, o min b’an kalan ani a b’an sabati. O bena an dɛmɛ an ka kɛ waajulikɛlaw ni kalankɛlaw setigiw ye, minw labɛnna walisa u ka cidenya baara ka deen bɛrɛbɛrɛ.—Efɛs. 4:13, 14; 2 Tim. 3:17.
8 N’an be kɔn k’o lajɛnw labɛn, o bena an dɛmɛ k’an hakili sigi ka miiriya jɔnjɔnw lamɛn, o minw bena bɔ kɛnɛ kan lajɛn kelen-kelen bɛɛ la. An bɛɛ bena sababu sɔrɔ ka lakalitaw kɛ, o min b’a to an ka ɲɔgɔn jija koɲuman (Rom. 1:11, 12; Heb. 10:24). An ka laɲinita ka kan ka kɛ ko ‘mɔgɔw bɛɛ b’a ye ko an be taga ɲɛ’ an kɛtɔ ka “tiɲɛ kuma faranfasi cogo sɛbɛ la.”—1 Tim. 4:15; 2 Tim. 2:15.
9 Yɛlɛmaniba min kɛra kafo ka lajɛnw na, o b’an ɲagali kosɔbɛ. An bɛɛ ka tugu “Jɔnkɛ dannamɔgɔ hakiliman” ka ladiliw kɔ ani ka to an Dɛndɛbagaba kɔrɔ, ale min b’an labɛnna ‘tɔɔrɔba’ kama, o min ka surun kosɔbɛ.—Mat. 24:21, 45; Heb. 13:20, 21; Jir. 7:14.
[Study Questions]
1, 2. K’a daminɛ saan 2009 zanwiyekalo la, yɛlɛmani jumanw lo bena kɛ lajɛnw na?
3. Kafo ka Bibulu kalan bena to ka kɛ cogo di?
4. Yɛlɛmani jumanw lo bena kɛ waajuliko lajɛn na?
5. Dan na lɔgɔkun na, kafo ka lajɛnw porogramu bena kɛ cogo di?
6. Jɛnkulu kɔrɔsibaga ka baara bena kɛ mun lo ye?
7. An be se ka la a la ko an bena mun lo sɔrɔ kafo ka lajɛnw porogramu kura la?
8. N’an be kɔn k’o lajɛnw labɛn, o b’an yɛrɛ ani mɔgɔ wɛrɛw nafa cogo di?
9. An cɛsirinen lo ka mun kɛ? Ani, mun kama?