Yala i be se ka don ‘daaba fɛ min yɛlɛla i ɲɛ ka baara caaman kɛ’ wa?
1 Tuma min na ‘daaba yɛlɛla Pol ɲɛ ka baara caaman kɛ’, a teliyara k’o kɛ sababu ye ka Masayakow yiriwa hali ni a juguw tun ka ca (1 Kɔr. 16:9). Bi fana, duniɲa kuru bɛɛ kɔnɔ, weleweledala 642000 ɲɔgɔn donna daaba fɛ, min yɛlɛla u ɲɛ ka baara kɛ: u kɛra kudayi piyɔniyew ye.
2 Koow cogoya be se ka yɛlɛma: Hali n’an tɛ se ka baara bɛrɛ kɛ bi an ka koow cogoya kosɔn, u be se ka yɛlɛma. O kama, a ka ɲi an ka to ka jatiminɛ kɛ tuma dɔw la. An kana a to koow bɛɛ be dafa an bolo fɔlɔ (Waaj. 11:4). Yala i ye kamalen wala sunguru ye, ani i ka kalan bena ban lise la yanni dɔɔni cɛ wa? Yala i ye bangebaga ye, ani i deenw bena don lakɔli la yanni dɔɔni wa? Yala i bena taga antɛrɛti la yanni dɔɔni wa? O yɛlɛmani ɲɔgɔnw sen fɛ, i be se ka wagati sɔrɔ k’i seen don kudayi piyɔniye baara la. Kɛnɛyakow tun be balimamuso dɔ kan. Nka, a y’a latigɛ ka kɛ piyɔniye ye a saan 89nan na. Mun na do? Komi a ye saan kelen ni kɔ kɛ a ma la dɔgɔtɔrɔso la, a y’a jati ko a ka kɛnɛyako bena a to a be kɛ piyɔniye ye.
3 Pol min kofɔra, ale tun b’a ɲinina ka taga bɔ a balimaw ye Kɔrɛnte. Nka kibaro duman nafa kosɔn, a ye yɛlɛmani dɔw don a ka laɲinitaw la. Minw seen be kudayi piyɔniye baara la bi, u caaman waajibiyara ka yɛlɛmani dɔw kɛ walisa ka se ka kɛ piyɔniyew ye. Dɔw y’u ka ɲɛnamaya kɛcogo nɔgɔya ka dɔ bɔ u ka musakaw la. U y’o kɛ fɔɔ u be dan ka baara kɛ tuma kelen-kelen na dɔrɔn walisa k’u ka musakaw sara, minw man ca tugun. U ye ninsɔndiya sɔrɔ u ka nɛɛma baara la (1 Tim. 6:6-8). Furuɲɔgɔnma dɔw ye yɛlɛmaniw kɛ u ka ɲɛnamaya kɛcogo la walisa cɛɛ dɔrɔn ka taga baloɲini baara la. O la, o kɛra sababu ye a muso fɛ ka kɛ piyɔniye ye.
4 I kana sin k’a fɔ i kɔnɔ ko see t’i ye ka kɛ piyɔniye ye, ka sababu kɛ i be siranna ko i tɛna se k’i ka lɛriw sɔrɔ ka dafa. Lɛri fila ni damanin dɔrɔn lo ɲininen be i fɛ loon o loon. N’i lanen t’a la ko i be se k’o kɛ, i ka piyɔniye kɔrɔsigi baara kɛ k’a filɛ kalo kelen wala kalo fila kɔnɔ, i kɛtɔ ka lɛri 70 ɲini ka sɔrɔ. O bena a to i ka piyɔniye baara ninsɔndiya nɛnɛ ka filɛ (Zab. 34:8). I ka baro kɛ ni balimaw ye minw be piyɔniye baara la. N’a sɔrɔ u ye see sɔrɔ i ka gwɛlɛya ɲɔgɔnw kan (Ntal. 15:22). I be jijali minw kɛra walisa ka dɔ fara i ka cidenya baara kan, Jehova deli a k’u duga.—1 Yuh. 5:14.
5 Baara, kun be min na: Baraji caaman be sɔrɔ kudayi piyɔniye baara la. A b’a to i ka hɛɛrɛba diya bɔ, min be sɔrɔ nili caaman kɛli fɛ (Kɛw. 20:35). Piyɔniye baara bena i dɛmɛ k’i ka baara kɛcogo fisaya walisa ka tiɲɛn kuma fɔ cogo sɔbɛ la (2 Tim. 2:15). A bena sababu caaman di i ma ka Jehova bolo ye i ka koɲɛw la (Kɛw. 11:21; Fil. 4:11-13). A fana bena i dɛmɛ ka hakilimaya jogow yiriwa i yɛrɛ la, i n’a fɔ muɲuli. O la, i bena i magwɛrɛ tugun Jehova la (Yak. 4:8). Daaba yɛlɛla i ɲɛ ka baara caaman kɛ. Yala i be se ka don o fɛ, ani ka kɛ kudayi piyɔniye ye wa?
[Study Questions]
1. ‘Daaba’ juman ‘yɛlɛla an ɲɛ ka baara caaman kɛ’?
2. Mun na a ka ɲi an ka to ka jatiminɛ kɛ tuma dɔw la?
3. Dɔw sera ka kɛ kudayi piyɔniyew ye cogo di?
4. N’an lanen t’a la ko an be se ka lɛri 70 sɔrɔ, an be se ka mun lo kɛ ?
5. Mun na kudayi piyɔniye baara ye baara ye kun be min na?